ବ୍ରାସିଲିଆ, ୨୯।୬: ଆକାଶରେ ବିଜୁଳି ଚମକିଥାଏ। ତେବେ ଏହା କିଛି ସମୟ ମଧ୍ୟରେ ବନ୍ଦ ହୋଇଯାଇଥାଏ। ସେହିପରି ଏହାର ଲମ୍ବ ମଧ୍ୟ କିଛି କିମି ମଧ୍ୟରେ ରହିଥାଏ। ତେବେ ବ୍ରାଜିଲ୍ରେ ୭୦୯ କିମି ଲମ୍ବର ବିଜୁଳି ରେକର୍ଡ କରାଯାଇଛି। ସେହିପରି ଆର୍ଜେଣ୍ଟିନାରେ ସର୍ବାଧିକ ଅଧିକ ସମୟ ୧୬.୭୩ ସେକେଣ୍ଡ ପର୍ଯ୍ୟନ୍ତ ଚମକିଥିବା ବିଜୁଳି ରେକର୍ଡ ହୋଇଛି। ଏନେଇ ଓ୍ବାଲର୍ଡ ମେଟ୍ରୋଲୋଜିକାଲ ଅର୍ଗାନାଇଜେଶନ(ଡବ୍ଲ୍ୟୁଏମ୍ଓ) ପକ୍ଷରୁ ଏକ ରିପୋର୍ଟ ପ୍ରକାଶ ପାଇଛି। ପୂର୍ବରୁ ଆମେରିକା ଏବଂ ଫ୍ରାନ୍ସ୍ରେ ରେକର୍ଡ ହୋଇଥିବା ବିଜୁଳିର ଲମ୍ବ ଏବଂ ଚମକିବା ସମୟଠାରୁ ଏହା ଅଧିକ ବୋଲି କୁହାଯାଉଛି। ସମଗ୍ର ଆକାଶ ଏହି ବିଜୁଳି ଯୋଗୁ କିଛି ସମୟ ପାଇଁ ଉଜ୍ଜଳ ଆଲୋକରେ ଆଲୋକିତ ହୋଇଉଠିଥିଲା। ପ୍ରକୃତିର ଏଭଳି ବିରଳ ଦୃଶ୍ୟର ଭିଡ଼ିଓ ଶୁଟିଂ କରାଯାଇଥିବା ଡବ୍ଲ୍ୟୁଏମ୍ଓ କହିଛି। ୨୦୧୮ ଅକ୍ଟୋବର ୩୧ରେ ଦକ୍ଷିଣ ବ୍ରାଜିଲ୍ରେ ଏହି ବିଜୁଳ ଦେଖାଯାଇଥିଲା। ସେହିପରି ୨୦୧୯ ମାର୍ଚ୍ଚ ୪ରେ ଉତ୍ତର ଆର୍ଜେଣ୍ଟିନାରେ ସର୍ବାଧିକ ସମୟ ପାଇଁ ଚମକିଥିବା ବିଜୁଳିକୁ ରେକର୍ଡ କରାଯାଇଥିଲା ବୋଲି ଡବ୍ଲ୍ୟୁଏମ୍ଓ ଏକ୍ସପର୍ଟ କମିଟି ପକ୍ଷରୁ ସୂଚନା ଦିଆଯାଇଛି। ୨୦୦୭ରେ ୩୨୧ କିମି ଲମ୍ବ ବିଜୁଳି ଆମେରିକାର ଓକ୍ଲାହୋମ୍ରେ ରେକର୍ଡ କରାଯାଇଥିଲା। ସେହିପରି ୨୦୧୨ରେ ଫ୍ରାନ୍ସ୍ରେ ୭.୭୪ ସେକେଣ୍ଡ ପାଇଁ ଚମକିଥିବା ବିଜୁଳି ରେକର୍ଡ ହୋଇଥିଲା। ୧୯୭୫ରେ ଜିମ୍ବାଓ୍ବେରେ ବିଜୁଳି ଯୋଗୁ ୨୧ ଜଣଙ୍କ ମୃତ୍ୟୁ ଘଟିଥିଲା। ମୃତକମାନେ ଗୋଟିଏ କୁଡ଼ିଆରେ ରହିଥିଲେ। ୧୯୯୪ରେ ବିଜୁଳି ଯୋଗୁ ମିଶରରେ ୪୬୯ ଲୋକଙ୍କ ମୃତ୍ୟୁ ହୋଇଥିବା ଡବ୍ଲ୍ୟୁଏମ୍ଓ ରିପୋର୍ଟ ଉଲ୍ଲେଖ କରାଯାଇଛି।
