ସାଇବେରିଆ ଦୁନିଆର ସବୁଠାରୁ ଶୀତଳ ସ୍ଥାନ ଭାବରେ ପରିଗଣିତ ହୁଏ। ଏଠାରେ ବିଶ୍ୱର ସବୁଠାରୁ ଶୀତଳ ବିଦ୍ୟାଳୟ ଅଛି। ଏଠାରେ ତାପମାତ୍ରା ପ୍ରାୟତଃ ମାଇନସ୍ ୫୦ ଡିଗ୍ରୀ ସେଲସିୟସ ଥାଏ। ଏତେ ଥଣ୍ଡା ସତ୍ତ୍ୱେ ଛୋଟ ଛୋଟ ପିଲାମାନେ ଏହି ବିଦ୍ୟାଳୟରେ ଅଧ୍ୟୟନ କରିବାକୁ ଆସିଥାନ୍ତି। ତାପମାତ୍ରା ମାଇନସ୍ ୫୨ ଡିଗ୍ରୀ କିମ୍ବା ତା’ଠାରୁ କମଖ ହେଲେ ଏହି ବିଦ୍ୟାଳୟ ୧୧ ବର୍ଷ କିମ୍ବା ତା’ଠାରୁ କମ୍ ବୟସର ଛାତ୍ରମାନଙ୍କ ପାଇଁ ବନ୍ଦ ହୋଇଯାଏ।
ଓମିଆକନ ସହରରେ ଏହି ବିଦ୍ୟାଳୟ ଅବସ୍ଥିତ। ଏହି ସହରରେ ଡାକଘର ଏବଂ ବ୍ୟାଙ୍କ ପରି କିଛି ମୌଳିକ ସୁବିଧା ରହିଛି। ୧୯୩୨ ମସିହାରେ ଷ୍ଟାଲିନଙ୍କ ଅମଳରେ ଏହି ବିଦ୍ୟାଳୟଟି ନିର୍ମିତ ହୋଇଥିଲା। ଏହି ବିଦ୍ୟାଳୟରେ ଖାରା ତୁମୁଲ ଏବଂ ବେରେଗ ୟୁର୍ଡେ ଗାଁର ପିଲାମାନେ ଅଧ୍ୟୟନ କରିବାକୁ ଆସନ୍ତି। ବେଳେବେଳେ ପିଲାମାନେ ସେମାନଙ୍କ ପିତାମାତାଙ୍କ ସହିତ ନଚେତ କୁକୁରମାନଙ୍କ ସହିତ ଆସିଥାନ୍ତି। ଏହା ପିଲାମାନଙ୍କ ପାଇଁ କୌଣସି ଚ୍ୟାଲେଞ୍ଜଠାରୁ କମ୍ ନ ଥାଏ। ଏବେ ଏଠାରେ କରୋନା ଭୟ ଦେଖାଦେଇଥିବାରୁ ସ୍କୁଲକୁ ଯାଉଥିବା ପିଲାମାନଙ୍କ ତାପମାତ୍ରା ଯାଞ୍ଚ କରାଯାଉଛି।
ମାଇନସ୍ ୫୦ ଡିଗ୍ରୀରୁ କମ୍ ତାପମାତ୍ରାରେ ହାଇପୋଥର୍ମିଆର ବିପଦ ମଧ୍ୟ ଯଥେଷ୍ଟ ବୃଦ୍ଧି ପାଇଥାଏ। ଏହା ଏକ ଡାକ୍ତରୀ ଜରୁରୀକାଳୀନ ପରିସ୍ଥିତି,ଯେଉଁଥିରେ ଶରୀରର ତାପମାତ୍ରା ଅତି ଶୀଘ୍ର ହ୍ରାସ ପାଇଥାଏ। ଫଳରେ ଉଚ୍ଚ ରକ୍ତଚାପ, ଦ୍ରୁତ ହୃଦ୍ସ୍ପନ୍ଦନ, ସ୍ନାୟୁ ଏବଂ କେତେକ କ୍ଷେତ୍ରରେ ବ୍ୟକ୍ତିଙ୍କ ମୃତ୍ୟୁ ଘଟିଥାଏ। ଏଣୁ ଏହି ତାପମାତ୍ରାରେ ଡାକ୍ତରମାନେ ଦୀର୍ଘ, ଗଭୀର ନିଶ୍ୱାସ ନେବାକୁ ମନା କରିଥାନ୍ତି। କାରଣ ଏହାଦ୍ୱାରା ଫୁସଫୁସରେ ଭରପୂର ଥଣ୍ଡା ପବନ ଭରିବାର ଆଶଙ୍କା ରହିଥାଏ ଯାହା ସ୍ବାସ୍ଥ୍ୟ ପାଇଁ ଅତ୍ୟନ୍ତ ବିପଜ୍ଜନକ ହୋଇପାରେ ବୋଲି ଡାକ୍ତରମାନେ ପରାମର୍ଶ ଦେଇଥାନ୍ତି।
