ବ୍ରସେଲ୍ସ,୧୭।୮: ବେଲଜିୟମ୍ରେ ଶ୍ରମିକମାନେ ଏକ ସ୍ବେରେଜ ଲାଇନ୍ ଖୋଳୁଥିବା ସମୟରେ ବିପୁଳ ପରିମାଣର ସୁନା ବିସ୍କୁଟ ଏବଂ ଦୁର୍ଲଭ ମୁଦ୍ରା ପାଇଛନ୍ତି। ବ୍ରସେଲ୍ସଠାରୁ ପ୍ରାୟ ୩୦ କିଲୋମିଟର ଉତ୍ତର-ପଶ୍ଚିମରେ ଅବସ୍ଥିତ ସିଣ୍ଟ୍ ଗିଲିସ ଡେଣ୍ଡରମୋଣ୍ଡେଠାରେ ଭୂତଳ ପାଇପ୍ ବଦଳାଇବା କାମ ଚାଲିଥିବା ସମୟରେ ଏହି ଗୁପ୍ତଧନ ମିଳିଛି, ଯାହାର ଆନୁମାନିକ ମୂଲ୍ୟ ପ୍ରାୟ ୯ ମିଲିୟନ ୟୁରୋ (ଅର୍ଥାତ୍ ୯୮ କୋଟି ଟଙ୍କା) ହେବ। ଶ୍ରମିକ ଭାବେ କାମ କରୁଥିବା କୋବେ ନାମକ ଜଣେ ୧୮ବର୍ଷୀୟ ଯୁବକ ଗତ ମଙ୍ଗଳବାର ଏହାକୁ ପାଇଥିବା ‘ଦ ଗାର୍ଡିଆନ’ରେ ଏକ ରିପୋର୍ଟ ପ୍ରକାଶ ପାଇଛି।
ବେଲଜିୟମର ଟିଭି ନେଟୱର୍କକୁ ସୂଚନା ଦେଇ କୋବେ କହିଛନ୍ତି, ସେ ସହକର୍ମୀମାନଙ୍କ ସହ ସ୍ବେରେଜ ନିର୍ମାଣ କାମ କରୁଥିବାବେଳେ ସେଠାରେ କିଛି ପଡ଼ିଥିବା ଦେଖିବାକୁ ମିଳିଥିଲା। ପ୍ରଥମେ ଏହା ୟୁରୋ କଏନ୍ ବୋଲି ଜଣାପଡ଼ିଥିଲା। ପରେ ଏକ ସୁନା ବିସ୍କୁଟ ମିଳିଥିଲା। ତା’ପରେ ଅଧିକ ଖୋଳିବାରୁ ବହୁତ ସୁନା ବିସ୍କୁଟ ଏବଂ ମୁଦ୍ରା ମିଳିଥିଲା। ଉକ୍ତ ସୁନା ବିସ୍କୁଟରେ କିଛି ନମ୍ବର ଲେଖା ହୋଇଥିଲା। ୧୯ଶ ଶତକର ଶେଷ ଭାଗରେ ଜଣେ ମଦ କାରଖାନା ମାଲିକ ‘ଥିଓଫିଲ୍ସ ଭାନ୍ ଆସେ’ଙ୍କ ପାଇଁ ନିର୍ମିତ ଏକ ବିଶାଳ ପ୍ରାସାଦର ମାଟିତଳ କାନ୍ଥ ଭିତରେ ଏହାକୁ ଏକ ବ୍ୟାଗ ଭିତରେ ଲୁଚାଇ ରଖାଯାଇଥିବା କୋବେ କହିଛନ୍ତି। ମିଳିଥିବା ତଥ୍ୟ ଅନୁସାରେ, ଉକ୍ତ ସ୍ଥାନରେ ୧୮୯୯ରୁ ୧୯୭୦ ପର୍ଯ୍ୟନ୍ତ ମଦ ପ୍ରସ୍ତୁତି କରାଯାଉଥିଲା। ଏହି ଐତିହାସିକ ସମ୍ପତ୍ତି, ଯାହାର ଲୁହା ଗେଟ୍ରେ ଏବେ ମଧ୍ୟ ତାଙ୍କ ନାମର ପ୍ରାରମ୍ଭିକ ଅକ୍ଷର ଭିଏ ଲେଖାଅଛି। ଉକ୍ତ ପୁରାତନ ପ୍ରାସାଦକୁ ଏବେ ସାମାଜିକ କଲ୍ୟାଣ ସଂଗଠନ ଦ୍ୱାରା ନବୀକରଣ କରାଯାଉଛି।
