ଖଇରା, ୧୭।୨(ଡି.ଏନ.ଏ.)-ପିଲାମାନଙ୍କ ମଧ୍ୟରେ ମା’ବାପାଙ୍କ ପ୍ରତି ଭକ୍ତି ଓ ସମ୍ମାନ ସୃଷ୍ଟି କରିବା ଲକ୍ଷ୍ୟରେ ଖଇରା ବ୍ଲକର ନହଙ୍ଗ ଗ୍ରାମରେ ସୃଷ୍ଟି ହୋଇଥିବା ଶ୍ରବଣ କୁମାର ସଙ୍ଗଠନ ଅଭିନବ ପ୍ରୟାସ କରିଛନ୍ତି। ଶୁକ୍ରବାର ଖଇରା ଦୁର୍ଗାମଣ୍ଡପଠାରେ ମାତା ପିତା ପୂଜନ ସହ ଏକ ସଭା ଆୟୋଜନ କରାଯାଇଥିଲା। ସଙ୍ଗଠନ ସାଧାରଣ ସମ୍ପାଦକ ଗଣେଶ ବିଶ୍ୱାଳ ଓ କୋଷାଧ୍ୟକ୍ଷ ମନୋଜ ବେହେରାଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ୧୦ଜଣ ମା’ବାପାଙ୍କୁ ସେମାନଙ୍କର ପୁଅ ବୋହୂମାନେ ମଞ୍ଚ ଉପରେ ବସାଇ ଗୋଡ ଧୋଇବା ପରେ ଫୁଲ ଚନ୍ଦନ ଦେଇ ପୂଜା କରିଥିଲେ। ଖଇରା ବଜାରକୁ ଆସୁଥିବା ପ୍ରତ୍ୟେକ ବ୍ୟକ୍ତି ଏହି କାର୍ଯ୍ୟକୁ ଧୈର୍ଯ୍ୟର ସହ ଦେଖିଥିଲେ ା ପରେ ଅବସରପ୍ରାପ୍ତ ଅଧ୍ୟକ୍ଷ ପ୍ରଫେସର ଉମେଶ ଚନ୍ଦ୍ର ନାୟକଙ୍କ ପୌରୋହିତ୍ୟରେ ଆୟୋଜିତ ସଭାରେ ପଣ୍ଡିତ କୃଷ୍ଣଚନ୍ଦ୍ର ପତ୍ରୀ, ଚିନ୍ତାମଣି ସାହାଣି, ଦେବେନ୍ଦ୍ର ରାଉତ, ସନାତନ ବେହେରା, ବୁଦ୍ଧିରାମ ପାଣିଗ୍ରାହୀ, କୈଳାସ ପୃଷ୍ଟି ପ୍ରମୁଖ ଅତିଥି ଭାବେ ଯୋଗଦେଇ ମାତା ପିତା ଜୀବନ୍ତ ଦେବତା। ସେମାନଙ୍କର ଆଶୀର୍ବାଦ ଅସମ୍ଭବକୁ ସମ୍ଭବ କରି ଦେଇପାରିବ ବୋଲି ଅତିଥିମାନେ ପ୍ରକାଶ କରିଥିଲେ। ବିଶିଷ୍ଟ ପ୍ରବଚକ ସୁଶାନ୍ତ ବେହେରା ନିଜ ବକ୍ତବ୍ୟରେ ବର୍ତ୍ତମାନ ଅବକ୍ଷୟମୁଖୀ ସମାଜରେ ଏଭଳି ମହତ କାର୍ଯ୍ୟରେ ଲିପ୍ତ ଥିବା ଯୁବଗୋଷ୍ଠୀଙ୍କ ଚଲାପଥ କସୁମିତ ହେବ ବୋଲି କହିଥିଲେ। ସଙ୍ଗଠନର ଉପସଭାପତି ମନମୋହନ ସ୍ବାଇଁ, ଉପଦେଷ୍ଟା କିଶୋରୀ ମୋହନ ମହାନ୍ତି, ଭାସ୍କର ମହାପାତ୍ର, ବସନ୍ତ କୁମାର ବେହେରା, ଆଲୋକ ନନ୍ଦୀ, ଶ୍ରୀକାନ୍ତ ସାହୁ, ଅଜୟ ରଥ ପ୍ରମୁଖ ଏହି କାର୍ଯ୍ୟକ୍ରମ ପରିଚାଳନାରେ ସହଯୋଗ କରିଥିଲେ।
