ନୂଆଦିଲ୍ଲୀ: ନୂଆ କୃଷି ଆଇନ ବିରୋଧରେ ୩ ସପ୍ତାହରୁ ଅଧିକ ଦିନ ହେଲା ଦିଲ୍ଲୀର ସିଙ୍ଘୁ ସୀମାରେ ଆନ୍ଦୋଳନ କରୁଛନ୍ତି କୃଷକମାନେ। ଏହି ଆନ୍ଦୋଳନକୁ ବିଭିନ୍ନ ମହଲରୁ ମିଳୁଛି ସମର୍ଥନ। ଏହିକ୍ରମରେ ଯୋଡ଼ି ହୋଇଛନ୍ତି ଜଣେ ସେଲୁନ ମାଲିକ।
କୃଷକଙ୍କ ଆନ୍ଦୋଳନସ୍ଥଳରେ ଖୋଲିଛନ୍ତି କ୍ରେଜି ବ୍ୟୁଟି ସାଲୋନ। ଏଠାରେ ଆନ୍ଦୋଳନ କରୁଥିବା କୃଷକଙ୍କୁ ମାଗଣାରେ ଚୁଟି ଠାରୁ ଆରମ୍ଭ କରି ଦାଢ଼ି କାଟିବା ସହ ଦେଉଛନ୍ତି ଫେସ ମାସାଜ ଭଳି ସୁବିଧା। ସେଲୁନ ମାଲିକ ଲବ ସିଂହ ଠାକୁରଙ୍କୁ ତାଙ୍କ ପତ୍ନୀଙ୍କ ସହ କାନାଡା ଯିବାର ଥିଲା। କିନ୍ତୁ ସେ ଏହାକୁ ବାତିଲ କରି କୃଷକଙ୍କ ସେବା କରିବାକୁ ନେଇଥିଲେ ନିଷ୍ପତ୍ତି।
ଏ ସମ୍ପର୍କରେ ସେଲୁନ ମାଲିକ ଲବ୍ କହିଛନ୍ତି, କୁରୁକ୍ଷେତ୍ରରେ ମୋ ପାର୍ଲର ସୁରଖୁରରେ ଚଲିଛି। ମୋର ଅଧିକାଂଶ ଗ୍ରାହକ କୃଷକ ଶ୍ରେଣୀର। ସିଙ୍ଘୁ ସୀମାରେ ଚାଲିଥିବା ଆନ୍ଦୋଳନସ୍ଥଳରେ ସେଲୁନର ଆବଶ୍ୟକତା ଥିବା କହିଥିଲେ। ଏହାପରେ ମୋର ଟିମକୁ ଧରି ଏଠାରେ ପହଞ୍ଚିଲି। ଦିନକୁ ଆମେ ୧୦୦ରୁ ୧୫୦ କୃଷକଙ୍କ ଚୁଟି କାଟୁଛୁ। ଆମେ ଏଥିପାଇଁ କୌଣସି ଅର୍ଥ ନେଉନାହୁଁ। ଆନ୍ଦୋଳନ ସରିବା ଯାଏ ଆମେ ଏଠାରେ ରହିବୁ ଓ ମାଗଣାରେ କୃଷକଙ୍କ ସେବା କରିବୁ।
