ନୂଆଦିଲ୍ଲୀ,୪।୬: ଫିଟମେଣ୍ଟ ଫ୍ୟାକ୍ଟର ଏବଂ ମହଙ୍ଗା ଭତ୍ତା (DA) ବୃଦ୍ଧି ବ୍ୟତୀତ, ଏଥର ୮ମ ବେତନ କମିଶନ (8th Pay Commission) ଆଲୋଚନାରେ ଅବସରପ୍ରାପ୍ତ କେନ୍ଦ୍ରୀୟ କର୍ମଚାରୀଙ୍କ ପାଇଁ ନୂତନ ପେନସନ ବ୍ୟବସ୍ଥା ମଧ୍ୟ ଏକ ବଡ଼ ପ୍ରସଙ୍ଗ ସାଜିଛି। ଅବସର ପରେ ଆର୍ଥିକ ସୁରକ୍ଷାକୁ ନେଇ କେତେକ ଗୁରୁତ୍ୱପୂର୍ଣ୍ଣ ପରାମର୍ଶ ଦିଆଯାଉଛି।
ନ୍ୟାସନାଲ କାଉନସିଲ-ଜଏଣ୍ଟ କନସଲ୍ଟେଟିଭ ମେସିନାରୀ (NC-JCM) ୮ମ ବେତନ କମିଶନଙ୍କୁ ଦେଇଥିବା ନିଜ ସ୍ମାରକପତ୍ରରେ କହିଛି ଯେ, ଅବସର ପରେ ସମ୍ମାନଜନକ ଜୀବନ ବିତାଇବା ଏବଂ ଅତିକମରେ ଦୁଇ ଜଣିଆ ପରିବାରର ଖର୍ଚ୍ଚ ଚଳାଇବା ପାଇଁ ପୂର୍ଣ୍ଣ ପେନସନ ଶେଷ ମାସର ଦରମା କିମ୍ୱା ଶେଷ ୧୦ ମାସର ହାରାହାରି ଦରମାର ୬୭% ହେବା ଉଚିତ। ବର୍ତ୍ତମାନ ଏହା ୫୦% ରହିଛି।
ସଂଗଠନ ପକ୍ଷରୁ ସଂସଦର ଏକ ସ୍ଥାୟୀ କମିଟିର ସୁପାରିଶକୁ ମଧ୍ୟ ଦର୍ଶାଯାଇଛି, ଯେଉଁଥିରେ ପ୍ରତି ପାଞ୍ଚ ବର୍ଷରେ ପେନସନରେ ୫% ଅତିରିକ୍ତ ବୃଦ୍ଧି କରିବାକୁ ପରାମର୍ଶ ଦିଆଯାଇଥିଲା। ଏହି ଅନୁଯାୟୀ ପ୍ରସ୍ତାବିତ ଢାଞ୍ଚା କିଛି ଏହିଭଳି ହୋଇପାରେ:
୬୫ ବର୍ଷ ବୟସରେ: ଶେଷ ଦରମାର ୭୦%
୭୦ ବର୍ଷ ବୟସରେ: ୭୫%
୭ ବର୍ଷ ବୟସରେ: ୮୦%
୮୦ ବର୍ଷ ବୟସରେ: ୮୫%
୮୫ ବର୍ଷ ବୟସରେ:୯୦%
୯୦ ବର୍ଷ ବୟସରେ: ୧୦୦% ପେନସନ
ପୁରୁଣା ପେନସନ ଯୋଜନା (OPS): OPS ରେ ଅବସର ପରେ ଶେଷ ଦରମା ଏବଂ ମହଙ୍ଗା ଭତ୍ତା ଆଧାରରେ ଏକ ନିଶ୍ଚିତ ପେନସନ ମିଳିଥାଏ। ଏହାର ସମ୍ପୂର୍ଣ୍ଣ ଖର୍ଚ୍ଚ ସରକାର ବହନ କରନ୍ତି ଏବଂ କର୍ମଚାରୀଙ୍କୁ ଚାକିରି କାଳ ମଧ୍ୟରେ କୌଣସି ଅଂଶଦାନ ଦେବାକୁ ପଡ଼ିନଥାଏ।
ଜାତୀୟ ପେନସନ ପ୍ରଣାଳୀ (NPS): NPS ଏକ ଅଂଶଦାନ ଭିତ୍ତିକ ଯୋଜନା। ଏଥିରେ କର୍ମଚାରୀ ଏବଂ ସରକାର ଉଭୟ ନିବେଶ କରନ୍ତି। ଅବସର ସମୟରେ ମିଳୁଥିବା ପେନସନ ଜମା ପାଣ୍ଠି ଏବଂ ବଜାରରୁ ମିଳୁଥିବା ରିଟର୍ଣ୍ଣ ଉପରେ ର୍ନିଭର କରେ।
ୟୁନିଫାଇଡ ପେନସନ ସ୍କିମ (UPS): OPS ଏବଂ NPS ମଧ୍ୟରେ ସନ୍ତୁଳନ ରକ୍ଷା କରିବା ପାଇଁ UPS ଅଣାଯାଇଛି। ଏଥିରେ NPS ଭଳି ଅଂଶଦାନ ତ ରହିଥାଏ, କିନ୍ତୁ ଏହାସହ ନିଶ୍ଚିତ ପେନସନର ମଧ୍ୟ ପ୍ରାବଧାନ ରହିଛି।
