ନୟାଗଡ଼ ଅଫିସ/ନୂଆଗଁା, ୧୩।୧୦(ଡି.ଏନ୍.ଏ.): ନୟାଗଡ଼ ବନଖଣ୍ଡ ମହିପୁର ରେଞ୍ଜର ମହିପୁର, ମହିତମା ଓ ଗୁମି ଫରେଷ୍ଟ ସେକ୍ସନରେ ଥିବା ଶାଳ ଜଙ୍ଗଲ ପଦା ହୋଇ ଚାଲିଛି । ଉପରୋକ୍ତ ଜଙ୍ଗଲରୁ କାଠ ଚୋର ଶାଳ ଗଣ୍ଡି କାଟି ନେଉଥିବାବେଳେ ସେମାନେ ଛାଡି ଯାଇଥିବା ଡାଳକୁ ବନବିଭାଗ ଜବତ କରି ବାହାବା ନେଇଛି । ଗତ ୧ମାସ ମଧ୍ୟରେ ୩ଟି ଜଙ୍ଗଲରୁ ୩୫ ଶାଳ ଗଛ ଚୋରି ହେବା ବନବିଭାଗର କାର୍ଯ୍ୟଦକ୍ଷତାକୁ ପଦାରେ ପକାଇଛି । ଯେଉଁଭଳି ଢ଼ଙ୍ଗରେ କାଠଚୋର ଜଙ୍ଗଲକୁ ପଦା କରି ଚାଲିଛନ୍ତି ତାହା ଅନୁଧ୍ୟାନ କଲେ ଜିଲାରେ ବନବିଭାଗ ଥିଲା ପରି ମନେ ହେଉନି । ଅନ୍ୟପକ୍ଷେ ରାତି ପାଟ୍ରୋଲିଂ ଆଳରେ ସରକାରୀ ଅର୍ଥ ଆତ୍ମସାତ୍ ଚାଲିଥିବାରୁ ଏହା ତଦନ୍ତ ସାପେକ୍ଷ ବୋଲି ମତ ପ୍ରକାଶ ପାଇଛି ।
ସୂଚନା ଅନୁଯାୟୀ, ମହିପୁର ବନାଞ୍ଚଳ ଅଧୀନରେ ମହିତମା, ମହିପୁର ଓ ଗୁମି ଫରେଷ୍ଟ ସେକ୍ସନ ରହିଛି । ପ୍ରତି ସେକ୍ସନର ଜଙ୍ଗଲରେ ଶାଳ, ପିଆଶାଳ ଓ ଶିଶୁ ଭଳିି ମୂଲ୍ୟବାନ ଗଛ ରହିଛି। ରକ୍ଷଣାବେକ୍ଷଣା ସାଙ୍ଗକୁ ଉଜୁଡି ଯାଇଥିବା ଜଙ୍ଗଲକୁ ସବୁଜିମା କରିବା ପାଇଁ ଜଗୁଆଳିଠାରୁ ଆରମ୍ଭ କରି ଉଚ୍ଚ ପଦସ୍ଥ ଅଧିକାରୀମାନେ କାମ କରୁଛନ୍ତି । ପ୍ରତି ମାସରେ ଦରମା ଓ ବିଭିନ୍ନ କାର୍ଯ୍ୟ ପାଇଁ ପ୍ରତିବର୍ଷ କୋଟିଏରୁ ଊର୍ଦ୍ଧ୍ୱ ଟଙ୍କା ବ୍ୟୟ ହେଉଛି । କିନ୍ତୁ ନିୟୋଜିତ ଅଧିକାରୀ ଓ କର୍ମଚାରୀମାନେ ପୁରୁଣା ଜଙ୍ଗଲକୁ ସୁରକ୍ଷା ଦେବା ବଦଳରେ କାଠ ଚୋର ହାତକୁ ଟେକି ଦେଇଥିବା ଅଭିଯୋଗ ହେଉଛି । ବନବିଭାଗ କର୍ମଚାରୀ କାଗଜ କଲମରେ ଜଙ୍ଗଲର ସୁରକ୍ଷା କରୁଥିବାରୁ କାଠ ଚୋର ସକ୍ରିୟ ହୋଇଛନ୍ତି । ପ୍ରତିଦିନ ମହିତମା, ମହିପୁର ଓ ଗୁମି ସେକ୍ସନରୁ ଏକାଧିକ ଟ୍ରିପ୍ ଶାଳ କାଠ ବାହାରକୁ ଚୋରା ଚାଲଣ ହେଉଛି । ଜଙ୍ଗଲରେ ଗଛ କାଟି ଲଗ୍ଗୁଡିକୁ ଚାରି ଚକିଆ ଗାଡ଼ିରେ ସ୍ଥାନୀୟ ଅଞ୍ଚଳକୁ ଆସୁଛି । ପରେ ସେଗୁଡିକୁ ବିଭିନ୍ନ ଉପକରଣ ଓ ସାଇଜ କରି ଭୁବନେଶ୍ୱର, ବ୍ରହ୍ମପୁର, ପୁରୀ, ଖୋର୍ଦ୍ଧ, କଟକ ପଠାଯାଉଛି । ଦିନବେଳା ଅପେକ୍ଷା ରାତିରେ ଅଧିକ ଗଛ କଟା ଯାଉଛି । ଏନେଇ ବନ ବିଭାଗ ନିକଟରେ ବାରମ୍ବାର ଅଭିଯୋଗ ହେଉଥିଲେ ମଧ୍ୟ ବିଭାଗୀୟ କର୍ମଚାରୀଙ୍କ ନୀରବତା ଅନେକ ପ୍ରଶ୍ନବାଚୀ ସୃଷ୍ଟି କରିଛି । ୩ ଦିନ ମଧ୍ୟରେ ଜାକେଡା ପଞ୍ଚାୟତର ଲୁଣି ଓ ବାଗିଆମାକୁ ଲାଗି ରହିଥିବା ପାଲଭା ଜଙ୍ଗଲରୁ ୮ ଟି ଶାଳ ଗଛ କଟା ଯାଇଛି ।
