ବଡ଼ବିଲ,୨୯ା୭(ସ୍ବ.ପ୍ର.): କେନ୍ଦୁଝର ଜିଲା ବଡ଼ବିଲ ଥାନା ଅନ୍ତର୍ଗତ ଟଣ୍ଟ ପାର୍କିଂ ଏରିଆରେ ବଡ଼ବିଲ ପୋଲିସ ମଙ୍ଗଳବାର ବିଳମ୍ବିତ ରାତିରେ ଚଢ଼ାଉ କରି ୬ ଜଣ ଜୁଆଡ଼ିଙ୍କୁ ଗିରଫ କରିବା ସହ ସେମାନଙ୍କ ନିକଟରୁ ନଗଦ ୧ଲକ୍ଷ ୭ହଜାର ୭ଶହ ଟଙ୍କା,୪ଟି ମୋବାଇଲ ଓ ୨ ତାସ୍ ସେଟ୍ ଜବତ କରିଥିବା ଜଣାପଡ଼ିଛି। ଏଥିସହିତ ଅଭିଯୁକ୍ତମାନଙ୍କୁ ସରକାରୀ କ୍ବାରାଣ୍ଟାଇନ୍ ସେଣ୍ଟରକୁ ପଠାଯାଇଥିବା ନେଇ ସୂଚନା ଦେଇଛି ପୋଲିସ।
ମିଳିଥିବା ସୂଚନା ଅନୁଯାୟୀ, ଗିରଫ ଅଭିଯୁକ୍ତମାନେ ହେଲେ ବଡ଼ବିଲ ଥାନା କାଶିଆ(ଖ) ଗ୍ରାମ ବୁରୁ ହଟିଂ ଅଞ୍ଚଳର ଶ୍ୟାମ ସୁନ୍ଦର ମୁଣ୍ଡା ଓ ପ୍ରଦୀପ ଓରାମ, କାଶିଆ(ଖ) ଗ୍ରାମର ଉମେଶ ଚନ୍ଦ୍ର ପଲେଇ, ଭଦ୍ରାସାହି ଅଞ୍ଚଳର ରୟା ମୁଣ୍ଡା, ରୁଗୁଡ଼ି ଥାନା ଗୁଆଲି ବସ୍ତି ଅଞ୍ଚଳର ପ୍ରକାଶ ପଲେଇ ଏଂ ରୁଗୁଡ଼ି ଥାନା ଗୁଆଲିସ୍ଥିତ ନୂଆଗାଁ ମାର୍କେଟ ଅଞ୍ଚଳରେ ରହୁଥିବା ତପନ କୁମାର ବାରିକ। ଏ ନେଇ ବଡ଼ବିଲ ପୋଲିସ ଏକ ମାମଲା ରୁଜୁ କରି ଅଭିଯୁକ୍ତମାନଙ୍କୁ ବଡ଼ବିଲ ପିଏଚ୍ ଇଣ୍ଡୋର ଷ୍ଟାଡିୟମ ସରକାରୀ କ୍ୱାରାଣ୍ଟାଇନ୍ ସେଣ୍ଟରକୁ ପଠାଇଥିବା ଜଣାପଡ଼ିଛି। ଅଭିଯୁକ୍ତମାନଙ୍କର କରୋନା ପରୀକ୍ଷା ନିମନ୍ତେ ସ୍ବାବ୍ ସଂଗ୍ରହ କରାଯିବ ବୋଲି ପୋଲିସ ସୂଚନା ଦେଇଛି।
