ବ୍ରହ୍ମପୁର ଅଫିସ,୨୨।୮: କାମ ଯୋଗାଇଦେବାକୁ କହି ବାହାର ରାଜ୍ୟକୁ ଚାଲାଣ କରାଯାଉଥିବା ୪ ନାବାଳକ ଏବଂ ୨ନାବାଳିକାଙ୍କୁ ସୋମବାର ବ୍ରହ୍ମପୁର ରେଳ ଷ୍ଟେଶନର ୪ ନମ୍ବର ପ୍ଲାଟଫର୍ମରୁ ଉଦ୍ଧାର କରିଛି ଚାଇଲ୍ଡ ଲାଇନ। ରେଳ ଷ୍ଟେଶନ ସ୍ଥିତ ଶିଶୁ ସହାୟତା କେନ୍ଦ୍ର କର୍ମଚାରୀ ଓ ରେଳ ସୁରକ୍ଷାକର୍ମୀଙ୍କ ମିଳିତ ସହଯୋଗରେ ତାଙ୍କୁ ଉଦ୍ଧାର କରାଯାଇଥିଲା। ଉଦ୍ଧାର ନାବାଳକ, ନାବାଳିକା ଆନ୍ଧ୍ରପ୍ରଦେଶ ଓ ସୁରଟ ଯାଉଥିବା ଚାଇଲ୍ଡ ଲାଇନ ପକ୍ଷରୁ କୁହାଯାଇଛି। ଉଦ୍ଧାର ହୋଇଥିବା ସମସ୍ତେ ଗଞ୍ଜାମ ଜିଲାର ହୋଇଥିବା ଜଣାପଡିଛି। ସମସ୍ତ ଉଦ୍ଧାର ନାବାଳକ ଓ ନାବାଳିକାଙ୍କୁ ଜିଲା ଶିଶୁ ମଙ୍ଗଳ କମିଟିରେ ସୋମବାର ହାଜର କରାଯାଇଛି। ପରେ ସେମାନଙ୍କୁ ପରିବାର ଲୋକଙ୍କୁ ହସ୍ତାନ୍ତର କରାଯାଇଛି। ଗତ ୮ମାସ ମଧ୍ୟରେ ବର୍ତ୍ତମାନ ସୁଦ୍ଧା ବାହାର ରାଜ୍ୟକୁ ଚାଲାଣ ହେଉଥିବା ୨୩୫ ଜଣଙ୍କୁ ବ୍ରହ୍ମପୁର ରେଳଷ୍ଟେସନରୁ ଉଦ୍ଧାର କରାଯାଇଛି ବୋଲି ଚାଇଲ୍ଡ ଲାଇନ ହେଲପ୍ ଡେସ୍କର ସଂଯୋଜକ କଲ୍ୟାଣ କୁମାର ସିଂ ସୂଚନା ଦେଇଛନ୍ତି।
