ମୁମ୍ବାଇ,୩।୧୧: ମହାରାଷ୍ଟ୍ର ରାଜନୀତି ଏବେ ରୋଚକ ହେବାରେ ଲାଗିଛି। ସରକାର ଗଠନକୁ ନେଇ ଭାଜପା-ଶିବସେନା ମଧ୍ୟରେ ଗଣିତ ଛିଡି ପାରୁ ନ ଥିବା ବେଳେ ଏବେ ଶିବସେନା-ଏନ୍ସିପି ମଧ୍ୟରେ ମେସେଜ୍ ପଲିଟିକ୍ସ ଆରମ୍ଭ ହୋଇଯାଇଛି। ଏନ୍ସିପି ନେତା ଅଜିତ ପାଓ୍ବାର କହିଛନ୍ତି ତାଙ୍କ ନିକଟକୁ ଶିବସେନା ନେତା ସଞ୍ଜୟ ରାଉତ ଏକ ମେସେଜ୍ ପଠାଇଛନ୍ତି। ଗଣମାଧ୍ୟମକୁ ସେ ସେହି ମେସେଜଟି ଦେଖାଇଥିବା ବେଳେ ଉକ୍ତ ମେସେଜରେ ‘ଜୟ ମହାରାଷ୍ଟ୍ର’ ବୋଲି ଲେଖାଯାଇଥିବା ସେ ଦର୍ଶାଇଛନ୍ତି। ତେବେ ସେ ଏକ ମିଟିଂରେ ଥିବାରୁ ଏହାର ଉତ୍ତର ଦେଇ ପାରି ନ ଥିବା କହିଛନ୍ତି। ଆଉ ମହାରାଷ୍ଟ୍ର ବିଧାନସଭା ନିର୍ବାଚନ ପରେ ଏହା ତାଙ୍କ ପାଖକୁ ସଞ୍ଜୟଙ୍କ ପ୍ରଥମ ମେସେଜ୍ ବୋଲି ସେ କହିଛନ୍ତି। ପାଓ୍ବାର କହିଛନ୍ତି ଯଦି ସଞ୍ଜୟ କହୁଛନ୍ତି ତାଙ୍କ ପାଖରେ ୧୭୦ ବିଧାୟକଙ୍କ ସମର୍ଥନ ଅଛି ତେବେ ସେ ଏହାର ତଥ୍ୟ ଦେବା ଦରକାର। ଆମ ପାଖରେ ୧୧୦ ଅଛି ବୋଲି ପାଓ୍ବାର କହିଛନ୍ତି। ଏପଟେ ଏନ୍ସିପି-କଂଗ୍ରେସ ସହ ମେଣ୍ଟ କରି ନିର୍ବାଚନ ଲଢିଥିଲା। ତେଣୁ ଏବେ ନିଷ୍ପତ୍ତି କେବଳ ଏନ୍ସିପି ନେଇ ପାରିବ ନାହିଁ। ଯାହାବି ହେବ ଏନ୍ସିପି-କଂଗ୍ରେସ ମିଳିତ ଭାବେ ନିଷ୍ପତ୍ତି ନେବେ ବୋଲି ସେ କହିଛନ୍ତି। ଅନ୍ୟପଟେ ଶିବସେନା-ଭାଜପା ସହ ମେଣ୍ଟ କରି ନିର୍ବାଚନ ଲଢିଥିଲା। ତେଣୁ ଏବେ ଏହି ମେଣ୍ଟ ସରକାର ଗଢିବା କଥା। ତେବେ ଶିବସେନା ସହ ମେଣ୍ଟକୁ ନେଇ ପାଓ୍ବାର କହିଛନ୍ତି ସୋମବାର ମହାରାଷ୍ଟ୍ର ବିଧାନସଭା ପାଇଁ ଏକ ଗୁରୁତ୍ୱପୂର୍ଣ୍ଣ ଦିନ। କାରଣ ସୋମବାର ଏନ୍ସିପି ମୁଖ୍ୟ ଶରଦ ପାଓ୍ବାର ଦିଲ୍ଲୀ ଯାଇ କଂଗ୍ରେସର ଅସ୍ଥାୟୀ ଅଧ୍ୟକ୍ଷା ସୋନିଆ ଗାନ୍ଧୀଙ୍କୁ ଭେଟିବା ପରେ ଯାହା ନିଷ୍ପତ୍ତି ନିଆଯିବ।
