ନୂଆଦିଲ୍ଲୀ, ୧।୫(ପି.ଟି.)-
ଦେଶରେ କୋଭିଡ୍-୧୯ ସଂକ୍ରମଣ ବଢ଼ୁଥିଲେ ହେଁ ଆସନ୍ତା ଅକ୍ଟୋବରରେ ହେବାକୁଥିବା ଟି୨୦ କ୍ରିକେଟ ବିଶ୍ୱକପ ନିର୍ଦ୍ଧାରିତ କାର୍ଯ୍ୟସୂଚୀ ଅନୁସାରେ ହେବାନେଇ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ଦୃଢ଼ ଆଶାବାଦୀ। ତେବେ ପୂର୍ବରୁ ଏହା ୯ଟି ଭେନ୍ୟୁରେ ହେବାକୁ ଥିବାବେଳେ ଏବେ ଏହି ସଂଖ୍ୟା ୫କୁ କମାଇ ଦେବାକୁ ଚିନ୍ତା କରାଯାଉଛି। ତେବେ ପରିସ୍ଥିତିକୁ ଦୃଷ୍ଟିରେ ରଖି ଅନ୍ତର୍ଜାତୀୟ କ୍ରିକେଟ କାଉନ୍ସିଲ (ଆଇସିସି) ଗତ ୧ ବର୍ଷ ହେଲା ୟୁଏଇକୁ ବ୍ୟାକ୍ଅପ୍ ଭେନ୍ୟୁ ଭାବେ ପ୍ରସ୍ତୁତ ରଖିଛି। ବର୍ତ୍ତମାନ ଇଣ୍ଡିଆନ ପ୍ରିମିୟର ଲିଗ୍ ବିଭିନ୍ନ ବାୟୋ-ବବ୍ଲ ପରିବେଶରେ ଅନୁଷ୍ଠିତ ହେଉଛି। ମାତ୍ର ଆଇସିସି ଟୁର୍ନାମେଣ୍ଟ ଅବସରରେ ବିସିସିଆଇ ବଡ଼ ପରୀକ୍ଷାର ସମ୍ମୁଖୀନ ହେବ। ” ପ୍ରତିଯୋଗିତା ହେବା ପାଇଁ ୫ ମାସ ଥିବାରୁ ଦେଶର ଅନେକ ଲୋକ ଟିକା ନେଇ ସାରିଥିବେ। ତେଣୁ ଆମେ ଟି୨୦ ବିଶ୍ୱକପ ଆୟୋଜନ କରିବାନେଇ ଏବେ ମଧ୍ୟ ଆଶାବାଦୀ ଅଛୁ। ତେବେ ଭେନ୍ୟୁ ସଂଖ୍ୟା କାଟଛାଣ୍ଟ କରାଯାଇ ୫ରେ ସୀମିତ ରଖାଯିବ“ ବୋଲି ଜଣେ ସିନିୟର ବିସିସିଆଇ କର୍ମକର୍ତ୍ତା ପ୍ରକାଶ କରିଛନ୍ତି। ଏକ ଆଇସିସି ଟିମ୍ ଏପ୍ରିଲ ୨୬ରେ ଦିଲ୍ଲୀ ଆସି ଆଇପିଏଲ ପାଇଁ ହୋଇଥିବା ଜୈବ-ସୁରକ୍ଷିତ ବ୍ୟବସ୍ଥାକୁ ଅନୁଧ୍ୟାନ କରିବାର ଥିଲା। ମାତ୍ର ବିମାନ ବାତିଲ ଯୋଗୁ ଏହାକୁ ସ୍ଥଗିତ ରଖାଯାଇଛି। ସ୍ଥିତି ସ୍ବାଭାବିକ ହେଲେ ସେମାନେ ଆସି ବ୍ୟବସ୍ଥାର ଅନୁଧ୍ୟାନ କରିବେ ବୋଲି ଉକ୍ତ ବିସିସିଆଇ କର୍ମକର୍ତ୍ତା କହିଛନ୍ତି।
