ନୂଆଦିଲ୍ଲୀ, ୧୦।୧୦: ଲୋକ ସଭା ବାଚସ୍ପତି ଓମ୍ ବିର୍ଲା ଏବଂ ରାଜ୍ୟ ସଭା ଅଧ୍ୟକ୍ଷ ଏମ୍. ଭେଙ୍କାୟା ନାଇଡୁ ଶନିବାର ବିଭିନ୍ନ ସଂସଦୀୟ ଷ୍ଟାଣ୍ଡିଂ କମିଟିର ପୁନର୍ଗଠନ କରିଛନ୍ତି। ଭୂପିନ୍ଦର ସିଂ ଯାଦବଙ୍କ ସ୍ଥାନରେ ଭାଜପା ନେତା ତଥା ବିହାରର ପୂର୍ବତନ ଉପମୁଖ୍ୟମନ୍ତ୍ରୀ ସୁଶୀଲ କୁମାର ମୋଦିଙ୍କୁ କାର୍ମିକ, ସାଧାରଣ ଅଭିଯୋଗ, ଆଇନ ଓ ନ୍ୟାୟ କମିଟିର ଅଧ୍ୟକ୍ଷ କରାଯାଇଛି। ଭାଜପା ଏମ୍ପି ଜୁଏଲ ଓରାମ ପ୍ରତିରକ୍ଷା କମିଟି ଅଧ୍ୟକ୍ଷ ପଦ ବଜାୟ ରଖିଥିବାବେଳେ କଂଗ୍ରେସ ନେତା ରାହୁଲ ଗାନ୍ଧୀ ଏହି କମିଟିର ସଦସ୍ୟ ଅଛନ୍ତି। ସେହିପରି ବିବାଦ ସତ୍ତ୍ୱେ କେରଳ ଏମ୍ପି ଶଶୀ ଥରୁର ସୂଚନା ପ୍ରଯୁକ୍ତି କମିଟି ଅଧ୍ୟକ୍ଷ ପଦ ବଜାୟ ରଖିଥିବାବେଳେ ଆନନ୍ଦ ଶର୍ମା ସ୍ବରାଷ୍ଟ୍ର ବ୍ୟାପାର ଏବଂ ଜୟରାମ ରମେଶ ବିଜ୍ଞାନ ପ୍ରଯୁକ୍ତି ଓ ପରିବେଶ କମିଟିର ଅଧ୍ୟକ୍ଷ ପଦରେ ରହିବେ। ଭାଜପା ଏମ୍ପି ରବିଶଙ୍କରଙ୍କୁ ଅର୍ଥ କମିଟି ସଦସ୍ୟ କରାଯାଇଥିବାବେଳେ ରମେଶ ପୋଖ୍ରିୟାଲ ନିଶଙ୍କଙ୍କୁ କାର୍ମିକ, ସାଧାରଣ ଅଭିଯୋଗ, ଆଇନ ଓ ନ୍ୟାୟ କମିଟିରେ ନିଆଯାଇଛି। ପ୍ରକାଶ ଜାଭଡେକର ବହିର୍ବ୍ୟାପାର କମିଟି ଏବଂ ପୂର୍ବତନ ସିଜେଆଇ ରଞ୍ଜନ ଗୋଗୋଇ ସୂଚନା ପ୍ରଯୁକ୍ତି କମିଟିର ସଦସ୍ୟ ଅଛନ୍ତି। ବିଭିନ୍ନ କମିଟିର ସଦସ୍ୟଙ୍କୁ ପରିବର୍ତ୍ତନ କରାଯାଇଛି।
