ବାଲେଶ୍ୱର ଅଫିସ, ୧୬।୧୨-ବାଲେଶ୍ୱର ଚାନ୍ଦିପୁରସ୍ଥିତ ଆଇଟିଆର୍ (ଇଣ୍ଟିଗ୍ରେଟେଡ୍ ଟେଷ୍ଟ ରେଞ୍ଜରେ ରବିବାର ପୂର୍ବାହ୍ନରେ ୩୭ତମ ରାଇଜିଂ ଦିବସ ପାଳିତ ହୋଇଛି। ବିପିୟୁଟିର ଭାଇସ୍ ଚାନ୍ସେଲର ପ୍ରଫେସର ଚିତ୍ତରଞ୍ଜନ ତ୍ରିପାଠୀ ଏଥିରେ ମୁଖ୍ୟଅତିଥି ଭାବେ ଯୋଗଦେଇ ଆଇଟିଆର୍ର ବିଭିନ୍ନ କାର୍ଯ୍ୟକ୍ରମ ସମ୍ପର୍କରେ ଉଲ୍ଲେଖ କରି ମିଳିତ ଭାବେ କାର୍ଯ୍ୟ କରାଯାଇ ଆସୁଥିବାରୁ ଏଭଳି ସଫଳତା ହାସଲ କରାଯାଇ ପାରିଛି ବୋଲି କହିଥିଲେ।
କାର୍ଯ୍ୟକ୍ରମରେ ଉପସ୍ଥିତ ଆଇଟିଆର୍ ନିଦ୍ଦେର୍ର୍ଶକ ବିନୟ କୁମାର ଦାସ ୨୦୧୯ରେ ପରୀକ୍ଷଣ ସଂସ୍ଥା ଦ୍ୱାରା ସମସ୍ତ କ୍ଷେପଣାସ୍ତ୍ର ପରୀକ୍ଷାରୁ ମିଳିଥିବା ସଫଳତାକୁ ଦେଶର ସ୍ବାର୍ଥ ପାଇଁ ଲଗାଯାଇପାରିଥିବା କହିଥିଲେ। ସେହିପରି ବାଲେଶ୍ୱର ଜନସାଧାରଣଙ୍କ ପାଇଁ କେତେକ ସଂସ୍ଥା ସହ ମିଶି ‘ୱାନ୍ ଟିମ୍ ବିଲିଅନ୍ ଡ୍ରିମ୍ସ’ ନାମକ ଏକ ଅନୁଷ୍ଠାନ ଗଠନ କରି ବିଭିନ୍ନ ସମୟରେ ବୃକ୍ଷରୋପଣ କରି ସବୁଜ ବନାନୀ ସୃଷ୍ଟି କରିବା, ସ୍ବଚ୍ଛ ଭାରତ ମିଶନ, ରକ୍ତଦାନ ଓ ସ୍ବାସ୍ଥ୍ୟ ଶିବିର ଆୟୋଜନ ସମତେ ବିଭିନ୍ନ ସଚେତନତା ଶିବିର କରାଯାଇ ଆସୁଛି ବୋଲି କହିିଥିଲେ।
ୱାର୍କସ କମିଟି ଅଧ୍ୟକ୍ଷ ଅନୁପ କୁମାର ସାହୁ ଓ ସମ୍ପାଦକ ଏସ୍.କେ. ରାଉତ, ରାଇଜିଂ ଦିବସ କମିଟିର ଅଧ୍ୟକ୍ଷ ଏମ୍. କେ. ପାଲ, ଉପାଧ୍ୟକ୍ଷ ଏସ୍.ସି. ପାତ୍ର, ମଧୁସ୍ମିତା ମହାନ୍ତି ଓ ଜୟଶଙ୍କର ଭାରତୀ ପ୍ରମୁଖ ବକ୍ତବ୍ୟ ରଖିଥିଲେ। ଏହ କାର୍ଯ୍ୟକ୍ରମରେ ବୈଜ୍ଞାନିକ, ଟେକ୍ନିକାଲ ଅଫିସର ଏବଂ କର୍ମଚାରୀଙ୍କୁ ବିଭିନ୍ନ ପାରଦର୍ଶିତା ପାଇଁ ପୁରସ୍କାର ପ୍ରଦାନ କରାଯାଇଥିଲା। ଅତିଥିମାନେ ତ୍ରିଭାଷୀ (ହିନ୍ଦୀ, ଇଂରାଜୀ, ଓଡ଼ିଆ) ପୁସ୍ତକ ‘ଉତ୍କର୍ଷ’ର ତୃତୀୟ ସଂସ୍କରଣକୁ ଉନ୍ମୋଚନ କରିଥିଲେ। ବାଲୁକାଶିଳ୍ପୀ ଟୁନା ବେହେରାଙ୍କ ଦ୍ୱାରା ନିର୍ମିତ ବାଲୁକାକଳା ‘ମିଶାଇଲ୍ ଫର୍ ପିସ୍’ ଆକର୍ଷଣ ସାଜିିଥିଲା। ଶିଳ୍ପୀ କେଶୁ ଦାସ ପାରମ୍ପରିକ ଜଉ କଣ୍ଢେଇ, ଟେରାକୋଟା ଏବଂ ମାଟିର ବିଭିନ୍ନ କାରୁକାର୍ଯ୍ୟ ପ୍ରଦର୍ଶନ କରିଥିଲେ। ଏହି ଅବସରରେ ଆୟୋଜିତ ହୋଇଥିବା କୁଇଜ୍, ଅନ୍ତାକ୍ଷରୀ, ସାଂସ୍କୃତିକ କାର୍ଯ୍ୟକ୍ରମ ସହ ବିଭିନ୍ନ ଖେଳରେ କୃତି ପ୍ରତିଯୋଗୀଙ୍କୁ ପୁରସ୍କୃତ କରାଯାଇଥିଲା। କାର୍ଯ୍ୟକ୍ରମରେ ଆଇଟିଆର୍ର ସମସ୍ତ ଅଧିକାରୀ, ବୈଜ୍ଞାନିକ, କର୍ମଚାରୀ ଉପସ୍ଥିତ ଥିଲେ। ଏହି ଅବସରରେ କର୍ମଚାରୀ ଓ ସେମାନଙ୍କ ପରିବାର ସଦସ୍ୟ ମିଶି ରଙ୍ଗାରଙ୍ଗ ସାଂସ୍କୃତିକ କାର୍ଯ୍ୟକ୍ରମ ପରିବେଷଣ କରିଥିଲେ।
