ଭୁବନେଶ୍ୱର, ୧ା୧୦ (ବ୍ୟୁରୋ):ପୂର୍ବ ଅପେକ୍ଷା ସେପ୍ଟେମ୍ବରରେ କୋଭିଡ୍-୧୯ ଭୂତାଣୁ ଅଧିକ ସକ୍ରିୟ ରହିଛି। ବର୍ତ୍ତମାନ ରାଜ୍ୟରେ ସଂକ୍ରମଣ ୨,୧୯,୧୧୯ରେ ପହଞ୍ଚତ୍ଥିବାବେଳେ ଅଧାରୁ ଅଧିକ କେବଳ ଏହି ମାସରେ ଆକ୍ରାନ୍ତ ହୋଇଛନ୍ତି। ପୂର୍ବରୁ ଜୁନ୍ ଓ ଜୁଲାଇକୁ ସବୁଠୁ ଗୁରୁତ୍ୱପୂର୍ଣ୍ଣ ସମୟ ବୋଲି କୁହାଯାଉଥିଲା। କିନ୍ତୁ ଏହାପରେ ଅଗଷ୍ଟରେ ମଧ୍ୟ ସଂକ୍ରମଣ ପୂର୍ବଠାରୁ ଢେର୍ ବଢ଼ିଯାଇଥିଲାବେଳେ ସେପ୍ଟେମ୍ବରରେ ତାହା ବହୁଗୁଣିତ ହୋଇଛି। ଗୋଟିଏ ମାସରେ ୧ଲକ୍ଷ ପାର୍ କରିଥିବାରୁ ରାଜ୍ୟରେ କରୋନା ସ୍ଥିତି ଜଟିଳ ଆଡକୁ ଗତି କରୁଥିବା ଜଣାପଡୁଛି।
ମାର୍ଚ୍ଚ ୧୫ରେ ରାଜ୍ୟରେ ପ୍ରଥମ କରୋନା ପଜିଟିଭ୍ ଚିହ୍ନଟ ହୋଇଥିଲା। ଧୀରେ ଧୀରେ ସଂକ୍ରମଣ ଏପରି ବଢ଼ି ଚାଲିଲା ଯେ ତାକୁ କାବୁ କରିବା କଷ୍ଟକର ହୋଇପଡ଼ିଲା। ରାଜ୍ୟ ସ୍ବାସ୍ଥ୍ୟ ବିଭାଗର ତଥ୍ୟ ଅନୁସାରେ, ପ୍ରଥମ ସାଢ଼େ ୪ ମାସରେ ଅର୍ଥାତ୍ ଜୁଲାଇ ଶେଷ ସୁଦ୍ଧା ରାଜ୍ୟରେ କରୋନା ପଜିଟିଭ୍ ସଂଖ୍ୟା ମାତ୍ର ୩୧,୮୭୭ରେ ଥିଲା। କିନ୍ତୁ ଅଗଷ୍ଟ ମାସରେ ୭୧,୬୫୯ ଆକ୍ରାନ୍ତ ଚିହ୍ନଟ ହେବା ପରେ ରାଜ୍ୟରେ ମୋଟ ଆକ୍ରାନ୍ତ ସଂଖ୍ୟା ୧,୦୩,୫୩୬ରେ ପହଞ୍ଚତ୍ଥିଲା। ଏବେ କେବଳ ସେପ୍ଟେମ୍ବରରେ ୧,୧୫,୫୮୩ ପଜିଟିଭ୍ ଚିହ୍ନଟ ହେଲେଣି। କେବଳ ପଜିଟିଭ୍ ସଂଖ୍ୟା ନୁହେଁ, ରାଜ୍ୟରେ ଗତ ଦୁଇମାସ ହେବ କରୋନାଜନିତ ମୃତ୍ୟୁ ସଂଖ୍ୟା ମଧ୍ୟ ବୃଦ୍ଧି ପାଇବାରେ ଲାଗିଛି। ଜୁଲାଇ ଶେଷ ସୁଦ୍ଧା କରୋନା ମୃତ୍ୟୁ ୧୭୭ ଥିବାବେଳେ କେବଳ ଅଗଷ୍ଟରେ ୩୧୫ଜଣଙ୍କ ମୃତ୍ୟୁ ହେବାପରେ ଏହି ସଂଖ୍ୟା ୪୯୨କୁ ବୃଦ୍ଧି ପାଇଥିଲା। ଏବେ ସେପ୍ଟେମ୍ବରରେ ଆଉ ୩୫୦ଜଣ ଆକ୍ରାନ୍ତଙ୍କ ମୃତ୍ୟୁ ହୋଇସାରିଲାଣି। ଫଳରେ କରୋନାଜନିତ ମୃତ୍ୟୁ ସଂଖ୍ୟା ୮୪୨ରେ ପହଞ୍ଚତ୍ଛି।
ଗତ ୨୪ ଘଣ୍ଟାରେ ରାଜ୍ୟରେ ୩,୪୪୩ ନୂଆ ପଜିଟିଭ୍ ଚିହ୍ନଟ ହୋଇଛନ୍ତି। ଏମାନଙ୍କ ମଧ୍ୟରେ ଖୋର୍ଦ୍ଧାରୁ ୬୦୧ଜଣ ରହିଥିବାବେଳେ କଟକ ୩୫୯, ବାଲେଶ୍ୱର ୧୫୨, ମୟୂରଭଞ୍ଜ ୧୪୧, ପୁରୀ ୧୩୨, ସମ୍ବଲପୁର ୧୩୧, ଯାଜପୁର ୧୩୦, ବଲାଙ୍ଗୀର ୧୧୪, ବରଗଡ଼ ୧୧୧, କନ୍ଧମାଳ ୧୦୩, କେନ୍ଦ୍ରାପଡ଼ା ୧୦୧ ଓ ଅନୁଗୋଳରୁ ୧୦୦ଜଣ ରହିଛନ୍ତି। ସେପଟେ ରାଜ୍ୟରେ ଆଉ ୧୪ଜଣଙ୍କର କରୋନାରେ ମୃତ୍ୟୁ ଘଟିଛି। ନୟାଗଡ଼ ଓ ଖୋର୍ଦ୍ଧାରୁ ୩ଜଣ ଲେଖାଏ ମରିଥିବାବେଳେ ପୁରୀରୁ ୨, ବାଲେଶ୍ୱର, ଭଦ୍ରକ, କଟକ, ଗଞ୍ଜାମ, କଳାହାଣ୍ଡି ଓ କନ୍ଧମାଳରୁ ଜଣେ ଲେଖାଏ ରହିଛନ୍ତି। ଅପରପକ୍ଷରେ ରାଜ୍ୟରେ ଆଉ ୪,୨୧୯ ରୋଗୀ କରୋନାରୁ ମୁକ୍ତ ହୋଇଛନ୍ତି। ଏମାନଙ୍କୁ ମିଶାଇ ଆରୋଗ୍ୟ ସଂଖ୍ୟା ୧,୮୫,୭୦୦କୁ ବୃଦ୍ଧି ପାଇଛି।
