ଅଧିକ ସମୟ ଡାଏପର ପିନ୍ଧିବା ଫଳରେ ପିଲାଙ୍କ ତ୍ୱଚାରେ ଦାଗ ପଡ଼ି ଯାଇଥାଏ। ପିଲାଙ୍କର
ଏହି ଦାଗକୁ ଦୂର କରିବା ପାଇଁ ଜାଣି ରଖନ୍ତୁ କିଛି ଘରୋଇ ଉପାୟ…
୧୫ ମିନିଟ୍: ସବୁ ସମୟରେ ଡାଏପର ପିନ୍ଧୁଥିବା ପିଲାଙ୍କୁ ମଝିରେ ମଝିରେ କିଛି ସମୟ ଖୋଲା ଛାଡନ୍ତୁ। ୨-୪ ଘଣ୍ଟା ପରେ ଅତି କମ୍ରେ ୧୫ ମିନିଟ୍ ପର୍ଯ୍ୟନ୍ତ ପିଲାଙ୍କୁ ଡାଏପର ନ ପିନ୍ଧାଇ ଢିଲା ପ୍ୟାଣ୍ଟ ପିନ୍ଧାନ୍ତୁ। ଫଳରେ ପିଲାଙ୍କ ତ୍ୱଚାରେ ଦାଗ ପଡ଼ିବା କିମ୍ବା ଲାଲ୍ ଦେଖାଯିବା ଭଳି ସମସ୍ୟା ରହିବ ନାହିଁ।
ପାଉଡର ଲଗାନ୍ତୁ: ପ୍ରତିଥର ପିଲାଙ୍କୁ ଡାଏପର ପିନ୍ଧାଇବା ସମୟରେ ପ୍ରଥମେ ପାଉଡର ଲଗାନ୍ତୁ। ଏହା ଫଳରେ ତ୍ୱଚା ଶୁଖିଲା ରହିବ ଏବଂ ସଂକ୍ରମଣର ଭୟ ନ ଥିବ।
ନଡିଆ ତେଲ: ଡାଏପର ପିନ୍ଧିବା ଫଳରେ ଯଦି ଶିଶୁର ତ୍ୱଚାରେ ଲାଲ୍ ଦାଗ ହୋଇଥାଏ ତେବେ ଡାଏପର ବଦଳାଇବା ପରେ ତ୍ୱଚାକୁ ଉଷୁମ ପାଣିରେ ଭଲଭାବେ ପୋଛି ନଡ଼ିଆ ତେଲ ଲଗାଇ ଦିଅନ୍ତୁ। ନଡିଆ ତେଲରେ ଆଣ୍ଟିବ୍ୟାକ୍ଟେରିଆ ଏବଂ ଆଣ୍ଟି ଫଙ୍ଗଲ ରହିଛି। ତେଣୁ ଏହା ତ୍ୱଚାର ଏହି ସମସ୍ୟା ଦୂର କରିପାରିବ।
ବେକିଂ ସୋଡା: ଅଧିକ ସମୟ ଡାଏପର ପିନ୍ଧିବା ଫଳରେ ଶିଶୁର ତ୍ୱଚାରେ ଯଦି ଲାଲ୍ ଦାଗ ହେବା ସହ କିଛି ଫଳି ଯିବା ପରି ହୋଇଥାଏ ତେବେ ବେକିଂ ସୋଡା ଲଗାଇ ଏହାକୁ ଭଲ କରିପାରିବେ। ଏଥିପାଇଁ ୧୫ କପ୍ ପାଣି ଆଣି ସେଥିରେ ୨ ଚାମଚ ବେକିଂ ସୋଡା ପକାନ୍ତୁ। ସେହି ପାଣିରେ ଶିଶୁର ଡାଏପର ଖୋଲି ତ୍ୱଚାକୁ ଧୀରେ ଧୀରେ କପଡାରେ ସଫା କରନ୍ତୁ। ଏହାପରେ ତ୍ୱଚା ଶୁଖିଗଲା ପରେ ପୁଣି ଡାଏପର ପିନ୍ଧାନ୍ତୁ।
ଆଲୋବେରା ଓ ନିମ୍ବ:ଆଲୋବେରା ଜେଲ୍କୁ ମଧ୍ୟ ଶିଶୁର ହିପ୍ସରେ ଲଗାଇଲେ ଡାଏପରଜନିତ ଦାଗ ଦୂର ହୋଇଥାଏ। ହାଲ୍କା ଦାଗ ହୋଇଥିଲେ ନିମ୍ବ ପାଉଡର କିମ୍ବା ତେଲ ଲଗାଇପାରିବେ। କିନ୍ତୁ ଦାଗ ଘା’ଭଳି ହୋଇଥିଲେ ନିମ୍ବ ବ୍ୟବହାର କରନ୍ତୁ ନାହିଁ। ଏସବୁ ଘରୋଇ ଉପାୟରେ ଯଦି ଦାଗ ଭଲ ହୋଇ ନ ଥାଏ ତେବେ ଡାକ୍ତରଙ୍କ ପରାମର୍ଶ ନିଅନ୍ତୁ।
