କରୋନା ମହାମାରୀ ସମୟରେ ଲୋକେ ବାହାରକୁ ଯିବା ପାଇଁ ଡରୁଥିବାରୁ ଅନ୍ଲାଇନ୍ରେ ବିଭିନ୍ନ ସାମଗ୍ରୀ ମଗାଉଛନ୍ତି। ଏମିତି ମୁମ୍ବାଇର ଜଣେ ଯୁବକ ଆମାଜନରେ ୪୦୦ ଟଙ୍କାର ମାଉଥ୍ଓ୍ବାଶ ଅର୍ଡର କରିଥିଲେ। ମାତ୍ର ଯେତେବେଳେ ଏହା ଡେଲିଭରୀ ହେଲା ସେତେବେଳେ ପ୍ୟାକେଟ୍ ଖୋଲିବା ପରେ ତାଙ୍କ ହୋସ୍ ଉଡ଼ିଗଲା। କାରଣ ମାଉଥ୍ଓ୍ବାଶ ବଦଳରେ ରେଡ୍ମୀ ବ୍ରାଣ୍ଡ୍ର ଏକ ସ୍ମାର୍ଟଫୋନ୍ ତାଙ୍କୁ ମିଳିଥିଲା। ଏ ବିଷୟରେ ସେ ସୋସିଆଲ ମିଡିଆ ଜରିଆରେ ସୂଚନା ଦେଇଛନ୍ତି।
ଏହା ପରେ କମ୍ପାନୀର ସହସଂସ୍ଥାପକ ଲୋକେଶ ଡାଗା କହିଛନ୍ତି, ସେ କେବଳ ମାଉଥ୍ଓ୍ବାଶ ଅର୍ଡର କରିଥିଲେ। ମାତ୍ର ଆମାଜନ ଇଣ୍ଡିଆ ତାଙ୍କୁ ଏକ ସ୍ମାର୍ଟଫୋନ୍ ପଠାଇଥିଲା। ଲୋକେଶ କହିଛନ୍ତି, ଡେଲିଭରୀ କରାଯାଇଥିବା ସାମଗ୍ରୀ ପ୍ୟାକେଟ ଲେବଲ ଉପରେ ତାଙ୍କ ନାଁ ଥିଲା। ମାତ୍ର ଚାଲାଣ ଅନ୍ୟ କାହା ନାଁରେ କଟାଯାଇଛି।
ସେ କହିଛନ୍ତି, ଆମାଜର ଭୁଲ ଯୋଗୁ ରେଡ୍ମୀ-୧୦ ସ୍ମାର୍ଟଫୋନ୍ ଚାଲିଯାଇଛି। ଏହି ଫୋନ୍ର ଦାମ୍ ୧୩୦୦୦ ଟଙ୍କା। ମାଉଥ୍ଓ୍ବାର୍ଶ ମଗାଇଥିବା ଯୁବକ ଜଣକ ମୋବାଇଲ ପାଇଥିବା ବିଷୟରେ ସୋସିଆଲ ମିଡିଆ ଜରିଆରେ ଆମାଜନକୁ ସୂଚନା ଦେଇଥିଲେ। ତାଙ୍କର ଏହି ଟୁଇଟ୍ ଉପରେ ଲୋକେ ନାନା ପ୍ରତିକ୍ରିୟା ଦେଉଛନ୍ତି।
ଜଣେ ୟୁଜର ଲେଖିଛନ୍ତି, ସ୍ମାର୍ଟଫୋନ୍ ରଖିଦିଅନ୍ତୁ। ପଡ଼ୋଶୀଙ୍କ ନାଁରେ ମାଉଥ୍ଓ୍ବାର୍ଶ ମଗାଇ ନିଅନ୍ତୁ। ସେହିପରି ଆଉ ଜଣେ ୟୁଜର ଲେଖିଛନ୍ତି, ଲୋକେଶ ଡାଗାଙ୍କ ଭଲ ପ୍ରୟାସ। ମାତ୍ର ଆଶ୍ଚର୍ଯ୍ୟର କଥା ଏହି ବ୍ୟକ୍ତିଙ୍କର ଏବେ ହେବ କ’ଣ। ଯିଏ ସ୍ମାର୍ଟଫୋନ୍ ପାଇଁ ଅର୍ଡର କରି ମାଉଥ୍ଓ୍ବାଶ୍ ପାଇଥିବେ। ଏହି ଘଟଣାକୁ ନେଇ ଟୁଇଟ୍ରରେ ଖୁବ୍ ଚର୍ଚ୍ଚା ହେଉଛି। ଲୋକେ ଏହାକୁ ମଜାଳିଆ ଢଙ୍ଗରେ ଶେୟାର ବି କରୁଛନ୍ତି।
