୩୨ ବର୍ଷ ପରେ ପୁଅକୁ ଫେରି ପାଇଥିବା ଜଣେ ମା’ର ବାତ୍ସଲ୍ୟ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ପ୍ରାୟ ତିନି ଦଶନ୍ଧି ଧରି ପୁଅକୁ ଖୋଜିବା ପରେ, ମା’ ପ୍ରାୟ ଆଶା ହରାଇଥିଲେ। ତେବେ ୩୨ ବର୍ଷ ପରେ ପୁଅକୁ ଭେଟିବା ପୂର୍ବରୁ ମା’ ମଧ୍ୟ ଭୟ କରୁଥିଲେ ଯେ, କାଳେ ତାଙ୍କ ପୁଅ ତାଙ୍କୁ ଚିହ୍ନି ପାରିବନି। ତାଙ୍କୁ ଗ୍ରହଣ କରିବନି। ମାତ୍ର ପୁଅ ମଧ୍ୟ ମାଆଙ୍କୁ ଦେଖି ଆନନ୍ଦର ଅଶ୍ରୁ ବୁହାଇଥିବା ଫଟୋ ଏବେ ସୋସିଆଲ ମିଡିଆରେ ବେଶ୍ ଭାଇରାଲ ହେବାରେ ଲାଗିଛି।
ତେବେ ଏମିତି ଏକ ଖୁସିଖବର ଆସିଛି ଚାଇନାରୁ। ଲି ଜିଙ୍ଗଜି ନାମକ ଜଣେ ମହିଳାଙ୍କ ପୁଅ ମାଓୟିନ୍ଙ୍କୁ ୧୯୮୮ରେ କେହି ଅପହରଣ କରି ବିକ୍ରି କରିଦେଇଥିଲା। ଏହା ପରେ ମା’ ବହୁତ ଖୋଜାଖୋଜି କରିଥିଲେ ମଧ୍ୟ ପୁଅ ସନ୍ଧାନ ନ ପାଇ ଫେରିବା ଆଶା ହରାଇଥିଲେ।
ଲି ଜିଙ୍ଗଜି ଶାନଜୀ ପ୍ରଦେଶର ବାସିନ୍ଦା। ୧୯୮୮ରେ ଯେତେବେଳେ ପୁଅ ମାଓୟିନଙ୍କୁ ଅପହରଣ କରାଯାଇଥିଲା। ସେତେବେଳେ ସେ ମାତ୍ର ୩ ବର୍ଷର ହୋଇଥିଲେ। ଲି ଜିଙ୍ଗଜି ତିନି ଦଶନ୍ଧି ପରେ ପୁଅକୁ ପାଇଛନ୍ତି।
ମାଓୟିନ୍ ଏକମାତ୍ର ସନ୍ତାନ। କାରଣ ସେହି ସମୟରେ ଚାଇନାରେ ଗୋଟିଏ ଶିଶୁର ନୀତି ସମ୍ପୂର୍ଣ୍ଣ ରୂପେ କାର୍ଯ୍ୟକାରୀ ହୋଇଥିଲା। ଯେତେବେଳେ ତାଙ୍କ ପିତା ଏକ ହୋଟେଲ ନିକଟରେ ପାଣି ପିଇବା ପାଇଁ ଯାଇଥିଲେ ସେତେବେଳେ ତାଙ୍କୁ ଅପହରଣ କରାଯାଇଥିଲା। ମାତାପିତା ତାଙ୍କ ପୁଅକୁ ଖୋଜିବା ପାଇଁ ତାଙ୍କ ଫଟୋ ସହିତ ୧ ଲକ୍ଷ ପୋଷ୍ଟର ଛାପିଥିଲେ। କିନ୍ତୁ ସଫଳ ହୋଇ ନ ଥିଲେ।
ଚଳିତବର୍ଷ ମାଓୟିନ୍ଙ୍କ ବିଷୟରେ କେହି ପୋଲିସକୁ ସୂଚନା ଦେଇଥିଲେ, ସେତେବେଳେ ଡିଏନ୍ଏ ପରୀକ୍ଷା କରାଯାଇଥିଲା। ଯାହା ତାଙ୍କ ମାତାପିତାଙ୍କୁ ନିଶ୍ଚିତ କରିଥିଲା। ଏକ ଦାମ୍ପତ୍ୟ ଜୀବନ ବିତାଉଥିବା ମାଓୟିନ୍ ତାଙ୍କ ଘରୁ ପ୍ରାୟ ୭୦୦ କିଲୋମିଟର ଦୂରରେ ଥିବା ଚେଙ୍ଗଡୁ ନାମକ ଏକ ସହରରେ ରହୁଥିଲେ। ମାଓୟିନ୍ଙ୍କୁ ଅପହରଣକାରୀମାନେ ମାତ୍ର ୬୪ ହଜାର ଟଙ୍କାରେ ଏକ ଦମ୍ପତିଙ୍କୁ ବିକ୍ରି କରି ଦେଇଥିଲେ। ଏହି ଦମ୍ପତିଙ୍କର ମଧ୍ୟ କୌଣସି ସନ୍ତାନସନ୍ତତି ନ ଥିଲେ।
