ବଇଣ୍ଡା, ୮ା୧୧(ଡି.ଏନ.ଏ.)- ଅନୁଗୋଳ ଜିଲା କିଶୋରନଗର ବ୍ଲକ କଲେଜ ଛକରେ ଶନିବାର ପ୍ରଶାସନ ପକ୍ଷରୁ ଯାଞ୍ଚ ବେଳେ ମାସ୍କ ପିନ୍ଧି ନ ଥିବା ଦୁଇଜଣ ବ୍ୟକ୍ତି ଉଠ୍ବସ୍ ହେଉଥିବାର ଏକ ଭିଡିଓ ଭାଇରାଲ ହୋଇଛି। ଘଟଣା ଜିଲା ପ୍ରଶାସନ ନଜରକୁ ଆସିବା ପରେ ଜିଲାପାଳ ସିଦ୍ଧାର୍ଥ ଶଙ୍କର ସ୍ବାଇଁ ଏହାର ତଦନ୍ତ ପାଇଁ ଆଠମଲ୍ଲିକ ଉପଜିଲାପାଳଙ୍କୁ ରବିବାର ନିର୍ଦ୍ଦେଶ ଦେଇଛନ୍ତି।
ଘଟଣାରୁ ଜଣାପଡିଛି, କିଶୋରନଗର ତହସିଲଦାର ଓ ପୋଲିସ ଉପସ୍ଥିତିରେ ଅପରାହ୍ନରେ ମାସ୍କ ଯାଞ୍ଚ କରାଯାଉଥିଲା। ସେହି ସମୟରେ ରାସ୍ତାରେ ଚାଲିକରି ଯାଉଥିବା ୨ ଜଣ ସ୍ଥାନୀୟ ବ୍ୟକ୍ତିଙ୍କ ମଧ୍ୟରୁ ଜଣେ ଆଦୌ ମାସ୍କ ପିନ୍ଧି ନ ଥିବାବେଳେ ଅନ୍ୟ ଜଣେ ଠିକ୍ ଭାବେ ମାସ୍କ ପରିଧାନ କରି ନ ଥିଲେ। ଫଳରେ ଉଭୟଙ୍କୁ ୫ ଶହ ଟଙ୍କା ଲେଖାଏ ଜରିମାନା ଦେବାକୁ ତହସିଲଦାର କହିଥିଲେ। କିନ୍ତୁ ଟଙ୍କା ନ ଥିବା କହି ଦୁଇବ୍ୟକ୍ତି କାନ ଧରି ଉଠବସ୍ ହୋଇଥିଲେ। ନିକଟସ୍ଥ ଏକ ଘରେ ଲାଗିଥିବା ସିସିଟିଭି କ୍ୟାମେରାରେ ଏହି ଦୃଶ୍ୟ ରେକର୍ଡ ହୋଇଥିଲା। ପରେ ଉକ୍ତ ଭିଡିଓ ସୋସିଆଲ ମିଡିଆରେ ଭାଇରାଲ ହୋଇଯାଇଥିଲା। ଏ ସମ୍ପର୍କରେ ତହସିଲଦାର ଡ. ଲକ୍ଷ୍ମୀପ୍ରସାଦ ସାହୁ କହିଛନ୍ତି, କଲେଜ ଛକଠାରେ ଯାଞ୍ଚ ବେଳେ ସମ୍ପୃକ୍ତ ଦୁଇ ବ୍ୟକ୍ତି ମଦ୍ୟପାନ ସହ ମାସ୍କ ନ ପିନ୍ଧି ଆସୁଥିଲେ। ମାସ୍କ କାହିଁକି ପିନ୍ଧି ନାହଁାନ୍ତି ବୋଲି ପଚାରିବାରୁ ଉଭୟେ ଆଗାମୀ ଦିନରେ ମାସ୍କ ପିନ୍ଧିବେ ବୋଲି କହିବା ସହ ସେଠାରେ ଉଠ୍ବସ୍ ହୋଇଥିଲେ। କିନ୍ତୁ ଏପରି ଉଠ୍ବସ୍ ହେବାକୁ ସେ କହି ନ ଥିବା ତହସିଲଦାର ପ୍ରକାଶ କରିଛନ୍ତି। ଏ ନେଇ ଆଠମଲ୍ଲିକ ଉପଜିଲାପାଳ ଲଳିତମୋହନ ବେହେରା କହିଛନ୍ତି, ଘଟଣାର ତଦନ୍ତ ପାଇଁ ଜିଲାପାଳ ନିର୍ଦ୍ଦେଶ ଦେଇଛନ୍ତି। ତଦନ୍ତ ପରେ ପ୍ରକୃତ କଥା ଜଣାପଡିବ।
