ସୋଫିଆ (ବୁଲଗେରିଆ), ୮ା୭ (ଏପି)-ବୁଲ୍ଗେରିଆର ଚେର୍ନୋ ମୋର୍ ଫୁଟ୍ବଲ କ୍ଲବର ୧୨ଖେଳାଳି ଓ ୪ ଜଣ ଅଫିସିଆଲ କରୋନା ପଜିଟିଭ୍ ବୋଲି ଦେଶର ସ୍ବାସ୍ଥ୍ୟ ମନ୍ତ୍ରୀ ମଙ୍ଗଳବାର ପ୍ରକାଶ କରିଛନ୍ତି। ସମସ୍ତ ପଜିଟିଭ୍ ଖେଳାଳିଙ୍କୁ କ୍ୱାରାଣ୍ଟାଇନ୍ରେ ରଖାଯିବା ସହ ଆବଶ୍ୟକ ସତର୍କତା ଅବଲମ୍ବନ କରାଯାଇଛି। ୧୬ଜଣଙ୍କ ସାମ୍ପଲ ପଜିଟିଭ୍ ଆସିବା ଦୁର୍ଭାଗ୍ୟଜନକ ବୋଲି କ୍ଲବ ତରଫରୁ କୁହାଯାଇଛି। ଚେର୍ନୋ ମୋରେ ଗୁରୁବାର ସୋଫିଆଠାରେ ଜାର୍କୋ ସେଲୋ ବିପକ୍ଷରେ ଏକ ଲିଗ୍ ମ୍ୟାଚ ଖେଳିଥିଲା। ଏହାର ପରଦିନ ପ୍ରି-ମ୍ୟାଚ୍ ଟେଷ୍ଟ କରିଥିବା ଲାବୋରେଟୋରି ପୂର୍ବରୁ ସୋଫିଆ ଟିମ୍ର ଜଣେ ଖେଳାଳି ପଜିଟିଭ ଥିଲେ, ମାତ୍ର ଏହା ଘୋଷଣା କରାଯାଇ ନ ଥିଲା। ପଜିଟିଭ ଟେଷ୍ଟ ସତ୍ତ୍ୱେ ଚେର୍ନୋ ମୋର୍ ମଙ୍ଗଳବାର ଆର୍ଡା କାର୍ଡଝାଲି ବିପକ୍ଷ ମ୍ୟାଚ ଖେଳିଛି। କ୍ୱାରାଣ୍ଟାଇନ୍ରେ ଥିବା ଖେଳାଳିଙ୍କ ବଦଳରେ ଟିମ୍ର ଜୁନିୟର ଦଳର ସଦସ୍ୟମାନେ ଏହି ମ୍ୟାଚ ଖେଳିଥିଲେ। ସ୍ବାସ୍ଥ୍ୟ ମନ୍ତ୍ରୀ କିରିଲ ଆନାନିଭ୍ କହିଛନ୍ତି ଜାର୍ସ୍କୋ ସେଲୋ ଦଳର ଆହୁରି ୩ ଜଣ ଖେଳାଳି କରୋନା ସଂକ୍ରମିତ ହୋଇଛନ୍ତି। ଫୁଟ୍ବଲ ମ୍ୟାଚଗୁଡ଼ିକ ବିନା ଦର୍ଶକରେ ଖେଳାଯିବା ସହ ଷ୍ଟାଡିୟମରେ କରୋନାଭାଇରସ୍ ବ୍ୟାପିବାକୁ ରୋକିବା ଲାଗି କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
