ଲକ୍ଷ୍ନୌ, ୧୬।୭- ସ୍ବଚ୍ଛ ଭାରତ ମିଶନ ଆଧାରରେ ଗ୍ରାମ ଓ ସହର ସବୁଠାରେ ଶୌଚାଳୟ ନିର୍ମାଣ ହୋଇଥିବା ଉତ୍ତର ପ୍ରଦେଶ ସରକାର ଦାବି କରୁଛନ୍ତି। କିନ୍ତୁ ବାସ୍ତବତା ଏହା ବାହାରେ। ଯାହାର ସଦ୍ୟତମ ଉଦାହରଣ ଉତ୍ତର ପ୍ରଦେଶ କୁଶୀନଗର ଜିଲାରେ ଦେଖିବାକୁ ମିଳିଛି। ସ୍ଥାନୀୟ ପଦରୌନା ବ୍ଲକର ଜଗଦୀପୁର ଗ୍ରାମରେ ଗତ ଏକ ମାସ ମଧ୍ୟରେ ୧୬ ଜଣ ବୋହୁ ଶୌଚାଳୟ ନ ଥିବା ଅଭିଯୋଗ କରି ସେମାନଙ୍କ ଶାଶୁଘର ଛାଡ଼ି ବାପଘରକୁ ପଳାଇଛନ୍ତି। ଏଥିସହ ଶୌଚାଳୟ ନିର୍ମାଣ ନ ହେବା ପର୍ଯ୍ୟନ୍ତ ଆଉ ଶାଶୁଘରେ ପାଦଦେବେ ନାହିଁ ବୋଲି ରୋକଠୋକ୍ କହିଛନ୍ତି। ଏହି ମହିଳାମାନଙ୍କୁ ବର୍ଷା ଦିନେ ମଳତ୍ୟାଗ କରିବା ପାଇଁ ବାହାରକୁ ଯିବାକୁ ପଡ଼ୁଥିଲା। ପ୍ରଥମେ ଶାଶୁଘର ଲୋକଙ୍କୁ ଏହି ସମସ୍ୟା କଥା ମହିଳାମାନେ ଜଣାଇଥିଲେ। କିନ୍ତୁ କୌଣସି ସମାଧାନ ନ ହେବାରୁ ସେମାନେ ନିଜ ନିଜ ବାପଘରକୁ ପଳାଇଥିଲେ। ଏହି ଘଟଣା ଜଣାପଡ଼ିବା ପରେ ଜିଲା ପଞ୍ଚାୟତରାଜ ଅଧିକାରୀ ଗ୍ରାମରେ ପହଞ୍ଚତ୍ଥିଲେ। ସେ ଲୋକଙ୍କଠାରୁ ତଥ୍ୟ ସଂଗ୍ରହ କରି ଶୌଚାଳୟ କାହିଁକି ନିର୍ମାଣ ହୋଇନାହିଁ ତାହାର ଅନୁସନ୍ଧାନ ଆରମ୍ଭ କରିଛନ୍ତି। ବୋହୁମାନଙ୍କ ଏହି ନିଷ୍ପତ୍ତିରେ କେବଳ ପରିବାର ନୁହେଁ ପୁରା ଗ୍ରାମବାସୀ ଆଶ୍ଚର୍ଯ୍ୟ ପ୍ରକାଶ କରିଛନ୍ତି। ଗ୍ରାମବାସୀମାନେ ବହୁ ବୁଝାଇବା ପରେ ମଧ୍ୟ ସେମାନେ ନିଜ ନିଷ୍ପତ୍ତିରେ ପରିବର୍ତ୍ତନ କରି ନ ଥିଲେ ଏବଂ ଶାଶୁଘର ଛାଡ଼ି ପଳାଇଥିଲେ। ବିବାହ ପୂର୍ବରୁ ମଧ୍ୟ ମହିଳାମାନେ ସର୍ତ୍ତ ରଖିଥିଲେ ଶୌଚାଳୟ ନିର୍ମାଣ ହେଲାପରେ ସେମାନେ ସେଠାକୁ ଯିବେ। ଏହାପରେ ଶାଶୁଘର ପକ୍ଷରୁ ମଧ୍ୟ ଶୀଘ୍ର ଶୌଚାଳୟ ନିର୍ମାଣ ନେଇ ପ୍ରତିଶ୍ରୁତି ଦିଆଯାଇଥିଲା। କିନ୍ତୁ ଯାହାକୁ ପରେ ପୂରଣ କରା ନ ଯିବାରୁ ବୋହୁମାନେ ଶାଶୁଘର ଛାଡ଼ି ପଳାଇଛନ୍ତି।
