କଲ୍ୟାଣସିଂହପୁର,୧୨ା୮(ଦୀପକ କୁମାର ପରିଡ଼ା): ରାୟଗଡ଼ା ଜିଲା କଲ୍ୟାଣସିଂହପୁର ବ୍ଲକ ନାରାୟଣପୁର ପଞ୍ଚାୟତ ଖସିଗୁଡ଼ା ପୋଲ ଉପରେ ଏକ ଘରୋଇ ବସ ଧକ୍କାରେ ଦୁଇଟି ଛେଳିର ମୃତ୍ୟୁ ଘଟିଥିବା ବେଳେ ଦୁଇଟି ଗାଈ ଓ ଗୋଟିଏ ଛେଳି ଗୁରୁତର ହୋଇଛନ୍ତି ।
ମିଳିଥିବା ସୂଚନା ଅନୁଯାୟୀ, ଆଜି ‘ରାବଣିଆ’ ନାମକ ଏକ ଘରୋଇ ବସ ଆନ୍ଧ୍ରପ୍ରଦେଶର ପାର୍ବତୀପୁରରୁ ରାୟଗଡ଼ା ଦେଇ କଲ୍ୟାଣସିଂହପୁର ଆସୁଥିଲା। ସିରିପୁର ବିଦ୍ୟାଳୟ ନିକଟସ୍ଥ ପୋଲ ତଳୁ ପାଣି ପିଇ ଉପରକୁ ଆସୁଥିବା ଗାଈ ଓ ଛେଳିପାଲକୁ ବସଟି ସମ୍ମୁଖରୁ ଧକ୍କା ଦେଇଥିଲା। ଏହି ଦୁର୍ଘଟଣା ଫଳରେ ଘଟଣାସ୍ଥଳରେ ହିଁ ଦୁଇଟି ଛେଳିର ମୃତ୍ୟୁ ଘଟିଥିଲା। ଅନ୍ୟପଟେ ଗୋଟିଏ ଗାଈର ଗୋଡ଼ ଭାଙ୍ଗି ଯାଇଥିବା ବେଳେ ଆଉ ଗୋଟିଏ ଗାଈ ଓ ଗୋଟିଏ ଛେଳି କ୍ଷତାକ୍ତ ହୋଇ ଗୁରୁତର ଅବସ୍ଥାରେ ରହିଛନ୍ତି। ଦୁର୍ଘଟଣାର ଶିକାର ହୋଇଥିବା ଗୋରୁ-ଛେଳିଗୁଡ଼ିକ ଭାତପୁରସି ଅଞ୍ଚଳର ବୋଲି ଜଣାପଡ଼ିଛି। ଖବର ପାଇ ସ୍ଥାନୀୟ ପୋଲିସ ଘଟଣାସ୍ଥଳରେ ପହଞ୍ଚି ବସଟିକୁ ଥାନାରେ ଅଟକ ରଖିଛି। ଏ ସମ୍ପର୍କରେ ଥାନା ଅଧିକାରୀ ଅଜିତ ପରିଡ଼ାଙ୍କୁ ପଚାରିବାରୁ, ଏନେଇ ଥାନାରେ କୌଣସି ଲିଖିତ ଏତଲା ଦିଆଯାଇ ନାହିଁ ଏବଂ ଗାଡ଼ି ମାଲିକ ଓ ଗୋରୁ-ଛେଳିଙ୍କ ମାଲିକଙ୍କ ମଧ୍ୟରେ ଆପୋଷ ବୁଝାମଣା ହୋଇଥିବା ସେ ପ୍ରକାଶ କରିଛନ୍ତି।
