ନୂଆଦିଲ୍ଲୀ,୧୨।୯: ଏକ ସମୟ ଥିଲା ଯେତେବେଳେ ଟି-୨୦ କ୍ରିକେଟକୁ ଯୁବ ପ୍ରତିଭାଙ୍କ ଖେଳ ବୋଲି କୁହାଯାଉଥିଲା। ହେଲେ ୨୦୦୭ରେ ଟି-୨୦ ବିଶ୍ୱକପ୍ ଆୟୋଜନ ସହ ବିଶ୍ୱର ପ୍ରତିଟି ଦେଶରେ ଟି-୨୦ ଲିଗ୍ ଆରମ୍ଭ ହେବା ପରେ ଚିତ୍ର ସମ୍ପୂର୍ଣ୍ଣ ବଦଳି ଯାଇଛି।
ଚଳିତ ବର୍ଷ ୟୁଏଇରେ ଭାରତ ପକ୍ଷରୁ ଟି-୨୦ ବିଶ୍ୱକପ୍ ଆୟୋଜିତ ହେବାକୁ ଯାଉଛି। ଏଥର ବିଶ୍ୱକପ୍ ପାଇଁ ଘୋଷିତ ଦଳଗୁଡ଼ିକରେ ବହୁତ ଯୁବ ଖେଳାଳିମାନଙ୍କୁ ଅଗ୍ରାଧିକାର ଦିଆଯାଇଛି। ହେଲେ ଦଳରେ ବୟସ୍କ ଖେଳାଳି ବି ଅଛନ୍ତି। ସେଭଳି ଏକ ଦଳ ହେଲା ଦୁଇଥର ଟି-୨୦ ବିଶ୍ୱକପ୍ ବିଜେତା ଓ୍ବେଷ୍ଟଇଣ୍ଡିଜ୍।
ଓ୍ବେଷ୍ଟଇଣ୍ଡିଜ ଦଳରେ ବହୁ ପୁରାତନ ଖେଳାଳି ଅଂଶଗ୍ରହଣ କରିବେ। ସେଥିରୁ ଜଣେ ହେଲେ ୟୁନିଭର୍ସ ବସ୍ ଭାବେ ପରିଚିତ କ୍ରିସ୍ ଗେଲ୍। ତାଙ୍କ ବ୍ୟତିତ ବ୍ରାଭୋ, ରବି ରାମପାଲ, ଲିଣ୍ଡଲେ ସିମନ୍ସ ପ୍ରମୁଖ ଦଳରେ ସ୍ଥାନ ପାଇଛନ୍ତି।
ଏହି ବିଶ୍ୱକପ୍ ଖେଳିବାକୁ ଗେଲ୍ ଓହ୍ଲାଇବା ମାତ୍ରେ ସବୁଠାରୁ ବୟସ୍କ ଖେଳାଳି ଭାବେ ରେକର୍ଡ କରିବେ। ସେପ୍ଟେମ୍ବର ୨୨୧ରେ ଗେଲ୍କୁ ୪୨ ବର୍ଷ ହେବ। ଦଳ ଘୋଷଣା ହେବା ମାତ୍ରେ ବିଶ୍ୱକପ୍-୨୦୨୧ ବୟସ୍କ ଖେଳାଳିଭାବେ ରେକର୍ଡ କରିଛନ୍ତି। ତାଙ୍କଠାରୁ ଅଧିକ ବୟସର ଖେଳାଳି କୌଣସି ଦଳରେ ନାହାନ୍ତି।
ତେବେ ଗେଲ୍ଙ୍କ ପାଇଁ ଏହା ଅନ୍ତିମ ଟି-୨୦ ବିଶ୍ୱକପ୍ ହୋଇପାରେ। ୨୦୦୭ରୁ ୨୦୧୬ ପର୍ଯ୍ୟନ୍ତ ଖେଳାଯାଇଥିବା ବିଶ୍ୱକପ୍ର ୨୮ ମ୍ୟାଚ୍ର ୨୬ ଇନିଂସରେ ସେ ୧୪୬.୭୩ ଷ୍ଟ୍ରାଇକ୍ ରେଟ୍ ସହ ୯୨୦ ରନ୍ କରିଛନ୍ତି। ବିଶ୍ୱକପ୍ରେ ସେ ଦୁଇଥର ଶତକ ହାସଲ କରିଛନ୍ତି। ଏହି ଟୁର୍ନାମେଣ୍ଟ ଇତିହାସରେ ସର୍ବାଧିକ ରନ୍ କରିଥିବା ତାଲିକାର ଦ୍ୱିତୀୟ ସ୍ଥାନରେ ସେ ଅଛନ୍ତି। ସେ ୬୦ ଛକା ଏବଂ ୭୫ ଚୌକା ମାରିଛନ୍ତି। ପ୍ରଶଂସକମାନେ ମଧ୍ୟ ଏଥର ଗେଲ୍ଙ୍କଠାରୁ ସମାନ ଖେଳ ଆଶା କରୁଛନ୍ତି।
