ନୂଆଦିଲ୍ଲୀ,୧୧।୯: ପାର୍ବଣ ଋତୁ ପୂର୍ବରୁ କେନ୍ଦ୍ର ସରକାର ଖାଇବା ତେଲ ଦର ଉପରୁ ଉତ୍ପାଦନ ଶୁଳ୍କ ହ୍ରାସ କରିଛନ୍ତି। ଉତ୍ପାଦନ ଶୁଳ୍କରେ ଏବେ ୨.୫ ପ୍ରତିଶତ ହ୍ରାସ ହୋଇଛି। ଏହା ପାମ୍ ଅଏଲ୍, ସୋୟା ଅଏଲ୍ ଏବଂ ସନ୍ ଫ୍ଲାଓ୍ବାର ଅଏଲ୍ ଉପରେ ଲାଗୁ ହେବ। ପୂର୍ବରୁ ଅଶୋଧିତ ପାମ୍ ଅଏଲ୍ ଉପରେ ୧୦ ପ୍ରତିଶତ ଏବଂ ସୋୟା ଅଏଲ୍ ଓ ସନ୍ ଫ୍ଲାଓ୍ବାର ଅଏଲ୍ ଉପରେ ୭.୫ ପ୍ରତିଶତର ବେସ୍ ସପୋର୍ଟ ଶୁଳ୍କ ଲଗାଯାଇଥିଲା। ଫଳରେ ଶୁଦ୍ଧ ପାମ୍ ଅଏଲ୍, ସୋୟା ଅଏଲ୍ ଏବଂ ସନ୍ ଫ୍ଲାଓ୍ବାର ଅଏଲ୍ ଉପରେ ବେସ୍ ଉତ୍ପାଦନ ଶୁଳ୍କ ୩୭.୫ ପ୍ରତିଶତ ହୋଇଥିଲା।
ତେବେ ଏବେ ଏହା ୩୨.୫ ପ୍ରତିଶତରେ ପହଞ୍ଚିଛି। ଏବେ ଉତ୍ପାଦନ ଉପରେ ମୋଟ ୨୪.୭୫ ପ୍ରତିଶତ ଶୁଳ୍କ ଲାଗିବ। ଏଥିରେ ୨.୫ ଉତ୍ପାଦନ ଶୁଳ୍କ ସହିତ ଅନ୍ୟ ଟିକସ ସାମିଲ ରହିଛି। ଫଳରେ ଏବେ ପାମ୍ ଅଏଲ୍, ସୋୟା ଅଏଲ୍ ଏବଂ ସନ୍ ଫ୍ଲାଓ୍ବାର ଅଏଲ୍ ଉପରେ ୩୫.୭୫ ପ୍ରତିଶତ ଶୁଳ୍କ ଲାଗୁ ହେବ।
ଖାଇବା ତେଲ ଦର ଏହା ଦ୍ୱାରା କମିଥିବାବେଳେ ରୋଷେଇ ପାଇଁ ବ୍ୟବହୃତ ହେଉଥିବା ଏଲ୍ପିଜି ସିଲିଣ୍ଡର ଦାମ୍ ବଢ଼ିବା ନିଶ୍ଚିତ ହୋଇଛି। ଆଇସିଆଇସିଆଇ ସୁକ୍ୟୁରିଟିଜ୍ ରିପୋର୍ଟ ଅନୁସାରେ ଅକ୍ୱୋବର ସୁଦ୍ଧା ଏଲ୍ପିଜି ସହିତ ସିଏନ୍ଜି ଏବଂ ପିଏନ୍ଜି ଦାମରେ ୧୦ରୁ ୧୧ ପ୍ରତିଶତ ବୃଦ୍ଧି ହେବ।
