କୋଣାର୍କ,୧୮ା୯(ଡି.ଏନ୍.ଏ): କୋଣାର୍କ ଥାନା ଅଧୀନ ଅବଦାନ ପଞ୍ଚାୟତର ଏକ ଗୋଚର ଜମିରେ ଶ୍ମଶାନ ଚୁଲା ଓ ଗୋରୁ ପୋତା ହେଉଥିବା ଏକ ଜମିରେ ମହିଳା ସମିତି ଗୃହ ନିର୍ମାଣ ବେଆଇନ ଭାବେ ହେଉଥିବାର ଅଭିଯୋଗ ହୋଇଛି। ଏ ନେଇ ଗ୍ରାମବାସୀ ବିରୋଧ କରିବା ସହ ପ୍ରଶାସନକୁ ବାରମ୍ବାର ଅଭିଯୋଗ କରିବା ସତ୍ତ୍ୱେ କାର୍ଯ୍ୟ ବନ୍ଦ ହେଉ ନାହିଁ। ଫଳରେ ଗ୍ରାମବାସୀଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି। ଖବର ଅନୁଯାୟୀ, ଏହି ପଞ୍ଚାୟତର ଗୋଚରଜମି ଖାତା ନଂ ୫୦୯ ପ୍ଲଟ ନଂ ୧୬୨ରେ ୧ ଏକର ୩୪ ଡିସିମିଲି ଜାଗାରେ ସରକାରୀ ଅନୁଦାନ ୨ଲକ୍ଷ ୫୦ହଜାର ଟଙ୍କା ବ୍ୟୟରେ ୨ଟି ଶ୍ମଶାନ ଚୁଲା ନିର୍ମାଣ କରାଯାଇଛି। ଯେଉଁ ଜମି ୩ ଖଣ୍ଡି ମୌଜାର ଶହଶହ ଗୋରୁଙ୍କର ବର୍ଷାଦିନ ଚାରଣ ଭୂଇଁ। ଫଳରେ ଚଳିତବର୍ଷ ଏହି ସ୍ଥାନରେ ଗୋରୁ ଚରିବାକୁ ନ ପାଇ ଅସୁବିଧାର ସମ୍ମୁଖୀନ ହୋଇଛନ୍ତି। ଅପରପକ୍ଷେ ଓଶଳଙ୍ଗ ଗ୍ରାମର ସର୍ବସାଧାରଣରେ ମୃତ ଗୋରୁଙ୍କୁ ପୋତା ହେବା ପାଇଁ ଥିବା ଏକ ପଡ଼ିଆରେ ସରକାରୀ ଅନୁଦାନ ୫ଲକ୍ଷ ଟଙ୍କା ବ୍ୟୟରେ ଏକ ମହିଳା ସମିତି ଘର ନିର୍ମାଣ ଚାଲିଛି। ଏହାକୁ ନେଇ ସ୍ଥାନୀୟ ଲୋକେ ବିରୋଧ କରିବା ସହ ପ୍ରଶାସନକୁ ଅଭିଯୋଗ କରିଛନ୍ତି। ଉକ୍ତ ୨ଟି ଜାଗା ଗୋରୁଙ୍କ ପାଇଁ ଥିବାବେଳେ ଏଠାରେ ବେଆଇନ ଭାବେ ନିର୍ମାଣ କାର୍ଯ୍ୟ ହେଉଥିବା ସ୍ଥାନୀୟ ଲୋକେ କହିଛନ୍ତି । ତେଣୁ ଏହି କାର୍ଯ୍ୟର ତଦନ୍ତ ଜିଲାପାଳ କରନ୍ତୁ ବୋଲି ସ୍ଥାନୀୟ ବିଚିତ୍ରାନନ୍ଦ ଦାଶ, ଲକ୍ଷ୍ମୀ ନାରାୟଣ ଯେନା, ମୀନା ସେଠୀ, ସାଧୁ କାଣ୍ଡୀ ପ୍ରମୁଖ ଦାବି କରିଛନ୍ତି। ଏ ସମ୍ପର୍କରେ କନିଷ୍ଠ ଯନ୍ତ୍ରୀ ସୁଧୀର କୁମାର ବାରିକ କୁହନ୍ତି, ଗ୍ରାମବାସୀଙ୍କଠାରୁ ଅଭିଯୋଗ ପାଇଛି। ଖୁବଶୀଘ୍ର ଏହାର ତଦନ୍ତ କରି କାର୍ଯ୍ୟାନୁଷ୍ଠାନ ଗ୍ରହଣ କରିବି ବୋଲି ସେ କରିଛନ୍ତି।
