ନୂଆଦିଲ୍ଲୀ: ଆଲୁମିନିୟମ୍ ଉତ୍ପାଦନ ପାଇଁ ବ୍ୟବହୃତ ହେଉଥିବା କଞ୍ଚାମାଲ ବକ୍ସାଇଟ୍ ଆମଦାନୀ ଯୋଗୁ ଭାରତ ବୃହତ୍ତ ପରିମାଣର ବିଦେଶୀ ମୁଦ୍ରା କ୍ଷତି ସହୁଛି। ୨୦୨୧ ଆର୍ଥିକ ବର୍ଷର ପ୍ରଥମ ତ୍ରୈୟମାସରେ ଏଥିଯୋଗୁ ୫୧.୯୭ ନିୟୁତ ଡଲାର(୩୯୦ କୋଟି ଟଙ୍କା)ର କ୍ଷତି ହୋଇଥିବା ଇଣ୍ଡିଆନ ଇଣ୍ଡଷ୍ଟ୍ର୍ରିଆଲ ଭାଲ୍ୟୁ ଚେନ୍ କଲେକ୍ଟିଭ (ଆଇଆଇଭିସିସି) ପକ୍ଷରୁ ଏକ ରିପୋର୍ଟ ପ୍ରକାଶ ପାଇଛି। ଏହାଦ୍ୱାରା ଉତ୍ତୋଳନ, ପରିବହନ, ପ୍ରକ୍ରିୟାକରଣ ଏବଂ ବକ୍ସାଇଟ୍ ଯୋଗାଣ ତଥା ଶେଷ ଉପତ୍ାଦ ପ୍ରସ୍ତୁତିରେ ବିସ୍ତୃତ ପରିମାଣର ଭାଲ୍ୟୁଚେନ୍ ଉପଲବ୍ଧ ହୋଇପାରିଥାନ୍ତା। ଏହି ଅବସରରେ ଆଇଆଇଭିସିସିର ସଦସ୍ୟ ତଥା ପବ୍ଲିକ୍ ରେସପନ୍ସ ଏଗନେଷ୍ଟ୍ ହେଲ୍ପଲେସ୍ ଆଣ୍ଡ୍ ଆକ୍ସନ ଫର୍ ରିଡ୍ରେସାଲ୍(ପିଆର୍ଏଏଚ୍ଏଆର୍)ର ସଭାପତି ଅଭୟରାଜ ମିଶ୍ର କହିଛନ୍ତି, କୌଣସି ଅଞ୍ଚଳର ପ୍ରାକୃତିକ ସମ୍ପଦର ସୁବିନିଯୋଗ ଏହାର ସାମାଜିକ ଆର୍ଥିକ ବିକାଶ କ୍ଷେତ୍ରରେ ହେବା ଆବଶ୍ୟକ। ଏପରିସ୍ଥଳେ ଭାରତ ପୃଥିବୀର ପଞ୍ଚମ ବୃହତ୍ ବକ୍ସାଇଟ୍ ଗଚ୍ଛିତ ଥିବା ଦେଶର ମାନ୍ୟତା ହାସଲ କରିଛି।
ଓଡ଼ିଶାରେ ୫୦ ପ୍ରତିଶତ ବକ୍ସାଇଟ୍ ସମ୍ପଦ ମହଜୁଦ୍ ଥିଲେ ମଧ୍ୟ ବାହାର ଦେଶରୁ ଏହା ଲଗାତର ଆମଦାନୀ ଦ୍ୱାରା ଗତ ୬ ବର୍ଷ ମଧ୍ୟରେ ଦେଶ ୫୭୧ ନିୟୁତ ଡଲାର (୪,୪୦୦କୋଟି ଟଙ୍କା)ର ବିଦେଶୀ ମୁଦ୍ରାର କ୍ଷତି ସହିଛି। ଭାରତରେ ୩.୮ ବିଲିୟନ୍ ଟନ୍ ବକ୍ସାଇଟ୍ ଗଚ୍ଛିତ ଥିଲେ ମଧ୍ୟ ଚାହିଦା ପୂରଣ ପାଇଁ ବାହାର ଦେଶରୁ ଏହା ଆମଦାନୀ କରାଯାଉଛି। ଦେଶରେ ଗୋଟିଏ ବକ୍ସାଇଟ୍ ଖଣି ନିଲାମ କରାଗଲେ ୫ ହଜାର କୋଟିର ରାଜସ୍ବ ସଂଗ୍ରହ ହେବା ସହିତ ୧୦ ହଜାରରୁ ଅଧିକ ଲୋକଙ୍କ ପାଇଁ ନିଯୁକ୍ତି ସୁଯୋଗ ହୋଇପାରିବ। ଏହାଦ୍ୱାରା ସାମାଜିକ ଆର୍ଥିକ ବିକାଶ ସମ୍ଭବ ହୋଇପାରିବ। ଭାରତ ବକ୍ସାଇଟ୍ ଆମଦାନୀ ଯୋଗୁ ବିପୁଳ ପରିମାଣର ବିଦେଶୀ ମୁଦ୍ରା ହରାଉଛି। ଭାରତ ସରକାରଙ୍କ ବାଣିଜ୍ୟ ମନ୍ତ୍ରଣାଳୟ ଦ୍ୱାରା ପ୍ରକାଶିତ ହୋଇଥିବା ଇମ୍ପୋର୍ଟ-ଏକ୍ସପୋର୍ଟ ଡାଟାବ୍ୟାଙ୍କ ଅନୁସାରେ ଗତ ୬ ବର୍ଷ ମଧ୍ୟରେ ବକ୍ସାଇଟ୍ ଆମଦାନୀ ୩୦୦ ପ୍ରତିଶତ ବୃଦ୍ଧି ହୋଇଥିବା ରିପୋର୍ଟରେ ପ୍ରକାଶ ପାଇଛି।
