ଲିସବନ୍,୧୦।୧୧: ବହୁ ସମୟରେ କର୍ମଚାରୀଙ୍କ ପାଖକୁ ଅଫିସ ସମୟ ପରେ ମଧ୍ୟ ବସ୍ଙ୍କ ଫୋନ୍ ଅବା ମେସେଜ୍ ଆସିଥାଏ। ତେବେ ଏବେ ବସ୍ ଏପରି କରିବା ବେଆଇନ ହେବ। ପର୍ତ୍ତୁଗାଲରେ ଏହାକୁ ରୋକିବା ପାଇଁ ନୂଆ ଆଇନ ଅଣାଯାଇଛି। ଅଫିସରୁ ଘରକୁ ଆସିବା ପରେ ବସ୍ ଏଭଳି କରିପାରିବେନି ବୋଲି ନୂଆ ଆଇନରେ କୁହାଯାଇଛି। ଏପରି କଲେ ଆଇନ ଅନୁଯାୟୀ ବସ୍ଙ୍କୁ ଦଣ୍ଡାଦେଶ କରାଯିବ।
ଗଣମାଧ୍ୟମ ସଂସ୍ଥା ଡେଲି ମେଲର ରିପୋର୍ଟ ଅନୁଯାୟୀ, ପର୍ତ୍ତୁଗାଲର ସଂସଦରେ ପାରିତ ହୋଇଥିବା ଏହି ନୂତନ ନିୟମ ଅନୁଯାୟୀ ଯଦି କମ୍ପାନୀମାନେ ଅବା ବସ୍ କର୍ମଚାରୀମାନଙ୍କୁ ଅଫିସ ସମୟ ପରେ ଏବଂ ଛୁଟିଦିନରେ ଫୋନ୍ କରିନ୍ତତ କିମ୍ବା ମେସେଜ୍ କରନ୍ତି, ତେବେ ସେମାନଙ୍କ ଉପରେ କଠୋର ଦଣ୍ଡବିଧାନ କରାଯିବ। କୋଭିଡ -୧୯ ମହାମାରୀ ସମୟରେ କର୍ମଚାରୀମାନେ ଓ୍ବାର୍କ ଫ୍ରମ୍ ହୋମ୍ କରୁଛନ୍ତି। କର୍ମଚାରୀଙ୍କ ସ୍ବାସ୍ଥ୍ୟ ସୁରକ୍ଷାକୁ ଦୃଷ୍ଟିରେ ରଖି ଦେଶର ଶାସକ ଦଳ ଏହି ନୂତନ ଶ୍ରମ ଆଇନ ପ୍ରଣୟନ କରିଛନ୍ତି।
ପର୍ତ୍ତୁଗାଲରେ କରାଯାଇଥିବା ନିୟମ ଅନୁଯାୟୀ, ଯଦି କୌଣସି କମ୍ପାନୀ ନିଜ କର୍ମଚାରୀଙ୍କୁ ଓ୍ବାର୍କ ଫ୍ରମ୍ ହୋମ୍ ଦେଉଛନ୍ତି, ତେବେ କର୍ମଚାରୀଙ୍କ ପାଇଁ ସମ୍ପୃକ୍ତ କମ୍ପାନୀକୁ ବିଦ୍ୟୁତ୍ ଏବଂ ଇଣ୍ଟରନେଟ ବିଲ ଦେବାକୁ ପଡିବ। ଯଦି ଜଣେ କର୍ମଚାରୀଙ୍କର ଛୋଟ ପିଲା ଅଛନ୍ତି, ତେବେ ପିଲାଙ୍କୁ ୮ ବର୍ଷ ବୟସ ହେବା ପର୍ଯ୍ୟନ୍ତ ସମ୍ପୃକ୍ତ କର୍ମଚାରୀ ଘରୁ କାମ କରିପାରିବେ। ୧୦ରୁ ଅଧିକ କର୍ମଚାରୀ କାମ କରୁଥିବା କମ୍ପାନୀ କ୍ଷେତ୍ରରେ ଏହି ନିୟମ ପ୍ରଯୁର୍ଯ୍ୟ ହେବ। ପର୍ତ୍ତୁଗାଲର ଶ୍ରମ ଏବଂ ସାମାଜିକ ସୁରକ୍ଷା ମନ୍ତ୍ରୀ ଆନା ମେଣ୍ଡେସ ଗୋଡିନୋହ କହିଛନ୍ତି ଯେ ରିମୋଟ୍ ଓ୍ବାର୍କିଂକୁ ଅଧିକ ସହଜ କରିବା ପାଇଁ ଏହି ଆଇନ ଅଣାଯାଇଛି।
