ନୂଆଦିଲ୍ଲୀ,୨୬।୨ : ବାଲାକୋଟ ଏୟାର ଷ୍ଟ୍ରାଇକ୍କୁ ୪ ବର୍ଷ ପୂରିଛି। ଏହା ଭାରତୀୟ ସେନାର ସାହସିକତାକୁ ସ୍ମରଣ କରାଇ ଦେଇଛି। ୨୦୧୯ ଫେବୃଆରୀ ୨୬ ରେ ପାକିସ୍ତାନର ପାସ୍ତୁନ ଖ୍ବା ସ୍ଥିତ ବାଲାକୋଟରେ ଭାରତୀୟ ବାୟୁସେନା ରାତି ଅଧରେ ଆତଙ୍କବାଦୀଙ୍କ ବେସକୁ ଯୁଦ୍ଧ ବିମାନରେ ଆକ୍ରମଣ କରି ଧ୍ୱଂସ କରିଦେଇଥିଲା। ବାଲାକୋଟ ଏୟାର ଷ୍ଟ୍ରାଇକ ନିଷ୍ପତ୍ତି ରାତାରାତି ନିଆଯାଇ ନ ଥିଲା, ବରଂ ଦେଶରେ ପୁଲୱାମା ଆକ୍ରମଣ ଦିନ ଏହାର ସ୍କ୍ରିପ୍ଟ ଲେଖାଯାଇଥିଲା।
୨୦୧୯ ଫେବୃଆରୀ ୧୪ରେ ଜମ୍ମୁ-କଶ୍ମୀରର ପୁଲୱାମାରେ ପାକିସ୍ତାନୀ ଆତଙ୍କବାଦୀ ସଂଗଠନ ଜୈଶ-ଏ-ମହମ୍ମଦ (ଜେଏମ) ର ଆତଙ୍କବାଦୀମାନେ ଭାରତୀୟ ସେନା କନଭେନ ଉପରେ ଆକ୍ରମଣ କରିଥିଲେ। ଅପରାହ୍ନ ପ୍ରାୟ ୩ଟା ବେଳେ ସିଆରପିଏଫ କର୍ମଚାରୀଙ୍କୁ ନେଇ କିଛି ବସର ଏକ କନଭେନ ଶ୍ରୀନଗର-ଜମ୍ମୁ ରାଜପଥରେ ଯାଉଥିଲା। କନଭେନ ରାଜପଥରେ ଆସିବା ମାତ୍ରେ ଆତ୍ମଘାତୀ ବିସ୍ଫୋରଣକାରୀ ଏକ ବିସ୍ଫୋରକ ଗାଡିରେ ବସକୁ ଧକ୍କା ଦେଇଥିଲା ଏବଂ ବସଟି ଖଣ୍ଡ ଖଣ୍ଡ ହୋଇ ଯାଇଥିଲା। ଭାରତର ୪୦ ଜଣ ଯବାନ ଏଥିରେ ଶହୀଦ ହୋଇଥିଲେ।
ପୁଲୱାମାରେ ଯବାନଙ୍କ ଶହୀଦ ହେବା ପରେ ସାରା ଦେଶରେ ପାକିସ୍ତାନ ପ୍ରତି ପ୍ରତିଶୋଧ ନିଆଁ ଜଳୁଥିଲା। ଦେଶର ପ୍ରତି କୋଣ ଅନୁକୋଣରୁ ପ୍ରତିଶୋଧ ପାଇଁ ଦାବି ହେଉଥିଲା ଏବଂ ଅନେକ ସ୍ଥାନରେ ପ୍ରଦର୍ଶନ ମଧ୍ୟ କରାଯାଇଥିଲା। ଜମ୍ମୁ ହେଉ କିମ୍ବା କନ୍ୟାକୁମାରୀ ହେଉ, ‘ଦେଶ ମାଙ୍ଗେ ବଦଲା’ର ସ୍ଲୋଗାନ ସବୁଆଡେ ଉଠୁଥିଲା।