ଏହି ସୁନା ବିସ୍କୁଟ ଏବଂ ମୁଦ୍ରା ମିଳିବା ପରେ ଅଧିକାରୀମାନେ ତୁରନ୍ତ ସେହି ସ୍ଥାନକୁ ନିଜ ନିୟନ୍ତ୍ରଣକୁ ନେବା ସହ ଗୁପ୍ତଧନକୁ ବ୍ରସେଲ୍ସର ଏକ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରିଛନ୍ତି। ବର୍ତ୍ତମାନ ଏହାର ପ୍ରକୃତ ଉତ୍ସ ଏବଂ ଆଇନଗତ ମାଲିକାନା ନିର୍ଦ୍ଧାରଣ କରିବା ପାଇଁ ଅଧିକାରୀମାନେ ତଦନ୍ତ ଆରମ୍ଭ କରିଛନ୍ତି। ପୂର୍ବ ଫ୍ଲାଣ୍ଡର୍ସ ପ୍ରସିକ୍ୟୁଟର ଅଫିସର ହାନେ ଓଲେଭିୟର କହିଛନ୍ତି, ମିଳିଥିବା ସୁନାଗୁଡ଼ିକ ଚୋରି କିମ୍ବା କୌଣସି ଅପରାଧ ସହ ଜଡ଼ିତ ନାହିଁ ବୋଲି ତଦନ୍ତକାରୀମାନେ ପ୍ରଥମେ ନିଶ୍ଚିତ କରିବା ଆବଶ୍ୟକ। ଏହି ସୁନା ଉପରେ ଦାବି କରିବାକୁ ଥିବା ସମ୍ଭାବ୍ୟ ବ୍ୟକ୍ତିମାନଙ୍କ ମଧ୍ୟରେ କୋଠା ନିର୍ମାଣ କରୁଥିବା ଠିକାଦାର, ସାମାଜିକ କଲ୍ୟାଣ ସଂଗଠନ ଏବଂ ଭାନ୍ ଆସେ ପରିବାରର ବଂଶଧରମାନେ ସାମିଲ ଅଛନ୍ତି। ବେଲଜିୟମର ଆଇନ ଅନୁଯାୟୀ, ଗୁପ୍ତଧନ ପାଇଥିବା କୌଣସି ବ୍ୟକ୍ତିଙ୍କୁ ପ୍ରକୃତ ଦାବିଦାର ବା ମାଲିକ ଆସିବା ପାଇଁ ସର୍ବନିମ୍ନ ପାଞ୍ଚ ବର୍ଷ ଅପେକ୍ଷା କରିବାକୁ ପଡ଼ିବ। କୋବେ କହିଛନ୍ତି, ଅଳ୍ପ ସଂଖ୍ୟକ ସୁନା ବିସ୍କୁଟ କିମ୍ବା ମୁଦ୍ରା ମିଳିଥିଲେ, ଏହାକୁ ଆମେ ରଖିବା କଥା ଚିନ୍ତା କରିଥାନ୍ତୁ। ହେଲେ ଅଧିକ ପରିମାଣର ଥିବାରୁ ସରକାରଙ୍କୁ ଏହା ସ୍ଥାନାନ୍ତର କରାଯାଇଛି। ଆଶା ଯେ, ଏଥିପାଇଁ କିଛି ପୁରସ୍କାର ଆମକୁ ମିଳିପାରେ ବୋଲି କୋବେ କହିଛନ୍ତି।
