ବ୍ରହ୍ମପୁର ଅଫିସ,୩ା୬-ପ୍ରଥମକରି ଯାତ୍ରୀଙ୍କୁ ନେଇ ସିକନ୍ଦରାବାଦରୁ ହାଓଡ଼ା ଅଭିମୁଖେ ବାହାରିଥିବା ଫଲକନାମା ଏକ୍ସପ୍ରେସ୍ ମଙ୍ଗଳବାର ବ୍ରହ୍ମପୁର ଷ୍ଟେଶନରେ ପହଞ୍ଚିଥିଲା। ସେଥିରୁ ୩୬ ଜଣ ଯାତ୍ରୀ ବ୍ରହ୍ମପୁର ରେଳାଷ୍ଟେଶନରେ ଓହ୍ଲାଇଥିଲେ। ସେହିପରି ହାଓଡା ଅଭିମୁଖେ ୭ ଯାତ୍ରୀ ଉକ୍ତ ଟ୍ରେନରେ ଚଢିଥିଲେ ବୋଲି ଷ୍ଟେଶନ ମାଷ୍ଟର ଦୁର୍ଗା ପ୍ରସାଦ ବ୍ରହ୍ମା ସୂଚନା ଦେଇଛନ୍ତି। ସେହିପରି ମଙ୍ଗଳବାର ବିଳମ୍ବିତ ରାତିରେ ମୁମ୍ବାଇ-ଭୁବନେଶ୍ୱର କୋଣାର୍କ ଏକ୍ସପ୍ରେସ ବ୍ରହ୍ମପୁର ଦେଇ ଭୁବନେଶ୍ୱର ଅଭିମୁଖେ ଯିବ ବୋଲି ଜଣାପଡିଛି। ଏଥିରେ ଥିବା କେତେକ ଯାତ୍ରୀ ବ୍ରହ୍ମପୁର ଷ୍ଟେଶନରେ ଓହ୍ଲାଇବେ ବୋଲି ବ୍ରହ୍ମା କହିଛନ୍ତି। ଫଲକନାମା ଟ୍ରେନରେ ଆସି ବ୍ରହ୍ମପୁରରେ ଓହ୍ଲାଇଥିବା ଯାତ୍ରୀମାନଙ୍କୁ ସ୍କ୍ରିନିଂ କରାଯାଇ ବାହାରକୁ ଛଡା ଯାଇଥିଲା। ସେହିପରି ଉକ୍ତ ଟ୍ରେନରେ ବ୍ରହ୍ମପୁରରୁ ଯାତ୍ରା କରିବା ପାଇଁ ଅପେକ୍ଷା କରିଥିବା ଯାତ୍ରୀଙ୍କ ମଧ୍ୟ ସ୍କ୍ରିନିଂ କରାଯାଇଥିଲା। ସାମାଜିକ ଦୂରତ୍ୱ ପାଳନ ଦୃଷ୍ଟିରୁ ଟ୍ରେନରେ ଶତକଡା ୫୦ ଯାତ୍ରୀ ସଂରକ୍ଷିତ ବଗିରେ ଯାତ୍ରା କରିଥିଲେ ବୋଲି ସେ କହିଛନ୍ତି। ସେହିପରି ବୁଧବାର ଉଭୟ ଟ୍ରେନ ବ୍ରହ୍ମପୁର ଦେଇ ମଧ୍ୟ ଯାତ୍ରା କରିବ ବୋଲି ସେ କହିଛନ୍ତି। ଟ୍ରେନ ଚଳାଚଳ ସାମାନ୍ୟ ସ୍ବାଭାବିକ ହୋଇଥିବାରୁ ଦୀର୍ଘ ଦିନ ଧରି ଲକ୍ଡାଉନ୍ ଯୋଗୁ ବିଭିନ୍ନ ସ୍ଥାନରେ ଅଟକି ରହିଥିବା ଲୋକମାନେ ନିଜ ଘରକୁ ଫେରିଛନ୍ତି।
