ଗୋଲାମୁଣ୍ଡା,୨୧।୭(ଡି.ଏନ୍.ଏ.): ଭିଜିଲାନ୍ସ ଜାଲରେ ପୋଲିସ ସବ୍ ଇନ୍ସପେକ୍ଟର। କଳାହାଣ୍ଡି ଜିଲା ଗୋଳାମୁଣ୍ଡା ଏସ୍ଆଇ ଉଗ୍ରସେନ ପଟେଲଙ୍କୁ ଭିଜିଲାନ୍ସ ଅଧିକାରୀ ଅଟକ ରଖି ପଚରାଉଚୁରା କରୁଛନ୍ତି।
ମିଳିଥିବା ସୂଚନା ମୁତାବକ, ଗୋଲାମୁଣ୍ଡାସ୍ଥିତ ଏକ ଚା ଦୋକାନରେ ଏସ୍ଆଇ ଉଗ୍ରସେନ ଚା’ ପିଉଥିଲେ। ସେତିକିବେଳେ ଏକ ଭିଜିଲାନ୍ସର ଏକ ଟିମ୍ ଚା’ ଦୋକାନରେ ପହଞ୍ଚି ଏସ୍ଆଇ ଉଗ୍ରସେନଙ୍କୁ କାବୁକରି ନେଇଥିଲେ। ଅଧିକାରୀମାନେ ଯାଞ୍ଚ ବେଳେ ତାଙ୍କ ବାଇକ୍ ଡିକିରୁ ୨ଲକ୍ଷ ଟଙ୍କା ମିଳିଥିଲା। ପରେ ଅଧିକାରୀମାନେ ଏସ୍ଆଇ ଉଗ୍ରସେନଙ୍କୁ ଗୋଲାମୁଣ୍ଡା ଥାନାକୁ ନେଇ ପଚରାଉଚୁରା କରିଥିଲେ। ହେଲେ ଏସ୍ଆଇ ଉଗ୍ରସେନ ଟଙ୍କା ବିଷୟରେ କୌଣସି ଉତ୍ତର ଦେଇପାରି ନ ଥିଲେ। ପରେ ତାଙ୍କୁ ଭବାନୀପାଟଣା ଭିଜିଲାନ୍ସ କାର୍ଯାଳୟକୁ ନିଆଯାଇଥିଲା।
ଏପରି କି, ଭିଜିଲାନ୍ସ ଟିମ୍ ତାଙ୍କ ପୈତୃକ ବାସଭନ ବଲାଙ୍ଗୀର ଜିଲା ସଇଁତଲା ଥାନା ଡଙ୍ଗରମୁଣ୍ଡା ଗାଁରେ ଚଢାଉ ଜାରି ରଖିଛି । ଭିଜିଲାନ୍ସ ଇନ୍ସପେକ୍ଟର କଳାବତୀ ବାଗଙ୍କ ନେତୃତ୍ୱରେ ଅଜିତ ପାଢୀ, ମାଳକାନଗିରି ଡିଏସ୍ପି ଶୁସାନ୍ତ କୁମାର ବିଶ୍ବାଳ, ନୂଆପଡ଼ା ଭିଜିଲାନ୍ସ ଇନ୍ସପେକ୍ଟର ଦୀନବନ୍ଧୁ ବେହେରା, କଳାହାଣ୍ଡି ଡିଏସ୍ପି ସତ୍ୟବାନ ମହାନନ୍ଦ, ପ୍ରମିଳା ସୁନାନୀ ପ୍ରମୁଖ ଏହି ଚଢାଉ ଟିମ୍ରେ ସାମିଲ ଥିଲେ।
