ଭୁବନେଶ୍ୱର,୧୬ା୫ (ବ୍ୟୁରୋ): ‘ଆତ୍ମନିର୍ଭର ଭାରତ’ ପାଇଁ କେନ୍ଦ୍ର ସରକାର ପ୍ରତିଦିନ ପ୍ୟାକେଜ ଘୋଷଣା କରୁଛନ୍ତି। ହେଲେ ଏହା ଏକ ଋଣ ବିକ୍ରି ବିଜ୍ଞାପନ କହିଲେ ଅତ୍ୟୁକ୍ତି ହେବ ନାହିଁ ବୋଲି ଓଡ଼ିଶା ପ୍ରଦେଶ କଂଗ୍ରେସ କମିଟି (ପିସିସି) ସଭାପତି ନିରଞ୍ଜନ ପଟ୍ଟନାୟକ କହିଛନ୍ତି।
ଶୁକ୍ରବାର ଏକ ପ୍ରେସ୍ ବିଜ୍ଞପ୍ତି ଜରିଆରେ ନିରଞ୍ଜନ କହିଛନ୍ତି ଯେ, ପ୍ରତିଦିନ କିଛି ପ୍ରଚାର କରିବା ହେଲା କେନ୍ଦ୍ର ସରକାରଙ୍କ ଆଭିମୁଖ୍ୟ। ଯେତିକି ପ୍ୟାକେଜ ଅର୍ଥମନ୍ତ୍ରୀ ନିର୍ମଳା ସୀତାରାମନ ଘୋଷଣା କରିଛନ୍ତି ସେଥିରୁ ମନେହେଉଛି ୯୦ରୁ ୯୫ ପ୍ରତିଶତ ଋଣ ଏବଂ ୫ ରୁ ୧୦ ପ୍ରତିଶତ ସାହାଯ୍ୟ। ସରକାର ନିଜେ କହିଛନ୍ତି, ଦେଶରେ ୮କୋଟି ପ୍ରବାସୀ ଶ୍ରମିକ ଅଛନ୍ତି। ଏତଦ୍ବ୍ୟତୀତ ସହର ଓ ଗଁ। ଗଣ୍ଡାରେ କିଛି ବିନା ରାଶନ କାର୍ଡଧାରୀ ଅଛନ୍ତି। ଏପରି ବ୍ୟକ୍ତିଙ୍କର ୧୦ କେଜି ଚାଉଳ ଓ ୨ କେଜି ଡାଲିରେ ଦୁଃଖ ଯିବକି ବୋଲି ନିରଞ୍ଜନ ପ୍ରଶ୍ନ କରିଛନ୍ତି। ସେହିପରି ରାସ୍ତାକଡର ଛୋଟ ଦୋକାନୀମାନଙ୍କ ରୋଜଗାର ୨ ମାସ ହେଲା ନାହିଁ। ଯଦି ସାହାଯ୍ୟ ମନୋବୃତ୍ତି ଅଛି ସେମାନଙ୍କ ଆକାଉଣ୍ଟକୁ ସିଧାସଳଖ ୫୦୦୦ରୁ ୭,୫୦୦ ଟଙ୍କା ପଠାନ୍ତୁ। ତା’ହେଲେ ସେମାନେ ଚଳିବେ, ବ୍ୟବସାୟ କରିବେ ଏବଂ ଟଙ୍କା ବଜାରକୁ ଆସିବ। ଏହା ନ ହେଲେ ଆଗକୁ ସେମାନଙ୍କ ଅବସ୍ଥା ଆହୁରି ଭୟାନକ ହେବ ବୋଲି ନିରଞ୍ଜନ କହିଛନ୍ତି। ସେହିପରି ଖବରଦାତାମାନେ ଯେଉଁଭଳି ନିଜ ଜୀବନକୁ ବାଜି ଲଗାଇ ଦିନରାତି କୋଭିଡ୍-୧୯ ଖବର ପରିବେଷଣ କରୁଛନ୍ତି, ତାହାକୁ ଯେତେ ପ୍ରଶଂସା କଲେ ବି ଊଣା ପଡ଼ିବ। ତେଣୁ ଖବରଦାତାମାନଙ୍କ ପାଇଁ ୧୫ ଲକ୍ଷ ନୁହେଁ ବରଂ ୫୦ ଲକ୍ଷ ଟଙ୍କାର ବୀମା ସହାୟତା ପ୍ରଦାନ କରାଯାଉ ବୋଲି ନିରଞ୍ଜନ ଦାବି କରିଛନ୍ତି।
