ବମ୍ବେ: ବଲିଉଡ୍ ଅଭିନେତ୍ରୀ ଶିଳ୍ପା ସେଟ୍ଟୀ ୨୦୦୯ରେ ବିବାହ କରିଥିଲେ। ସେ ବ୍ୟବସାୟୀ ରାଜ କୁନ୍ଦ୍ରାଙ୍କ ହାତ ଧରିଥିଲେ। ବିବାହ ପୂର୍ବରୁ ରାଜ ବିବାହିତ ଥିଲେ ହେଁ ପ୍ରଥମ ସ୍ତ୍ରୀ କବିତାଙ୍କୁ ଛାଡ଼ପତ୍ର ଦେଇ ଶିଳ୍ପାଙ୍କୁ ଜୀବନସାଥୀ କରିଥିଲେ ସେ। ସେତେବେଳେ ଶିଳ୍ପାଙ୍କ ପାଇଁ ଉଭୟଙ୍କ ବିବାହ ବିଚ୍ଛେଦ ହୋଇଥିବା ନେଇ ଚର୍ଚ୍ଚା ହୋଇଥିଲା। ଏବେ ଛାଡ଼ପତ୍ରର ୧୧ ବର୍ଷ ପରେ ମୁହଁ ଖୋଲିଛନ୍ତି ରାଜ। ଛାଡ଼ପତ୍ର ପାଇଁ ଶିଳ୍ପା ନୁହନ୍ତି ବରଂ ପ୍ରଥମ ସ୍ତ୍ରୀ ହିଁ ଦାୟୀ ବୋଲି ସଫାସଫା କହିଛନ୍ତି ସେ। କୋଟି କୋଟି ଟଙ୍କା ଖର୍ଚ୍ଚ କରି କବିତା ଶିଳ୍ପାଙ୍କ ନାମରେ ଏଣୁତେଣୁ ଛାପିଥିଲେ। ଫଳରେ ଲୋକେ ଶିଳ୍ପାଙ୍କୁ ଦୋଷୀ ବୋଲି ମନେ କରିଥିଲେ ବୋଲି ସେ ସ୍ପଷ୍ଟ କରିଛନ୍ତି।
ଏକ ସାକ୍ଷାତକାରରେ ରାଜ ମନକଥା କହି ପ୍ରଥମ ସ୍ତ୍ରୀ କବିତାଙ୍କୁ କାଠଗଡ଼ାକୁ ଆଣିଛନ୍ତି। କବିତା ରାଜଙ୍କ ଭଉଣୀଙ୍କ ସ୍ବାମୀଙ୍କ ସହ ଅନୈତିକ ସମ୍ପର୍କ ରଖିଥିଲେ। ଅନେକ ଥର ଆପତ୍ତିଜନକ ଅବସ୍ଥାରେ ଉଭୟଙ୍କୁ ରାଜଙ୍କ ମା’ ଧରିଥିଲେ। ଗୋଟିଏ ଘରେ ରହୁଥିବା ଯୋଗୁ କଥା ଧରା ପଡ଼ିଯାଇଥିଲା।
ରାଜଙ୍କ ଭଉଣୀ ଓ ଭିଣୋଇ ବ୍ରିଟେନ୍ରେ ରହିବାକୁ ଚାଲିଯାଇଥିଲେ। ହେଲେ ସେତେବେଳକୁ କବିତା ଭିଣୋଇଙ୍କ ବେଶ୍ ନିକଟତର ହୋଇଯାଇଥିଲେ। ରାଜ ବ୍ୟବସାୟ କାମରେ ବାହାରକୁ ଚାଲିଗଲେ ଉଭୟଙ୍କୁ ସମୟ ବିତାଇବାକୁ ମଉକା ମିଳିଯାଉଥିଲା। ଘରର ସଦସ୍ୟଙ୍କ ସହ ଡ୍ରାଇଭର ମଧ୍ୟ ଉଭୟଙ୍କ ସମ୍ପର୍କ ଆଗକୁ ବଢ଼ିଯାଇଥିବା ସନ୍ଦେହ କରୁଥିଲେ। ସେତେବେଳେ ରାଜ ଯଥାସମ୍ଭବ ସମ୍ପର୍କ ବଞ୍ଚାଇବାକୁ ଚେଷ୍ଟା କରିଥିଲେ ହେଁ ପାରି ନ ଥିଲେ।
ଏକଦା ରାଜଙ୍କୁ ତାଙ୍କ ଭଉଣୀ କାନ୍ଦି କାନ୍ଦି ଫୋନ୍ କରିଥିଲେ। କାରଣ ପଚାରିବାରୁ ତାଙ୍କୁ ସ୍ବାମୀଙ୍କ ଅନ୍ୟ ଏକ ଫୋନ ମିଳିଥିବା ଏବଂ ସେଥିରେ ସେ ଅନ୍ୟଜଣେ ଯୁବତୀଙ୍କ ସହ ଅତି ବ୍ୟକ୍ତିଗତ କଥା ହେଉଥିବା ସେ ଜାଣିବାକୁ ପାଇଥିବା କହିଥିଲେ। ରାଜ ଉକ୍ତ ନମ୍ବରକୁ ଯାଞ୍ଚ କରିବା ପରେ ତାହା ଘର ପାଖ ଟାଓ୍ବାର ସହ ଜଡ଼ିତ ଥିବା ଜଣାପଡ଼ିଥିଲା। ପରେ କବିତାଙ୍କ ଫୋନ୍ ଯାଞ୍ଚ କରି ଉଭୟଙ୍କ ଭିତରେ ସବୁ ଚାଟିଂକୁ ରାଜ ପଢ଼ିଥିଲେ। ଶେଷରେ ଦୁଇ ପରିବାରରେ ଫାଟ ସୃଷ୍ଟି ହୋଇଥିଲା। ରାଜ କବିତାଙ୍କଠାରୁ ଅଲଗା ହୋଇଥିବା ବେଳେ ରାଜଙ୍କ ଭଉଣୀ ମଧ୍ୟ ତାଙ୍କ ସ୍ବାମୀଙ୍କଠାରୁ ଅଲଗା ହୋଇଯାଇଥିଲେ।
