ମାଲକାନଗିରି,୯ା୧୦(ଡି.ଏନ୍.ଏ.): ମାଲକାନଗିରି ଆଦର୍ଶ ଥାନା ଅଧୀନ ହୁଡୁପା ପଞ୍ଚାୟତ ମଙ୍ଗ ଗ୍ରାମରେ ଶନିବାର ଘଟିଛି ଅଘଟଣ। ସାନଙ୍କୁ ବଞ୍ଚାଇବାକୁ ଉଦ୍ୟମ କରୁଥିଲେ ବଡ଼ ଭଉଣୀ। ଶେଷରେ ୨ ଭଉଣୀ ପାଣିରେ ବୁଡ଼ି ଜୀବନ ହରାଇଛନ୍ତି।
ମିଳିଥିବା ସୂଚନା ମୁତାବକ, ମଙ୍ଗ ଗ୍ରାମର ଓମ୍ ପଡ଼ିଆମି ଓ ତାଙ୍କ ସ୍ତ୍ରୀ କାମକୁ ଯାଇଥିବା ବେଳେ ଝିଅ ରାଜେଶ୍ୱରୀ (୬) ଓ ଶିବାନୀ ( ୩) ଗ୍ରାମ ପୋଖରୀ ହୁଡାରେ ଖେଳୁଥିଲେ। ଏହି ସମୟରେ ହଠାତ୍ ଶିବାନୀ ପୋଖରୀ ଭିତରେ ପଡିଯାଇଥିଲେ। ତାଙ୍କୁ ରକ୍ଷା କରିବାକୁ ଯାଇ ବଡଭଉଣୀ ରାଜେଶ୍ୱରୀ ପୋଖରୀ ଭିତରେ ପଶିଥିଲେ। କିନ୍ତୁ ଉଭୟେ ପାଣିରେ ବୁଡ଼ି ଯାଇଥିଲେ। କିଛି ଲୋକ ଏହା ଦେଖି ପରିବାର ଲୋକଙ୍କୁ ଖବର ଦେଇଥିଲେ। ପରିବାର ଏବଂ ଗ୍ରାମବାସୀ ପୋଖରୀରେ ଖୋଜାଖୋଜି କରି ଦୁଇଭଉଣୀଙ୍କ ମୃତଦେହ ଉଦ୍ଧାର କରି ମାଲକାନଗିରି ଜିଲା ମୁଖ୍ୟ ଚିକିତ୍ସାଳୟକୁ ନେଇଥିଲେ। ସେଠାରେ ଡାକ୍ତର ଉଭୟଙ୍କୁ ମୃତ ଘୋଷଣା କରିଥିଲେ। ଏନେଇ ପରିବାର ଲୋକେ ମାଲକାନଗିରି ଆଦର୍ଶ ଥାନାରେ ଜଣାଇଥିଲେ। ପୋଲିସ ଏକ ମାମଲା ରୁଜୁକରି ମୃତଦେହ ବ୍ୟବଚ୍ଛେଦ ପାଇଁ ପଠାଇଛି।
