ନୂଆଦିଲ୍ଲୀ: ଭୋଡାଫୋନ ଉପରେ ପ୍ରାୟ ୨ ବିଲିୟନ ଡଲାର(ପ୍ରାୟ୧୫ ହଜାର କୋଟି) ଟିକସ ମାମଲାରେ ସରକାରଙ୍କୁ ଶୁକ୍ରବାର ଝଟକା ଲାଗିଛି। ଏହି ମାମଲା କୋର୍ଟ ବାହାରେ ଫଇସଲା ହେଉଥିବା ବେଳେ ଏଥିରେ ଭୋଡାଫୋନ ବିଜୟ ଲାଭ କରିଛି। ଅନ୍ତର୍ଜାତୀୟ ଆର୍ବିଟ୍ରେଶନ ଭୋଡାଫୋନ ସପକ୍ଷରେ ମାମଲାର ଶୁଣାଣି କରିଛନ୍ତି। କମ୍ପାନୀ ଉପରେ ଭାରତ ସରକାର ଲଗାଇଥିବା ଟିକସ ଏବଂ ଟିକସ ଉପରେ ସୁଧ ଏବଂ ଜରିମାନାକୁ ବେଆଇନ ବୋଲି ଶୁଣାଣିରେ କୁହାଯାଇଛି। ଏଭଳି କାର୍ଯ୍ୟ ଭାରତ-ନେଦରଲାଣ୍ଡସ ମଧ୍ୟରେ ହୋଇଥିବା ନିବେଶ ଚୁକ୍ତିର ଉଲ୍ଲଂଘନ ବୋଲି ଏଥିରେ ସ୍ପଷ୍ଟ କରାଯାଇଥିବା ପ୍ରକ୍ରିୟା ସହ ଜଡିତ ଜଣେ ଅଧିକାରୀ ସୂଚନା ଦେଇଛନ୍ତି।
ଟ୍ରିବ୍ୟୁନାଲ ଶୁଣାଣି ବେଳେ କହିଛନ୍ତି, ଭାରତ ଭୋଡାଫୋନଠାରୁ ସମସ୍ତ ବକେୟା ରାଶି ମାଗିବା ବନ୍ଦକରୁ। ଏହି ମାମଲା ଉପରେ ଭାରତ ସରକାର ଏବଂ କମ୍ପାନୀ ପକ୍ଷରୁ କୌଣସି ପ୍ରତିକ୍ରିୟା ମିଳିପାରିନାହିଁ। ସୂଚନାଯୋଗ୍ୟ, ଭୋଡାଫୋନ ୨୦୦୭ରେ ଭାରତରେ ହଚିସନ ଓ୍ବାମ୍ପୂଆର ମୋବାଇଲ ବିଜନେସକୁ ଅଧିଗ୍ରହଣ କରିଥିଲା। ଏହିଠାରୁ ଟିକସ ବିବାଦ ଆରମ୍ଭ ହୋଇଥିଲା। ଭୋଡାଫୋନ ଟିକସ ପ୍ରଦାନ କରୁ ବୋଲି ଭାରତ ସରକାର ଦାବି କରିଥିଲେ। ମାତ୍ର କମ୍ପାନୀ ଏହାରକୁ ବିରୋଧ କରିବା ସହ ମାମଲା ଆରମ୍ଭ ହୋଇଥିଲା। ୨୦୧୨ରେ ସୁପ୍ରିମକୋର୍ଟ କମ୍ପାନୀ ସପକ୍ଷରେ ଶୁଣାଣି କରିଥିଲେ। ହେଲେ ସରକାର ଏହି ବର୍ଷ ନିୟମରେ ପରିବର୍ତ୍ତନ କରିଦେଇଥିଲେ। ୨୦୧୪ରେ ଭୋଡାଫୋନ ଭାରତ ସରକାରଙ୍କ ବିରୋଧରେ ଅନ୍ତର୍ଜାତୀୟ ଆର୍ବିଟ୍ରେଶନର ଦ୍ୱାରସ୍ଥ ହୋଇଥିଲା। ବିଭିନ୍ନ କମ୍ପାନୀ ଭାରତ ସରକାରଙ୍କ ଅନ୍ତର୍ଜାତୀୟ ଆର୍ବିଟ୍ରେଶନକୁ ଘୋଷାଡି ଛନ୍ତି। ଭାରତ ସରକାର ଏଭଳି ୧୨ରୁ ଅଧିକ ମାମଲା ଲଢୁଛନ୍ତି। ଏଥିରେ କେର୍ନ ଏନର୍ଜି ମଧ୍ୟ ସାମିଲ ରହିଛି।
