ଚିତ୍ରଡ଼ା, ୬ା୭(ଡି.ଏନ୍.ଏ.)-ମୟୂରଭଞ୍ଜ ଜିଲା ମୋରଡ଼ା ବ୍ଲକ ଭାଲିଆଡ଼ିହା ପଞ୍ଚାୟତ ଅନ୍ତର୍ଗତ କେନ୍ଦୁଚାଟିଆ ଗ୍ରାମର ଚାମଟୁ ବିନ୍ଧାଣିଙ୍କ ପରିବାର ସରକାରୀ ସହାୟତାରୁ ବଞ୍ଚିତ ହୋଇ ଦୟନୀୟ ଭାବେ ଜୀବନ ବିତାଉଛନ୍ତି। ରାଶନ କାର୍ଡ ଥାଇ ମଧ୍ୟ ସୁବିଧା ପାଉନାହାନ୍ତି। ଆବାସ ଯୋଜନାରେ ଘର ଖଣ୍ଡେ ମିଳି ନ ଥିବାରୁ ମୁଣ୍ଡ ଗୁଞ୍ଜିବାକୁ ହୀନସ୍ତା ହେଉଛନ୍ତି। ଦିନବେଳା ଯେତତେନ ଚଳିଯାଉଥିବା ବେଳେ ରାତିରେ ଭୟଭୀତ ଅବସ୍ଥାରେ ପରିବାର ସହ ରହୁଛନ୍ତି।
ଚାମଟୁଙ୍କ ପ୍ରଥମ ସ୍ତ୍ରୀ କୌଣସି କାରଣରୁ ବାପ ଘରକୁ ଚାଲି ଯିବାପରେ ୨୦୦୨ରେ ସେ ଜଣେ ଦୃଷ୍ଟିହୀନ ମହିଳାଙ୍କୁ ଦ୍ୱିତୀୟ ବିବାହ କରିଥିଲେ। ଦ୍ୱିତୀୟ ସ୍ତ୍ରୀଙ୍କୁ ଧରି ଗାଁ ମୁଣ୍ଡ ବିଲରେ ଛୋଟ କୁଡ଼ିଆଟିଏ କରି ସେଠାରେ ରହି ଆସୁଛନ୍ତି। ଜଙ୍ଗଲରୁ କାଠ ଆଣି ଖଟ ତିଆରି କରି ଗାଁରେ ବିକି ଗୁଜୁରାଣ ମେଣ୍ଟାଉଛନ୍ତି। ରାଶନକାର୍ଡରେ ସମସ୍ତଙ୍କ ନାଁ ଥିବା ବେଳେ ରାଶନ ସାମଗ୍ରୀ ତାଙ୍କ ପ୍ରଥମ ସ୍ତ୍ରୀ ନେଉଛନ୍ତି। ଫଳରେ ଦ୍ୱିତୀୟ ସ୍ତ୍ରୀ ଫୁଲମଣି ଓ ୩ ଝିଅ ଏଥିରୁ ବଞ୍ଚିତ ହେଉଥିବା ଚାମଟୁ କହିଛନ୍ତି। ୩ ଝିଅଙ୍କ ମଧ୍ୟରୁ ସାନ ଝିଅ ଦିବ୍ୟାଙ୍ଗ। ତାଙ୍କ ଚିକିତ୍ସା ପାଇଁ ଦୃଷ୍ଟିହୀନ ସ୍ତ୍ରୀ ପାଉଥିବା ଭତ୍ତା ଟଙ୍କା ଖର୍ଚ୍ଚ ହେଉଛି। ତାଙ୍କ ଚାଳଘର ଗତ ଅମ୍ଫନ ବାତ୍ୟାରେ ଭାଙ୍ଗିରୁଜି ଯାଇ ଏବେ ମାଟିରେ ମିଶିବାକୁ ବସିଲାଣି। ପ୍ରଥମ ସ୍ତ୍ରୀ ଓ ପୁଅଠାରୁ ରାଶନକାର୍ଡ ଅଲଗା କରି ଦ୍ୱିତୀୟ ସ୍ତ୍ରୀଙ୍କ ପରିବାର ସହିତ ଏକ ନୂତନ ରାଶନକାର୍ଡ ପାଇଁ ସେ ପ୍ରଶାସନଠାରେ ନିବେଦନ କରିଛନ୍ତି। ବିଭିନ୍ନ ସମୟରେ ବ୍ଲକ କାର୍ଯ୍ୟାଳୟକୁ ଦୌଡ଼ି ନୟାନ୍ତ ହୋଇଥିଲେ ମଧ୍ୟ ଚାମଟୁଙ୍କୁ ପ୍ରଧାନମନ୍ତ୍ରୀ ଆବାସ କିମ୍ବା ବିଜୁ ପକ୍କା ଘରଟିଏ ମିଳିପାରି ନାହିଁ। ଏନେଇ ଭାଲିଆଡ଼ିହା ପଞ୍ଚାୟତ ନିର୍ବାହୀ ଅଧିକାରୀ ପର୍ଶୁରାମ ମହାନ୍ତଙ୍କୁ ପଚାରିବାରୁ ରାଶନକାର୍ଡର ସମସ୍ୟା ଆଗାମୀ ୩ଦିନ ମଧ୍ୟରେ ସମାଧାନ କରାଯିବ ବୋଲି କହିଛନ୍ତି। ପ୍ରଧାନମନ୍ତ୍ରୀ ଆବାସ ଯୋଜନାରେ ଘର ପାଇବା ପାଇଁ ସେ ଦରଖାସ୍ତ କରି ନ ଥିବାରୁ ତାଲିକାରେ ତାଙ୍କ ନାମ ନାହିଁ । ତେବେ ବିଜୁ ପକ୍କାଘର ନିମନ୍ତେ ବିଡ଼ିଓଙ୍କୁ ଜଣାଇ ଶୀଘ୍ର ସମସ୍ୟାର ସମାଧାନ କରିବାକୁ ଚେଷ୍ଟା କରିବେ ବୋଲି ପଞ୍ଚାୟତ ନିର୍ବାହୀ ଅଧିକାରୀ କହିଛନ୍ତି।
