ଝାରସୁଗୁଡ଼ା ଅଫିସ,୩୦ା୪: ଝାରସୁଗୁଡ଼ା ଜିଲାରେ ବୁଧବାର ପ୍ରଥମ କରୋନା ରୋଗୀ ଚିହ୍ନଟ ହୋଇଛନ୍ତି। ସେ ଝାରସୁଗୁଡ଼ା ଜିଲାର ହୋଇଥିବା ବେଳେ ପଶ୍ଚିମବଙ୍ଗ ରାଜ୍ୟ ପୁରୁଲିଆ ଜିଲାରେ ରହୁଛନ୍ତି। ଗତ ୨୩ ତାରିଖ ସନ୍ଧ୍ୟାରେ ସେ ଝାରସୁଗୁଡ଼ାକୁ ଆସିଥିବା ବେଳେ ସେ ୩୧ ଜଣଙ୍କ ସଂସ୍ପର୍ଶରେ ଆସିଥିବା ଜଣାପଡ଼ିଛି। ଏହି ବ୍ୟକ୍ତିମାନଙ୍କୁ ଚିହ୍ନଟ କରି କ୍ୱାରାଣ୍ଟାଇନ୍ରେ ରଖିବା ସହିତ ସେମାନଙ୍କ ସ୍ବାବ୍ ପରୀକ୍ଷା କରିବା ନେଇ ଜିଲା ପ୍ରଶାସନ ପଦକ୍ଷେପ ନେଇଛି।
ସୂଚନାନୁଯାୟୀ, ଗତ ୨୨ ତାରିଖ ଅପରାହ୍ନ ୩ଟାରେ ଯୁବତୀ ଜଣକ ୩ ଜଣ ସମ୍ପର୍କୀୟଙ୍କ ସହ ଏକ ଗାଡ଼ିରେ ଡ୍ରାଇଭର ନେଇ ଝାରସୁଗୁଡ଼ା ଅଭିମୁଖେ ବାହାରିଥିଲେ। ମୟୂରଭଞ୍ଜ ଜିଲା ସୀମାରେ ଥିବା ଜାମଶୋଳାଠାରେ ନିୟୋଜିତ ସୁରକ୍ଷାକର୍ମୀ ସେମାନଙ୍କୁ ଛାଡ଼ି ନ ଥିଲେ। ପରେ ସେମାନେ ସେଠାରୁ ଫେରିଯାଇ ଜାମସେଦପୁର, ରାଞ୍ଚି, ଖୁଣ୍ଟି, ସିମଡେଗା, ବେଦବ୍ୟାସ ଦେଇ ସୁନ୍ଦରଗଡ଼ରେ ଓଡ଼ିଶା ସୀମାକୁ ପଶିଥିଲେ। ୨୩ ତାରିଖ ସନ୍ଧ୍ୟାରେ ବ୍ରଜରାଜନଗରର ବୁଢ଼ୀଜାମଠାରେ ପହଞ୍ଚିଥିଲେ। ରାସ୍ତାରେ ସେମାନେ କୌଣସି ଦୋକାନ କିମ୍ବା କାହା ସହ ସଂସ୍ପର୍ଶରେ ଆସି ନ ଥିବା ଜଣାପଡ଼ିଛି। ତେବେ ଉକ୍ତ ଯୁବତୀ ସହିତ ସଂସ୍ପର୍ଶରେ ଆସିଥିବା ୩୧ ଜଣ ସମ୍ପର୍କୀୟ ଓ ପଡ଼ୋଶୀଙ୍କୁ ପ୍ରଶାସନ ଚିହ୍ନଟ କରିଛି।
ପ୍ରକାଶ ଥାଉକି, ପଶ୍ଚିମବଙ୍ଗ ରାଜ୍ୟ ପୁରୁଲିଆ ଜିଲାର ଜଣେ ବ୍ୟକ୍ତି ବ୍ରଜରାଜନଗର ମ୍ୟୁନିସିପାଲିଟିର ବୁଢ଼ୀଜାମ ଅଞ୍ଚଳରେ ରହି ଡ୍ରାଇଭର ଭାବେ କାର୍ଯ୍ୟ କରୁଥିଲେ। ଉକ୍ତ ବ୍ୟକ୍ତିଙ୍କ ଏକ ଦୁର୍ଘଟଣାରେ ମୃତ୍ୟୁ ଘଟିଥିଲା। ଏହି ମୃତ ବ୍ୟକ୍ତିଙ୍କ ଶେଷକୃତ୍ୟ କରିବା ପାଇଁ ତାଙ୍କ ପରିବାରର ୪ ଜଣ ସମ୍ପର୍କୀୟ ଗତ ୨୩ ତାରିଖ ସନ୍ଧ୍ୟାରେ ଏଠାକୁ ଆସିଥିଲେ। ପରେ ୨୪ ତାରିଖରେ ଉପରୋକ୍ତ ୪ଜଣଙ୍କ ସ୍ବାବ୍ ସଂଗ୍ରହ କରାଯାଇ କ୍ୱାରାଣ୍ଟାଇନ୍ରେ ରଖାଯାଇଥିଲା। ନମୁନା ପରୀକ୍ଷା ରିପୋର୍ଟ ଆସିବା ପରେ ମୃତ ବ୍ୟକ୍ତିଙ୍କ ଭଉଣୀଙ୍କ ପଜିଟିଭ୍ ରିପୋର୍ଟ ଆସିଥିବା ଜଣାପଡ଼ିଥିଲା।
