ପ୍ରେଗ୍, ୬।୯(ଏପି): କେନିଆର ପେରେସ ଜେପ୍ଚିର୍ଚିର ଏଠାରେ ମହିଳାଙ୍କ ପାଇଁ ଉଦ୍ଦିଷ୍ଟ ଏକମାତ୍ର ହାଫ୍ ମାରାଥନରେ ବିଶ୍ୱ ରେକର୍ଡ ସୃଷ୍ଟି କରିଛନ୍ତି। ସେ ୧ ଘଣ୍ଟା ୫ ମିନିଟ ୩୪ ସେକେଣ୍ଡ ନେଇ ଏହି ସଫଳତା ପାଇଛନ୍ତି। ପ୍ରତିଯୋଗିତାରେ ଅଳ୍ପ ସଂଖ୍ୟକ ରନର ଭାଗ ନେଇଥିବାବେଳେ ଚେକ୍ ରାଜଧାନୀର ଲେଟ୍ନା ପାର୍କରେ ଆୟୋଜିତ ରେସ୍ରେ ୨୬ ବର୍ଷୀୟା ପେରେସ ଶ୍ରେଷ୍ଠ ପ୍ରଦର୍ଶନ କରିଥିଲେ। ପୂର୍ବରୁ ବିଶ୍ୱ ରେକର୍ଡ ଟାଇମିଂ ଥିଲା ୧:୦୬.୧୧ ସେକେଣ୍ଡ। ସ୍ପେନର ଭଲେନ୍ସିଆରେ ୨୦୧୮ରେ ଅନୁଷ୍ଠିତ ଓ୍ବାଲର୍ଡ ହାଫ୍ ମାରାଥନ ଚାମ୍ପିୟନଶିପ୍ରେ ଇଥିଓପିଆର ନେଟସାନେଟ ଗୁଡେଟା ଏହି ସମୟ ନେଇ ଏପର୍ଯ୍ୟନ୍ତ ରେକର୍ଡର ଅଧିକାରିଣୀ ଥିଲେ। ”ମୁଁ ୧:୦୪.୫୦ ସେକେଣ୍ଡରେ ରେସ୍ ଶେଷ କରିବାକୁ ଯୋଜନା କରିଥିଲି। ତେବେ ମୋ ପ୍ରଦର୍ଶନରେ ଖୁସି“ ବୋଲି ଜେପ୍ଚିର୍ଚିର ପ୍ରକାଶ କରିଛନ୍ତି।