ଶହୀଦମାନଙ୍କ ବଳିଦାନ ବୃଥା ହେବ ନାହିଁ ଏବଂ ଦୋଷୀମାନଙ୍କୁ ନିଶ୍ଚିତ ଦଣ୍ଡ ଦିଆଯିବ ବୋଲି ପୁଲୱାମା ଆତଙ୍କବାଦୀ ଆକ୍ରମଣର ଗୋଟିଏ ଦିନ ପରେ ମହାରାଷ୍ଟ୍ରରେ ଏକ ରାଲିରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏହି ବିବୃତ୍ତି ଦେଇଥିଲେ। ଏହି ସମାବେଶକୁ ସମ୍ବୋଧିତ କରିବାବେଳେ ପ୍ରଧାନମନ୍ତ୍ରୀ ଦେଶବାସୀଙ୍କୁ ସୂଚାଇ ଦେଇଥିଲେ ଯେ ଏଥର କିଛି ବଡ ଘଟଣା ଘଟିବ। ପ୍ରଧାନମନ୍ତ୍ରୀ କହିଥିଲେ ଯେ ଦେଶବାସୀଙ୍କ ହୃଦୟରେ କ୍ରୋଧ ରହିଛି। ମୋର ଅବସ୍ଥା ମଧ୍ୟ ସେଭଳି ରହିଛି। ଆତଙ୍କବାଦୀଙ୍କ ଅପରାଧର ପ୍ରତିଶୋଧ ନିଆଯିବ ବୋଲି ସେ କହିଥିଲେ। ଏଥିପାଇଁ ସେନାକୁ ସ୍ଥାନ ଓ ସମୟ ସ୍ଥିର କରିବାର ସ୍ବାଧୀନତା ଦିଆଯାଇଛି ବୋଲି କହିଥିଲେ।
ପ୍ରତିଶୋଧର ସମ୍ପୂର୍ଣ୍ଣ ସ୍କ୍ରିପ୍ଟ ପୁଲୱାମା ଆକ୍ରମଣର ୩ ଘଣ୍ଟା ପରେ ପ୍ରସ୍ତୁତ ହୋଇଥିଲା। ୧୨ ଦିନ ପରେ, ୨୬ ଫେବୃଆରୀ ୨୦୧୯ର ଭୋର ସମୟରେ, ମିରାଜ ୨୦୦୦ ଯୁଦ୍ଧ ବିମାନ ବାୟୁସେନାର ଗ୍ବାଲିଅର୍ ଏୟାରବେସରୁ ଇସ୍ରାଏଲ ବୋମା ନେଇ ଉଡ଼ିଥିଲା। ଭୋର ପ୍ରାୟ ୩ ଟା ସମୟରେ ୧୨ଟି ମିରାଜ ବିମାନ ପାକିସ୍ତାନର ରାଡାର ସିଷ୍ଟମକୁ ପ୍ରବେଶ କରି ଜୈଶ-ଏ-ମହମ୍ମଦର ଅନେକ ଆତଙ୍କବାଦୀ ବେସକୁ ଟାର୍ଗେଟ କରି ୨୦୦ଆତଙ୍କବାଦୀଙ୍କୁ ହତ୍ୟା କରିଥିଲା। ଏହି ଅପରେଶନ ର ନାମ ଥିଲା ଅପରେସନ ବନ୍ଦର। ଆତଙ୍କବାଦୀଙ୍କ ବେସରେ ବୋମାମାଡ଼ ମାତ୍ରେ ପାକିସ୍ତାନର ଏଫ୍-୧୬ ବିମାନ ସକ୍ରିୟ ହୋଇଯାଇଥିଲା, କିନ୍ତୁ ସେତେବେଳକୁ ଭାରତୀୟ ସେନା ବିମାନ ସେମାନଙ୍କ କାର୍ଯ୍ୟ କରି ଫେରି ଆସିଥିଲା।
ଏକ ସାକ୍ଷାତକାରରେ ଏୟାର ମାର୍ଶଲ ହରି କୁମାର କହିଥିଲେ ଯେ ପୁଲୱାମା ଆକ୍ରମଣର ମାତ୍ର ୩ ଘଣ୍ଟା ପରେ ପ୍ରତିଶୋଧ ଯୋଜନା ହୋଇଥିଲା। ପାକିସ୍ତାନର ବାଲାକୋଟରେ ୨୦୦ ଆତଙ୍କବାଦୀଙ୍କ ଫୋନ ସକ୍ରିୟ ଥିବା ଜଣାପଡିଥିଲା ଏବଂ ଏହା ପରେ ଯୋଜନା କରି ଟାର୍ଗେଟରେ ଏୟାର ଷ୍ଟ୍ରାଇକ କରାଯାଇଥିଲା।
