ମୁମ୍ବାଇ,୧୪।୩: କରୋନା ଭାଇରସ୍ ସାରା ବିଶ୍ୱ ପାଇଁ ଚିନ୍ତାର କାରଣ ପାଲଟିଥିବା ବେଳେ ଏହାକୁ ନେଇ ଲୋକେ ଭୟଭୀତ ଅବସ୍ଥାରେ ରହିଛନ୍ତି। ଏପରିକି ହସ୍ପିଟାଲରେ ଏକୁଟିଆ ସଂକ୍ରମିତ ରୋଗୀ ନିଜର ଚିକିତ୍ସା କରାଉ ନ ଥିବା ବେଳେ ସନ୍ଦିଗ୍ଧ ମଧ୍ୟ ଯାଞ୍ଚ କରିବା ପାଇଁ ଡରୁଛନ୍ତି। କିଛି ଏଭଳି ଘଟଣା ସାମ୍ନାକୁ ଆସିଛି ମହାରାଷ୍ଟ୍ରର ନାଗପୁରରେ। ନାଗପୁରର ଏକ ହସ୍ପିଟାଲରେ କରୋନା ଭାଇରସ୍ର ୫ଜଣ ସନ୍ଦିଗ୍ଧ ଶୁକ୍ରବାର ବିଳମ୍ବିତ ରାତିରେ ଫେରାର ହୋଇଯାଇଥିବା ଜଣାପଡ଼ିଛି। ଏହାପରେ ନାଗପୁରରେ ହାଇ ଆଲର୍ଟ ଘୋଷଣା କରାଯାଇ ସନ୍ଦିଗ୍ଧଙ୍କ ଖୋଜୁଛି ପୋଲିସ। ସୂଚନାଯୋଗ୍ୟ, ନାଗପୁରର ଇନ୍ଦିରା ଗାନ୍ଧୀ ମେଡିକାଲ କଲେଜ ଓ ହସ୍ପିଟାଲରେ କରୋନାର ୫ଜଣ ସନ୍ଦିଗ୍ଧଙ୍କୁ ଭର୍ତ୍ତି କରାଯାଇଥିଲା। ସଂକ୍ରମଣ ଯାଞ୍ଚ ପାଇଁ ସେମାନଙ୍କୁ ଅଲଗା ଅଇସୋଲେଶନ୍ ଓ୍ବାର୍ଡରେ ରଖାଯାଇଥିଲା। କିନ୍ତୁ ଭୟଭୀତ ହୋଇ ସେମାନେ ଶୁକ୍ରବାର ରାତିରେ ସେଠାରୁ ଫେରାର ହୋଇଯାଇଛନ୍ତି। ଏହି ଘଟଣାରେ ପୋଲିସ ତଦନ୍ତ ଜାରି ରଖିବା ସହ ସହରରେ ବ୍ୟାପକ ପୋଲିସ ଫୋର୍ସ ମୁତୟନ କରି ସେମାନଙ୍କ ଠିକଣା ଖୋଜୁଛି। ସୂଚନା ମୁତାବକ ନାଗପୁରରେ କରୋନା ଭାଇରସ୍ ୩ଟି ମାମଲା ଚିହ୍ନଟ ହୋଇଛି। ଏହାକୁ ମିଶାଇ ମହାରାଷ୍ଟ୍ରରେ ସଂକ୍ରମିତଙ୍କ ସଂଖ୍ୟା ୧୧କୁ ବୃଦ୍ଧି ହୋଇଛି।