ୟୁଏଇକୁ ବ୍ୟାକ୍ଅପ୍ ଭେନ୍ୟୁ ରଖାଯାଇଛି ବୋଲି ବିସିସିଆଇର ଜେନେରାଲ ମ୍ୟାନେଜର (ଗେମ୍ ଡେଭ୍ଲପ୍ମେଣ୍ଟ) ଧୀରଜ ମାଲହୋତ୍ରା ପ୍ରକାଶ କରିଛନ୍ତି। ନିୟମ ଅନୁସାରେ ୟୁଏଇକୁ ସବୁବେଳେ ଦ୍ୱିତୀୟ ପସନ୍ଦ ଭେନ୍ୟୁ ରଖାଯାଇଥାଏ ବୋଲି ଅନ୍ୟ ଜଣେ କର୍ମକର୍ତ୍ତା କହିଛନ୍ତି। ସାଧାରଣତଃ ଶ୍ରୀଲଙ୍କା ଏବଂ ବାଂଲାଦେଶ ପରି ଦେଶରେ ଆଇସିସି ଟି୨୦ ବିଶ୍ୱକପ ୩ କିମ୍ବା ୪ ଭେନ୍ୟୁରେ ହୋଇଥାଏ। ମାତ୍ର ବୋର୍ଡ ରାଜନୀତି ଏବଂ ଏ ସମ୍ପର୍କିତ ବାଧ୍ୟବାଧକତା ଯୋଗୁ ଭାରତରେ ତାହା ସମ୍ଭବ ହୋଇ ନ ଥାଏ। ୨୦୧୧ ଦିନିକିଆ ବିଶ୍ୱକପ ଏବଂ ୨୦୧୬ ଟି୨୦ ବିଶ୍ୱକପ ସମୟରେ ଆୟୋଜକ କମିଟିରେ ସ୍ଥାନ ପାଇଥିବା ଜଣେ ପୂର୍ବତନ ବିସିସିଆଇ କର୍ମକର୍ତ୍ତା ଏ ସମ୍ପର୍କରେ ସ୍ପଷ୍ଟ କରିଛନ୍ତି। ସଭାପତି ସୌରଭ ଗାଙ୍ଗୁଲିଙ୍କ ସହର କୋଲକାତା, ଉପସଭାପତି ରାଜୀବ ଶୁକ୍ଳାଙ୍କ ସହର ଲକ୍ଷ୍ନୌ, ସମ୍ପାଦକ ଜୟ ଶାହାଙ୍କ ସହର ଅହମଦାବାଦ ଏବଂ କୋଷାଧ୍ୟକ୍ଷ ଅରୁଣ ଧୁମାଲଙ୍କ ସହର ଧର୍ମଶାଳା। ଏହାବ୍ୟତୀତ ମୁମ୍ବାଇ, ଚେନ୍ନାଇ, ଦିଲ୍ଲୀ, ବେଙ୍ଗାଲୁରୁ ଏବଂ ହାଇଦ୍ରାବାଦରେ ଶ୍ରେଷ୍ଠ ଷ୍ଟାଡିୟମଗୁଡ଼ିକ ରହିଛି। କୌଣସି ଟୁର୍ନାମେଣ୍ଟ ସମୟରେ ଏଥିରୁ କୌଣସି ଭେନ୍ୟୁକୁ ଅଣଦେଖା କରାଯିବା କଷ୍ଟକର ହୋଇଥାଏ ବୋଲି ସେ ସୂଚନା ଦେଇଛନ୍ତି। ମ୍ୟାଚ ବାଣ୍ଟିବା ବିସିସିଆଇ ପାଇଁ ସବୁବେଳେ ସ୍ପର୍ଶକାତର ସମସ୍ୟା ସୃଷ୍ଟି କରିଥାଏ। ତେବେ ଯଦି ଟି୨୦ ବିଶ୍ୱକପ ଯୋଜନା ଅନୁସାରେ ହୁଏ ତେବେ କେତେକ କଠୋର ନିଷ୍ପତ୍ତି ନେବାକୁ ପଡ଼ିବ। ଟୁର୍ନାମେଣ୍ଟ ସରିଲେ ବିଦେଶରୁ ଆସିଥିବା ଦଳଗୁଡ଼ିକ କିପରି ସ୍ବଚ୍ଛନ୍ଦରେ ଫେରିପାରିବେ ତାକୁ ମଧ୍ୟ ଧ୍ୟାନରେ ରଖାଯାଇଥାଏ। ପାକିସ୍ତାନ ପାଇଁ ସବୁବେଳେ ଦିଲ୍ଲୀ ଏବଂ ଲକ୍ଷ୍ନୌରେ ଖେଳିବା ସୁରକ୍ଷିତ ହୋଇଥାଏ। ସେହିପରି ଇଂଲଣ୍ଡ ଓ ଅଷ୍ଟ୍ରେଲିଆ ପାଇଁ ମୁମ୍ବାଇରେ ଖେଳିବା ସୁବିଧାଜନକ ହୋଇଥାଏ ବୋଲି ସେ ପ୍ରକାଶ କରିଛନ୍ତି।
