ଲଣ୍ଡନ,୨୮ା୩ (ଏଏଫ୍ପି): କରୋନା ଭାଇରସ୍ ଲକ୍ଷଣ ଦେଖାଦେବାରୁ ଓ୍ବେଷ୍ଟହାମ୍ର ୮ଖେଳାଳି ପୃଥକ୍ ବାସରେ ରହିଛନ୍ତି। ଫୁଟ୍ବଲ କ୍ଲବର ଭାଇସ୍ ଚେୟାରଓମ୍ୟାନ କାରେନ ବ୍ରାଡି ସୂଚନା ଦେଇଛନ୍ତି। ମହାମାରୀର ଶିକାର ହେବାରେ ଓ୍ବେଷ୍ଟହାମ୍ ହେଉଛି ସଦ୍ୟତମ ପ୍ରିମିୟର ଲିଗ୍ କ୍ଲବ। ଆର୍ସେନାଲ ମ୍ୟାନେଜର ମିକେଲ ଆର୍ଟେଟା, ଚେଲ୍ସି ଓ୍ବିଙ୍ଗର କାଲମ ହଡ୍ସନ ଓଡୋଇ ଉଭୟେ ବର୍ତ୍ତମାନ ସୁସ୍ଥ ହୋଇ ଫେରିଥିବାବେଳେ ଭାଇରସ ପାଇଁ ହୋଇଥିବା ଟେଷ୍ଟରେ ଲିସେଷ୍ଟର କ୍ଲବର ବହୁ ଖେଳାଳିଙ୍କ ପଜିଟିଭ ଆସିଛି। ବ୍ରାଡି କହିଛନ୍ତି ତାଙ୍କ ଖେଳାଳିଙ୍କ ନିକଟରେ ସାମାନ୍ୟ ଲକ୍ଷଣ ଦେଖା ଦେଇଛି। ସେମାନେ ଖୁବ୍ ଶୀଘ୍ର ସୁସ୍ଥ ହୋଇଯିବେ ବୋଲି ଆଶା। ଓ୍ବେଷ୍ଟହାମ୍ ଖେଳାଳିମାନେ ବର୍ତ୍ତମାନ ନିଜ ଘରେ ରହି ଟ୍ରେନିଂ ନେଉଛନ୍ତି। ବ୍ରିଟେନ୍ରେ ଏପ୍ରିଲ ୧୩ରେ ଲକ୍ଡାଉନ୍ ଉଠିଲେ କ୍ଲବ ନିଜ ପଡ଼ିଆରେ ଏହାର ନିୟମିତ ଅଭ୍ୟାସ ସେସନ ଆରମ୍ଭ କରିବ। ବର୍ତ୍ତମାନ ପରିସ୍ଥିତିରେ ପ୍ରିମିୟର ଲିଗ୍ ସିଜନକୁ ଏପ୍ରିଲ ୩୦ ପର୍ଯ୍ୟନ୍ତ ସସ୍ପେଣ୍ଡ ରଖାଯାଇଛି। ଘରୋଇ ସିଜନ ଆରମ୍ଭ ନେଇ ବ୍ରାଡି ଆଶାବାଦୀ ଏପରିକି ମ୍ୟାଚଗୁଡ଼ିକ ଯଦି ରୁଦ୍ଧଦ୍ୱାରରେ ଖେଳାଯାଏ ତେବେ ଜୁଲାଇ ପର୍ଯ୍ୟନ୍ତ ଚାଲିବ ବୋଲି ସେ କହିଛନ୍ତି।
