ବଲାଙ୍ଗିର,୨୦।୮(ସୁନିଲ କୁମାର ମହାନ୍ତି): ବଲାଙ୍ଗିର ଜିଲା ସଇଁତଳା ରେଞ୍ଜ ଅନ୍ତର୍ଗତ ଦେଓଗାଁ ବଙ୍ଗଳା ମେଣ୍ଢା ଫାର୍ମଠାରେ ଗତରାତିରୁ ୩୦ ଟିକିଆ ହାତୀପଲ ଆସି ଅଛନ୍ତି। ଦେଓଗାଁ ଅଞ୍ଚଳର ଆଖପାଖ ଗ୍ରାମରେ ଲୋକେ ଭୟରେ ଆତଙ୍କିତ ଅବସ୍ଥାରେ ଅଛନ୍ତି। ଗତ ତିନିଦିନ ହେଲା ସଇଁତଳା ରେଞ୍ଜ ଅଞ୍ଚଳରେ ବୁଲୁଥିବା ୩୦ଟିକିଆ ହାତୀପଲ। ଏବେ ଆସି ପହଞ୍ଚିଛନ୍ତି ଦେଓଗାଁ ବଙ୍ଗଳା ନିକଟ ମେଣ୍ଢା ଫାର୍ମ ଠାରେ l ଲୋକଙ୍କ ଚାଷ ଜମିରେ ହାତୀ ପଲ ଚାଲି ଚାଲି ଯାଉଥିବାରୁ ଫସଲକୁ ମାଡ଼ି ଚାଷ ଜମିକୁ ଦଳି ନଷ୍ଟ କରିଦେଉଛନ୍ତି l ଅନ୍ୟପଟେ ହାତୀଙ୍କ ଗତିବିଧି ଉପରେ ବନ ବିଭାଗର ନଜର ରଖିଥିବା ଜଣାପଡ଼ିଛି।
କଳାହାଣ୍ଡିରୁ ତେଲନଦୀ ପାର ହୋଇ ସଇଁତଳା ରେଞ୍ଜର ଘୁମସର ଅଞ୍ଚଳରେ ପ୍ରଥମେ ପଶିଥିଲା ୩୦ ଟିକିଆ ହାତୀପଲ। ତିନିଦିନ ହେଲା ଏହି ହାତୀପଲ ବିଭିନ୍ନ ଅଞ୍ଚଳରେ ଘୁରି ବୁଲୁଛନ୍ତି। ଏବେ ଦେଓଗାଁ ବଙ୍ଗଳା ମେଣ୍ଢା ଫାର୍ମ ଅଞ୍ଚଳରେ ଡେରା ପକାଇଛନ୍ତି ହାତୀପଲ। ହାତୀ ଗାଁ ନିକଟରେ ଥିବାରୁ ମେଣ୍ଢା ଫାର୍ମରେ ରହୁଥିବା ପରିବାର ଓ ନିକଟବର୍ତ୍ତି ଗ୍ରାମ ହାତିସରା ଗାଁର ଲୋକେ ହାତୀ ଯୋଗୁଁ ଭୟରେ ରାତି ସାରା ଶୋଇ ନ ଥିବା ଜଣାପଡ଼ିଛି। କେତେବେଳେ ହାତୀପଲ ଗାଁ ଭିତରକୁ ପଶିଯିବେ ତାକୁ ନେଇ ଚିନ୍ତା ବଢ଼ିଛି। ଏପଟେ ହାତୀଙ୍କ ଉପଦ୍ରବ ଯୋଗୁ ଚାଷୀ ଚିନ୍ତାରେ ପଡ଼ିଛନ୍ତି। ସଇଁତଳା ଓ ଦେଓଗାଁ ବନବିଭାଗ ହାତୀପଲର ଗତିବିଧି ଉପରେ ନଜର ରଖିଥିବା କୁହାଯାଇଛି।
Dharitri – Odisha’s No.1 Odia Daily
