ନୂଆଦିଲ୍ଲୀ, ୧୪ା୫(ପି.ଟି.)-ବେଙ୍ଗାଲୁରୁସ୍ଥିତ ସ୍ପୋଟର୍ସ ଅଥରିଟି ଅଫ୍ ଇଣ୍ଡିଆ (ସାଇ)ର ସେଣ୍ଟର ଅଫ୍ ଏକ୍ସଲେନ୍ସଠାରେ ୫ଜଣ ଆଗଧାଡ଼ି ଆଥ୍ଲେଟ କରୋନା ପଜିଟିଭ ଚିହ୍ନଟ ହୋଇଛନ୍ତି। ସେମାନଙ୍କ ମଧ୍ୟରେ ଅଲିମ୍ପିକ ଯୋଗ୍ୟତା ହାସଲ କରିଥିବା ରେସ୍ ଓ୍ବାକର କେ.ଟି. ଇର୍ଫାନ ଅନ୍ୟତମ। ସମସ୍ତଙ୍କୁ କ୍ୱାରାଣ୍ଟାଇନ୍ରେ ରଖାଯାଇଛି। ଖବର ଅନୁସାରେ ଜଣେ ରେସ୍ ଓ୍ବାକର ମଧ୍ୟ କରୋନା ସଂକ୍ରମିତ ହୋଇଛନ୍ତି। ହେଲେ ଏନେଇ ବିଧିବଦ୍ଧ ଘୋଷଣା କରାଯାଇ ନାହିଁ। ସାଇ ପକ୍ଷରୁ ଦିଆଯାଇଥିବା ସୂଚନା ଅନୁସାରେ ୪ ପୁରୁଷ, ଜଣେ ମହିଳା ଖେଳାଳି ଓ ୪ ସପୋର୍ଟ ଷ୍ଟାଫ୍ କରୋନା ପଜିଟିଭ ଚିହ୍ନଟ ହୋଇଛନ୍ତି। ମହିଳା ଖେଳାଳି ଜଣକ ନିଜ ଘରୁ ଫେରିଥିଲେ। ଖେଳାଳିମାନଙ୍କର ଗତ ୬ ତାରିଖରେ ଟେଷ୍ଟ ହୋଇଥିଲା। ୭ ତାରିଖରେ ଫଳାଫଳ ପ୍ରକାଶ ପାଇଥିଲା। ସେମାନେ ସେମାନଙ୍କ ପ୍ରଥମ କରୋନା ଟିକା ଏପ୍ରିଲ ୨୯ରେ ନେଇଥିଲେ। ଜଣେ ପୁରୁଷ ଓ ମହିଳା ଖେଳାଳି ଟିକା ନେଇ ନ ଥିଲେ। ସେମାନଙ୍କର ୧୦ ତାରିଖରେ ଟେଷ୍ଟ ହୋଇଛି। ଫଳାଫଳ ଶୁକ୍ରବାର ପ୍ରକାଶ ପାଇବ। କରୋନା ପଜିଟିଭଙ୍କ ମଧ୍ୟରେ କେହି ମହିଳା ରେସ୍ ଓ୍ବାକର ନାହାନ୍ତି। ୩୧ ପର୍ଷୀୟ ଇର୍ଫାନ ୨୦୧୯ ପ୍ରାରମ୍ଭରେ ଟୋକିଓ ଅଲିମ୍ପିକ୍ସ ପାଇଁ ଯୋଗ୍ୟତା ଅର୍ଜନ କରିଥିଲେ। ଜାପାନର ନୋମିଠାରେ ଅନୁଷ୍ଠିତ ଏସିଆନ ରେସ୍ ଓ୍ବାକିଂ ଚାମ୍ପିୟନଶିପ୍ରେ ୨୦ କିମି ଇଭେଣ୍ଟରେ ଚତୁର୍ଥ ହୋଇଥିଲେ। ଗତ ମାସରେ ଏଠାରେ ଭାରତୀୟ ଆଥ୍ଲେଟ୍ମାନେ ଟ୍ରେନିଂ ନେଉଥିବାବେଳେ ଅଲିମ୍ପିକ ଯୋଗ୍ୟତା ହାସଲ କରିଥିବା ପ୍ରିୟଙ୍କା ଗୋସ୍ବାମୀ, ଏସିଆନ ଗେମ୍ସ ୧୫୦୦ମିଟର ସ୍ବର୍ଣ୍ଣ ବିଜେତା ଜିନ୍ସନ ଜନସନ, ଲଙ୍ଗ ଡିଷ୍ଟାନ୍ସ ରନର ପାରୁଲ ଚୌଧାରୀ, ଷ୍ଟିପଲ ଚେଜର ଚିନ୍ତା ଯାଦବ ଏବଂ ଅନ୍ୟ ଜଣେ ରେସ୍ ଓ୍ବାକର ଏକନାଥ ଏହି ମାରାତ୍ମକ ଭୂତାଣୁର ଶିକାର ହୋଇଥିଲେ। ସେ ସମୟରେ ରଷିଆନ ରେସ୍ ଓ୍ବାକର ଆଲେକ୍ଜାଣ୍ଡର ଆର୍ଟସିବାସେଭ୍ କରୋନା ପଜିଟିଭ ଚିହ୍ନଟ ହୋଇଥିଲେ। ସେତେବେଳେ ଜନସନଙ୍କ ସହ ଅଧିକ ମିଳାମିଶା କରୁଥିଲେ ମଧ୍ୟ ଜନସନଙ୍କର ନେଗେଟିଭ ଆସିଥିଲା। ଏହି ସାଇ ସେଣ୍ଟର ଉଭୟ ମହିଳା ଓ ପୁରୁଷ ହକିି ଦଳ ଏବଂ ଦୌଡ଼କୁଦ ଆଥ୍ଲେଟମାନଙ୍କ ଟ୍ରେନିଂ ସ୍ଥଳ। ନିକଟରେ ଭାରତୀୟ ମହିଳା ହକି ଦଳର ଅଧିନାୟିକା ରାଣୀ ରାମପାଲ, ତାଙ୍କର ୬ ସାଥୀ ଖେଳାଳି ଏବଂ ୨ ସପୋର୍ଟ ଷ୍ଟାଫ୍ କରୋନା ସଂକ୍ରମିତ ହୋଇଥିଲେ। ଦୁଇ ସପ୍ତାହ ଧରି କ୍ୱାରାଣ୍ଟାଇନ୍ରେ ରହିବା ପରେ ସେମାନେ ସୁସ୍ଥ ହୋଇ ଫେରିଛନ୍ତି।
