କଲମ୍ବୋ,୧୫।୨: ଟି-୨୦ ବିଶ୍ୱକପ୍ ୨୦୨୬ର ହାଇଭୋଲ୍ଟେଜ୍ ମ୍ୟାଚରେ ଭାରତ, ପାକିସ୍ତାନ ସମ୍ମୁଖରେ ୧୭୬ ରନ୍ର ଚ୍ୟାଲେଞ୍ଜିଂ ଟାର୍ଗେଟ୍ ରଖିଛି। ଓପନର୍ ଇଶାନ କିଷାନଙ୍କ ବିସ୍ଫୋରକ ବ୍ୟାଟିଂ ଏବଂ ଶେଷ ଆଡ଼କୁ ଅଧିନାୟକ ସୂର୍ଯ୍ୟକୁମାର ଯାଦବ ଓ ଶିବମ ଦୁବେଙ୍କ ଉପଯୋଗୀ ପାଳି ସହାୟତାରେ ଭାରତ ନିର୍ଦ୍ଧାରିତ ୨୦ ଓଭରରେ ୭ ୱିକେଟ୍ ହରାଇ ୧୭୫ ରନ୍ ସଂଗ୍ରହ କରିଛି।
ପ୍ରଥମ ଓଭରରେ ଅଭିଷେକ ଶର୍ମା (୦) ଆଉଟ୍ ହେବା ପରେ ଇଶାନ କିଷାନ ମାତ୍ର ୨୭ ବଲ୍ରେ ଅର୍ଦ୍ଧଶତକ ହାସଲ କରିଥିଲେ। ସେ ମୋଟ ୪୦ ବଲ୍ରୁ ୭୭ ରନ୍ (୧୦ ଚୌକା, ୩ ଛକା) କରି ସାଇମ୍ ଆୟୁବଙ୍କ ବଲ୍ରେ ଆଉଟ୍ ହୋଇଥିଲେ।
ମଧ୍ୟକ୍ରମରେ ୱିକେଟ୍ ପତନ ପରେ ଅଧିନାୟକ ସୂର୍ଯ୍ୟକୁମାର ଯାଦବ (୩୨ ରନ୍, ୨୭ ବଲ୍) ଏବଂ ଶିବମ ଦୁବେ (୧୮ ରନ୍, ୧୨ ବଲ୍) ସ୍ଥିତି ସମ୍ଭାଳିଥିଲେ। ୧୮ତମ ଓଭରରେ ଅବରାର ଅହମ୍ମଦଙ୍କୁ ଗୋଟିଏ ଚୌକା ଓ ଗୋଟିଏ ଛକା ମାରି ଏହି ଯୋଡ଼ି ୧୪ ରନ୍ ଆଦାୟ କରିଥିଲେ।
୧୯ତମ ଓଭରରେ ଉସ୍ମାନ ତାରିକ୍ ମାତ୍ର ୫ ରନ୍ ଦେଇ ସୂର୍ଯ୍ୟକୁମାରଙ୍କ ଗୁରୁତ୍ୱପୂର୍ଣ୍ଣ ୱିକେଟ୍ ନେଇଥିଲେ। ଶେଷ ଦୁଇଟି ବଲ୍ରେ ଶିବମ ଦୁବେ ଓ ଅକ୍ଷର ପଟେଲ ଆଉଟ୍ ହେବା ଫଳରେ ଭାରତ ୧୮୦ ରନ୍ ସୀମା ଅତିକ୍ରମ କରିପାରି ନଥିଲା।
ପାକିସ୍ତାନ ପକ୍ଷରୁ ସାଇମ୍ ଆୟୁବ ସର୍ବାଧିକ ୩ଟି ୱିକେଟ୍ ନେଇଥିବା ବେଳେ ଶାହୀନ ଆଫ୍ରିଦିଙ୍କୁ ଭାରତୀୟ ବ୍ୟାଟରମାନେ ପ୍ରାରମ୍ଭିକ ଓଭରରେ ପ୍ରବଳ ପ୍ରହାର କରିଥିଲେ।
ଏହି ମ୍ୟାଚରେ ମଧ୍ୟ ଟସ୍ ସମୟରେ ଉଭୟ ଦଳର ଅଧିନାୟକ ପରସ୍ପର ସହ ହାତ ମିଳାଇ ନଥିଲେ, ଯାହା ଚର୍ଚ୍ଚାର ବିଷୟ ପାଲଟିଛି। ବର୍ତ୍ତମାନ ପାକିସ୍ତାନକୁ ଜିତିବା ପାଇଁ ହେଲେ ଓଭର ପିଛା ୮.୮ ରନ୍ ହାରରେ ବ୍ୟାଟିଂ କରିବାକୁ ପଡ଼ିବ।
