ଗଞ୍ଜାମ,୪୧୨(ଡି.ଏନ.ଏ.)-ଗଞ୍ଜାମ ଜିଲା ପୁରୁଣା ବନ୍ଧ ଗ୍ରାମ ନିକଟସ୍ଥ ଋଷିକୁଲ୍ୟା ବେଳାଭୂମିରେ ନଭେମ୍ବରରୁ ଅଲିଭ ରିଡ୍ଲେଙ୍କ ମିଳନ ପ୍ରକ୍ରିୟା ଆରମ୍ଭ ହୋଇଥିଲା। ଏହା ଜାନୁୟାରୀ ୧୫ ପର୍ଯ୍ୟନ୍ତ ଚାଲିବ ବୋଲି ଖଲ୍ଲିକୋଟ ରେଞ୍ଜର ଦିଲୀପ କୁମାର ମାର୍ଥା ସୂଚନା ଦେଇଛନ୍ତି। ପ୍ରତିବର୍ଷ ଫେବୃୟାରୀରେ ଦକ୍ଷିଣା ପବନ ବହିଲେ କଇଁଛମାନେ ଗଣ ଅଣ୍ଡାଦାନ କରିଥାନ୍ତି। ମାତ୍ର ଚଳିତବର୍ଷ ଏଥିରେ ସାମାନ୍ୟ ବ୍ୟତିକ୍ରମ ଦେଖା ଦେଇଛି। ନଭେମ୍ବରରେ କେତେକ କଇଁଛ ଅଣ୍ଡାଦାନ କରିଛନ୍ତି। ୮୦ ରୁ ୮୫ ଅଣ୍ଡା ସଂଗ୍ରହ କରାଯାଇ ଗଞ୍ଜାମ ବ୍ଲକ ରାମଗଡ଼ ପଞ୍ଚାୟତ ପ୍ରୟାଗୀ ବେଳାଭୂମିରେ ନିର୍ମିତ ହାଚେରୀରେ ରଖାଯାଇଛି। ବର୍ତ୍ତମାନ ସମୁଦ୍ର ବେଳାଭୂମିଠାରୁ ୫ରୁ ୬ କିମି ପରିଧି ମଧ୍ୟରେ ହଜାର ହଜାର କଇଁଛ ମିଳିତ ଭାବେ ଭାସମାନ ଅବସ୍ଥାରେ ଦେଖାଯାଉଛି। ଫେବୃୟାରୀରେ ଗଣ ଅଣ୍ଡାଦାନ ପ୍ରକ୍ରିୟା ଆରମ୍ଭ ହେବ। ଏଥିପାଇଁ ପ୍ରୟାଗୀ, ପୋଡ଼ମପେଟା, ପୁରୁଣାବନ୍ଧ ଓ ଗୋଖରକୁଦା ନିକଟ ବେଳାଭୂମିରେ ୪ଟି ହାଚେରୀ ନିର୍ମାଣ କରାଯାଇଛି। କଇଁଛଙ୍କ ସୁରକ୍ଷା ଲାଗି ଋଷିକୁଲ୍ୟା ବେଳାଭୂମିରୁ ପ୍ରୟାଗୀ ପର୍ଯ୍ୟନ୍ତ ବ୍ୟାରିକେଡ ନିର୍ମାଣ ହେବା ସହ ସମସ୍ତ ବ୍ୟବସ୍ଥା କରାଯାଇଥିବା ସେ କହିଛନ୍ତି। ଫେବୃୟାରୀରେ ଦକ୍ଷିଣା ପବନ ବହିଲେ କଇଁଛମାନଙ୍କ ଗଣ ଅଣ୍ଡାଦାନ ଆରମ୍ଭ ହେବ। ଏଥିପାଇଁ ୬ଟି କ୍ୟାମ୍ପରେ ପ୍ରାୟ ୨୪ ବନ କର୍ମଚାରୀଙ୍କୁ ନିୟୋଜିତ କରାଯାଇଛି। କଇଁଛଙ୍କ ମିଳନ ପ୍ରକ୍ରିୟା ଅବ୍ୟାହତ ରହିଥିବାରୁ ପାଟ୍ରୋଲିଂ ମଧ୍ୟ ଜାରି ରହିଛି। ଉତ୍ତର ଦିଗରେ ଥିବା ପ୍ରୟାଗୀ ଓ ଦକ୍ଷିଣ ଦିଗରେ ଥିବା ଆର୍ଯ୍ୟପଲ୍ଲୀ ପର୍ଯ୍ୟନ୍ତ ସମୁଦ୍ର ଅଞ୍ଚଳକୁ ବନ ବିଭାଗ ପକ୍ଷରୁ ନିଷିଦ୍ଧାଞ୍ଚଳ ଘୋଷଣା କରାଯାଇଛି।