ସେହିପରି ୧ମାସ ମଧ୍ୟରେ ପଞ୍ଚୁପାଣ୍ଡବ, ସମ୍ପଡା, ଢ଼ିପିସାହି ପରି ଅଞ୍ଚଳରୁ ୨୭ରୁ ଊର୍ଦ୍ଧ୍ୱ ଶାଳ ଗଛ କଟା ସରିଲାଣି । ଏନେଇ ଜଣେ କାଠ ବ୍ୟବସାୟୀ, ନିଜ ନାମ ଗୋପନ ରଖି କହିଛନ୍ତି, କାଠ ଚୋରି ପାଇଁ କିଛି ଖର୍ଚ୍ଚ କରିବାକୁ ପଡୁଛି । ଯେଉଁମାନେ ମାସିକିଆ ନେଉଛନ୍ତି ସେମାନେ ନିଶ୍ଚିତ ନୀରବ ରହିବୋ ତେବେ ଲୋକ ଦେଖାଣିଆ ଚଢ଼ାଉ କରି କେତେଜଣଙ୍କୁ ଗିରଫ କରାଯାଉଛି। ପୁଣି କାଠଚୋର ଛାଡିଥିବା କାଠ ଓ ଡାଳକୁ ବିଭାଗ ଜବତ କରି ନିଜର ପାରିବାପଣିଆ ଦେଖାଉଛି ।
ଏନେଇ କିଛି ନ କହିବା ଭଲ। ଏବେ କିଛି ମାସ ହେଲା ଭଲ ବେପାର ଚାଲିଛି। ଅପଣମାନଙ୍କ ଯୋଗୁ କିଛି ଦିନ ନୀରବ ରହିବାକୁ ପଡିବ ବୋଲି ସେ କହିଛନ୍ତି। ଏ ସଂକ୍ରାନ୍ତରେ ମହିପୁର ରେଞ୍ଜର ଅମ୍ରିତ କୁମାର ସାହୁ କୁହନ୍ତି, ବନବିଭାଗ ପକ୍ଷରୁ ଚଢ଼ାଉକୁ ଜୋରଦାର କରାଯାଇଛି। ରାତିରେ ପାଟ୍ରୋଲିଂ ଚାଲିଛି। ଅଭିଯୋଗ ମିଳିଲେ ସଙ୍ଗେ ସଙ୍ଗେ ଚଢ଼ାଉ କରାଯାଉଛି।
ବାଗିଆମା ଗ୍ରାମର କବିରାଜ ପ୍ରଧାନ , ଭ୍ରମର ବେହେରା, ବୃନ୍ଦାବନ ପ୍ରଧାନ ପ୍ରମୁଖ କହିଛନ୍ତି, କାଠଚୋରି ଲାଗି ରହିଛି ।
ବିଭାଗୀୟ କର୍ମଚାରୀ ଓ ଅଧିକାରୀଙ୍କ ସହଯୋଗ ମିଳୁ ନ ଥିବାରୁ କାଠ ଚୋରି ବଢ଼ିଛି । ନୟାଗଡ଼ ଡିଏଫ୍ଓ କ୍ଷମା ଷଡ଼ଙ୍ଗୀଙ୍କୁ ପଚାରିବାରେ ଅଭିଯୋଗ ମିଳିବା ପରେ ଏସିଏଫ୍ଙ୍କୁ ତଦନ୍ତ ପାଇଁ ପଠାଇଛି। ତେବେ କଟା ଯାଇଥିବା ଶାଳ ଗଛ ବ୍ୟକ୍ତିଗତ ଲୋକଙ୍କର ବୋଲି କୁହାଯାଉଛି । ଜଙ୍ଗଲରୁ ଗଛ କଟାଯିବାର ପ୍ରମାଣ ମିଳିଲେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ । ଏଥିରେ କାହାରିକୁ ଛଡାଯିବ ନାହିଁ। ଅନ୍ୟପକ୍ଷେ ପାଟ୍ରୋଲିଂ ଚାଲୁ ରହିଛି। ଧରପଗଡ଼ରେ କାଠଚୋର ଖସି ଯାଉଛନ୍ତି। ଆମେ ପାଟ୍ରୋଲିଂକୁ କଡାକଡି କରି ଚଢ଼ାଉକୁ ତ୍ୱରାନ୍ବିତ କରିଛୁ ବୋଲି ସେ କହିଛନ୍ତି।
