ବଅଁରପାଳ, ୨୮ା୭(ଡି.ଏନ.ଏ.)
କରୋନା ବ୍ୟାପିବା ପୂର୍ବରୁ ବର୍ଷ ତମାମ ହାତକୁ କାମ ଆସୁଥିଲା। ରୋଜଗାରରେ କୌଣସି ଅସୁବିଧା ହେଉ ନ ଥିଲା। ବାଦ୍ୟ, ସଙ୍ଗୀତ ପରିବେଷଣ ପାଇଁ ନୂଆ ନୂଆ ସରଞ୍ଜାମ କିଣାଯିବାଠାରୁ କର୍ମଚାରୀଙ୍କୁ ଦରମା ଦେବାଯାଏ ସବୁକିଛି ଠିକ୍ଠାକ୍ ଚାଲିଥିଲା। ହେଲେ ଏହି ମହାମାରୀ ସଂକ୍ରମଣ ବୃଦ୍ଧିକୁ ରୋକିବା ପାଇଁ ଲକ୍ଡାଉନ୍ ଘୋଷଣା ପରଠାରୁ ବିଗିଡ଼ିଯାଇଛି ବ୍ୟବସାୟ। ବନ୍ଦ ହୋଇଯାଇଛି ରୋଜଗାରର ସବୁ ରାସ୍ତା। କଟକଣା ଯୋଗୁ ପୂଜାପାର୍ବଣ ପାଳନ ହେଉ ନ ଥିବା ବେଳେ ମାଙ୍ଗଳିକ କାର୍ଯ୍ୟରେ ମଧ୍ୟ ଖୋଜାପଡ଼ୁନି ବାଦ୍ୟ, ସଙ୍ଗୀତ। ଫଳରେ ଏହି ବ୍ୟବସାୟକୁ ମାଧ୍ୟମ କରି ପରିବାର ପ୍ରତିପୋଷଣ କରୁଥିବା ଅନୁଗୋଳ ଜିଲା ବଅଁରପାଳ ବ୍ଲକ ଅଞ୍ଚଳର ପ୍ରାୟ ୨ହଜାର ବାଦ୍ୟକାର ଏବେ ଦୁର୍ଦ୍ଦିନ ଦେଇ ଗତି କରୁଛନ୍ତି।
ବଅଁରପାଳ ବ୍ଲକ ଅଞ୍ଚଳର କୁଲାଡ଼, ଗିରାଙ୍ଗ, କାଣ୍ଡସର, ନୂଆହତା, ବଉଳିଗଡ଼, ଗଡ଼ସନ୍ତ୍ରୀ, ତଳମୂଳ, ମହୀଧରପୁର, ଫୁଲପଡ଼ା, ବୁଢାପଙ୍କ, ନାଲ୍କୋ, ବଳରାମପ୍ରସାଦ ସମେତ ବିଭିନ୍ନ ଗ୍ରାମରେ ୨ ହଜାରରୁ ଊର୍ଦ୍ଧ୍ୱ ବାଦ୍ୟକାର ପରିବାର ଅଛନ୍ତି। ଏମାନେ ସାଧାରଣତଃ ବିବାହ, ବ୍ରତଘର, ଦଣ୍ଡନାଚ ଆଦିରେ ଢୋଲ, ନିଷାଣ, ମହୁରୀ ଆଦି ବାଦ୍ୟ ପରିବେଷଣ କରିଥାନ୍ତି। ସେହିପରି କେତେଜଣ ବାଦ୍ୟକାର ବହୁ ଅର୍ଥ ଖର୍ଚ୍ଚକରି ମ୍ୟୁଜିକାଲ ସିଷ୍ଟମ କିଣିଛନ୍ତି। କିନ୍ତୁ ଲକ୍ଡାଉନ୍ ପରଠାରୁ ଦୀର୍ଘ ୪ ମାସ ହେଲା ଏହି ବାଦ୍ୟକାରମାନଙ୍କୁ ଆଉ କାମ ମିଳୁନାହିଁ। କଟକଣା ଲଗାଯାଇଥିବାରୁ ଲୋକେ ପୂଜା, ପର୍ବପର୍ବାଣି ଓ ଉତ୍ସବ ମନାଇପାରୁ ନ ଥିବାବେଳେ ବିବାହ, ବ୍ରତଘର ଆଦିରେ ମଧ୍ୟ ଆଡମ୍ବର ନାହିଁ। ତେଣୁ ଏହି ବାଦ୍ୟକାରମାନଙ୍କୁ ପୂର୍ବପରି ଖୋଜାପଡ଼ୁନାହିଁ। ଜଣେ ଜଣେ ବାଦ୍ୟକାର ବର୍ଷକୁ ୪୦ ରୁ ୫୦ ହଜାର ଟଙ୍କା ରୋଜଗାର କରିଥାନ୍ତି। ସେହିପରି ମ୍ୟୁଜିକାଲ ସିଷ୍ଟମ କରିଥିବା ବ୍ୟକ୍ତି କଲ୍ ପିଛା ୧୦ରୁ ୧୨ ହଜାର ଟଙ୍କା ନେଇଥାନ୍ତି। ବିଭିନ୍ନ ପ୍ରକାର ବିଦ୍ୟୁତ୍ ଚାଳିତ ବାଦ୍ୟଯନ୍ତ୍ର ସହ ବାହାରୁ ଗାୟିକା ଗାୟକଙ୍କୁ ଆଣି ଦକ୍ଷତା ଦେଖାଇ ବ୍ୟବସାୟ ବଢ଼ାଇଥାନ୍ତି। ମାତ୍ର ଲକ୍ଡାଉନ ପରଠାରୁ ସେମାନଙ୍କ ବ୍ୟବସାୟ ଠପ୍ ହୋଇଯାଇଛି। ଏପରି କି କର୍ମଚାରୀଙ୍କୁ ଦରମା ଦେଇହେଉ ନ ଥିବା ବେଳେ ମ୍ୟୁଜିକାଲ ସିଷ୍ଟମ ଓ ଏଥିପାଇଁ ବ୍ୟବହୃତ ହେଉଥିବା ଗାଡ଼ିଗୁଡିକ ପଡ଼ିରହି ନଷ୍ଟ ହେବାକୁ ବସିଲାଣି।
ବେପାର ବୁଡ଼ିଯାଇଛି
ବିବାହ ଓ ବ୍ରତଘର ସମୟରେ ଲୋକେ ଭଲ ମ୍ୟୁଜିକାଲ ସିଷ୍ଟମ ଲୋଡ଼ିଥାନ୍ତି। ଏଥିପାଇଁ ବଅଁରପାଳ ଅଞ୍ଚଳରେ ଥିବା ବାଦ୍ୟକାରମାନଙ୍କୁ ବେଶ୍ ରୋଜଗାର ମିଳିଥାଏ। ମାତ୍ର ଲକ୍ଡାଉନ ପରଠାରୁ ସେହି ବେପାର ବୁଡିଯାଇଛି କହିଲେ ଭୁଲ ହେବନାହିଁ।
– ମୁନା ଗୋଚ୍ଛାୟତ, କୁଲାଡ଼
ଜୀବିକା ହରାଇଛୁ
ବାହାଘର, ବ୍ରତଘର, ଦଣ୍ଡନୃତ୍ୟ ଆଦି ବେଳେ ଢୋଲ ଓ ମହୁରୀ ଆବଶ୍ୟକ ପଡିଥାଏ। ଏହି ବାଦ୍ୟ ବିନା ସାଧାରଣତଃ ମାଙ୍ଗଳିକ କାର୍ଯ୍ୟ ହୋଇ ନ ଥାଏ। ମାତ୍ର କରୋନା ଆସିବା ଦିନଠାରୁ ଜୀବିକା ଚାଲିଯାଇଛି। ପରିବାର ଚଳାଇବା କଷ୍ଟକର ହୋଇପଡ଼ିଛି।
– କାଶୀନାଥ ଗୋଚ୍ଛାୟତ, ଗିରାଙ୍ଗ
