ପ୍ୟାରିସ୍,୨୭ା୬: କରୋନାରୁ ସୁସ୍ଥ ହେବା ପରେ ଯଦି ସ୍ବାଦ ଏବଂ ଗନ୍ଧ ବାରି ନ ହୁଏ ତେବେ ଏହା ଫେରିବାକୁ ୧ ବର୍ଷ ଲାଗିପାରେ ବୋଲି ଏକ ନୂତନ ଅନୁସନ୍ଧାନରୁ ଜଣାପଡ଼ିଛି। କରୋନା ଭାଇରସକୁ ୨୦୨୦ ଆରମ୍ଭରେ ମହାମାରୀ ଘୋଷଣା କରାଯାଇଥିଲା। ଗନ୍ଧ ହରାଇବା ବ୍ୟକ୍ତିଙ୍କ ଜୀବନଶୈଳୀକୁ ଏହା ବିଶେଷ ଭାବରେ ପ୍ରଭାବିତ କରିଥାଏ। ଫଳରେ ଖାଦ୍ୟର ସ୍ବାଦ ଚାଖିବା, ପରିବେଶରେ ବାୟୁବାହକ ବିପଦ ଚିହ୍ନଟ କରିବା ଏବଂ ଇନ୍ଦ୍ରିୟ ଉପରେ ନିର୍ଭରଶୀଳ ଅନ୍ୟାନ୍ୟ କାର୍ଯ୍ୟ କରିବା ଅତ୍ୟନ୍ତ କଷ୍ଟକର ହୋଇଥାଏ।
ଫ୍ରାନ୍ସର ଷ୍ଟ୍ରାସବର୍ଗର ୟୁନିଭର୍ସିଟି ହସ୍ପିଟାଲର ଅନୁସନ୍ଧାନକାରୀମାନେ ୯୭ ଜଣଙ୍କୁ ନେଇ ଏକ ଅଧ୍ୟୟନ କରିଥିଲେ। ଯେଉଁମାନେ କରୋନାରେ ଆକ୍ରାନ୍ତ ହେବା ପରେ ସେମାନଙ୍କର ଗନ୍ଧ ଏବଂ ସ୍ବାଦ ହରାଇଥିଲେ। ଏହି ସମସ୍ୟା ସେମାନଙ୍କ ମଧ୍ୟରେ ଏକ ବର୍ଷ ପର୍ଯ୍ୟନ୍ତ ଦେଖାଗଲା। ଅଧ୍ୟୟନ ସମୟରେ, ଏହି ଲୋକମାନଙ୍କୁ ପ୍ରତି ୪ ମାସରେ ଏକ ସର୍ଭେ କରିବାକୁ କୁହାଯାଇଥିଲା। ଏଥିମଧ୍ୟରୁ ୫୧ ଜଣ ପ୍ରତି ଚାରି ମାସରେ କରାଯାଇଥିବା ସର୍ଭେରେ ଅଂଶଗ୍ରହଣ କରିଥିବାବେଳେ ଅବଶିଷ୍ଟ ୪୬ ଜଣ ପୂରା ବର୍ଷ ପରେ ସମ୍ପୂର୍ଣ୍ଣ ସୁସ୍ଥ ହେବା ପରେ ଏହା ଜଣାଇଥିଲେ। ୮ ମାସ ପରେ ୫୧ଟି ମଧ୍ୟରୁ ୪୯ ଜଣ ସୁସ୍ଥ ହୋଇଥିବାବେଳେ ଅବଶିଷ୍ଟ ଦୁଇ ରୋଗୀଙ୍କ ମଧ୍ୟରୁ ଜଣେ ଅସ୍ବାଭାବିକ ଭାବରେ ଗନ୍ଧ ଚିହ୍ନଟ କରିବାରେ ସକ୍ଷମ ହୋଇଥିବାବେଳେ ଅନ୍ୟଜଣକ ଅଧ୍ୟୟନ ଶେଷ ସୁଦ୍ଧା ଗନ୍ଧ ବାରିବାରେ ସକ୍ଷମ ହୋଇ ନ ଥିଲେ।
ବିଶେଷଜ୍ଞମାନେ କହିଛନ୍ତି ଯେ, କରୋନା ସଂକ୍ରମଣ ପରେ ପୋଷ୍ଟ-କୋଭିଡ୍ ସମସ୍ୟା ରୋଗୀଙ୍କୁ ଘାରିଛି। ଏହାକୁ ରୋକିବା ପାଇଁ କିଛି କଥା ପ୍ରତି ଗୁରତ୍ୱ ଦେବା ଆବଶ୍ୟକ। ରୋଗୀ ଅଧିକ ଚାପଗ୍ରସ୍ତ ହେବା ଉଚିତ୍ ନୁହେଁ। ନିତ୍ୟ ବ୍ୟବହାର୍ଯ୍ୟ ଖାଦ୍ୟରେ ଅଧିକ ପାନୀୟ ସାମିଲ କରନ୍ତୁ। ଏହି ସମୟରେ, ଇଣ୍ଟରନେଟ୍ ଏବଂ ନ୍ୟୁଜ୍ ଚ୍ୟାନେଲରେ କରୋନା ସମ୍ବନ୍ଧୀୟ ସୂଚନା ପଢ଼ନ୍ତୁ ନାହିଁ କିମ୍ବା ଦେଖନ୍ତୁ ନାହିଁ। କେବଳ ବୈଜ୍ଞାନିକଙ୍କ ସୂଚନା ରଖନ୍ତୁ। ଅଧିକ ଚାପ ନିଅନ୍ତୁ ନାହିଁ। ବିଶେଷଜ୍ଞଙ୍କ ଅନୁଯାୟୀ, କରୋନା ସଂକ୍ରମଣରୁ ମୁକ୍ତି ପାଇଥିବା ରୋଗୀଙ୍କୁ ସାଧାରଣ ଜନତା ମଧ୍ୟ ସମ୍ପୂର୍ଣ୍ଣ ସହଯୋଗ କରିବା ଉଚିତ୍। ଯଦି ଏହି ସବୁର ଯତ୍ନ ନିଆଯାଏ ତେବେ ରୋଗୀମାନେ କରୋନାକୁ ମାତ୍ ଦେବାରେ ସମ୍ପୂର୍ଣ୍ଣ ସକ୍ଷମ ହେବେ।
