ଚେନ୍ନାଇ, ୫ା୪- ଚଳିତ ଆଇପିଏଲରେ ଇଂଲଣ୍ଡ ଅଲରାଉଣ୍ଡର ମୋଇନ ଅଲି କୌଣସି ପ୍ରକାର ଲିକର ବ୍ରାଣ୍ଡର ଲୋଗୋ ଥିବା ଜର୍ସି ପିନ୍ଧିବେ ନାହିଁ। ଏ ନେଇ ସ୍ପଷ୍ଟ କରିଛି ଚେନ୍ନାଇ ସୁପର କିଙ୍ଗ୍ସ (ସିଏସ୍କେ)। ବ୍ୟକ୍ତିଗତ ଧାର୍ମିକ ଭାବନା ଯୋଗୁ ମାଦକ ଦ୍ରବ୍ୟର ଲୋଗୋକୁ ନିଜ ଜର୍ସିରୁ ହଟାଇବା ପାଇଁ ଅନୁରୋଧ କରିଥିଲେ ଏହି ମୁସଲିମ ଅଲରାଉଣ୍ଡର।
ସିଏସ୍କେ ଜର୍ସିରେ ଏସ୍ଏନ୍ଜେ ୧୦୦୦୦ ନାମକ ଲିକର ବ୍ରାଣ୍ଡର ଲୋଗୋ ରହିଛି। ଏହି କମ୍ପାନୀ ଜର୍ସିର ଅନ୍ୟତମ ସ୍ପନସର। ”ସିଏସ୍କେ ସର୍ବଦା ତା’ର ଖେଳାଳି ଓ ସେମାନଙ୍କ ନିଷ୍ପତ୍ତିକୁ ସମ୍ମାନ ଦିଏ। ଯଦି ମାଦକ ଦ୍ରବ୍ୟର ଲୋଗୋକୁ ସେମାନେ ଜର୍ସିରେ ସ୍ଥାନ ଦେବାକୁ ଚାହାନ୍ତି ନାହିଁ, ତେବେ ଆମେ ସେମାନଙ୍କୁ ସମର୍ଥନ ଦେଉଛୁ। ଏ ଘଟଣାରେ ଆମ ସ୍ପନସର୍ସଙ୍କ କୌଣସି ଆପତ୍ତି ନାହିଁ “ ବୋଲି ଫ୍ରାଞ୍ଚାଇଜର ଜଣେ ଅଫିସିଆଲ କହିଛନ୍ତି। ତେବେ ସିଏସ୍କେ ଦଳରେ ସାମିଲ ହୋଇଥିବା ମୁସଲିମ ଖେଳାଳି ଏଭଳି ଅନୁରୋଧ କରିବା ପ୍ରଥମ ଘଟଣା ନୁହେଁ। ଦଳର ବରିଷ୍ଠ ସ୍ପିନର ଇମ୍ରାନ ତାହିରଙ୍କ ଜର୍ସିରେ ମଧ୍ୟ ଲିକର ବ୍ରାଣ୍ଡର ଲୋଗୋ ସ୍ଥାନ ଦିଆଯାଇ ନାହିଁ।
