ମୁମ୍ବାଇ, ୨୫।୪: ହ୍ୟାଟ୍ରିକ ପରାଜୟ ପରେ ଗୋଟିଏ ମ୍ୟାଚ୍ ଜିତିଥିବା ରାଜସ୍ଥାନ ରୟାଲ୍ସର ପିଛା ଛାଡ଼ୁନାହିଁ ସମସ୍ୟା। ଅଷ୍ଟ୍ରେଲିଆନ ପେସର ଆଣ୍ଡ୍ୟୁ ଟେ ବ୍ୟକ୍ତିଗତ କାରଣ ଯୋଗୁ ସ୍ବଦେଶ ଫେରି ଯାଇଛନ୍ତି। ତାଙ୍କ ପୂର୍ବରୁ ବେନ ଷ୍ଟୋକ୍ସ (ଆଙ୍ଗୁଠି ଜନିତ ଆହତ ସମସ୍ୟା) ଓ ଲିଆମ ଲିଭିଙ୍ଗଷ୍ଟୋନ (କ୍ଲାନ୍ତ ଅନୁଭବ) ସ୍ବଦେଶ ଫେରି ଯାଇଥିଲେ। ଦଳର ମୁଖ୍ୟ ପେସର ଜୋଫ୍ରା ଆର୍ଚ୍ଚର ପୂର୍ବରୁ ଉପଲବ୍ଧ ନାହାନ୍ତି। ଏଭଳି ବିପରୀତ ପରିସ୍ଥିତିରେ ଟେ ସ୍ବଦେଶ ଫେରିଯିବାରୁ ସମସ୍ୟାରେ ଘେରି ହୋଇଯାଇଛି ରାଜସ୍ଥାନ ଫ୍ରାଞ୍ଚାଇଜ। ଦଳରେ ଆଉ ମାତ୍ର ୪ (ଜୋସ ବଟଲର, କ୍ରିସ ମୋରିସ, ମୁସ୍ତାଫିଜୁର ରେହମାନ ଓ ଡେଭିଡ୍ ମିଲର) ଜଣ ବିଦେଶୀ ଖେଳାଳି ଅଛନ୍ତି। ସେମାନଙ୍କୁ ଦଳରେ ନିୟମିତ ସ୍ଥାନ ଦେବା ଛଡ଼ା ଆଉ ସଞ୍ଜୁ ସାମସନଙ୍କ ନିକଟରେ ବାଟ ନାହିଁ। ଏପଟେ ବାୟୋ ବବ୍ଲ ନିୟମ ଯୋଗୁ ଅନ୍ୟ ବିଦେଶୀ ଖେଳାଳିଙ୍କୁ ଦଳରେ ସାମିଲ କରିବା ସହଜ ନୁହେଁ।
୨୦୧୮ ଆଇପିଏଲରେ ସର୍ବାଧିକ ଉଇକେଟ ହାତେଇଥିବା ଟେ ଚଳିତ ସିଜନରେ ଗୋଟିଏ ବି ହେଲେ ମ୍ୟାଚ୍ ଖେଳି ନ ଥିଲେ। ଗତ ସଂସ୍କରଣରେ ତାଙ୍କୁ କେବଳ ଗୋଟିଏ ମ୍ୟାଚ୍ ଖେଳିବାକୁ ସୁଯୋଗ ମିଳିଥିଲା।
