ରଣପୁର,୨୨।୬(ସ୍ବ.ପ୍ର.:ସାମୁଦ୍ରିକ ଝଡ ଫନୀ ପ୍ରଭାବରେ ନୟାଗଡ ଜିଲାର ରଣପୁର ବ୍ଲକ ବିଶେଷ କ୍ଷତିଗ୍ରସ୍ତ ହୋଇଥିଲା। ଗତ ମେ ୩ତାରିଖରେ ସଂଘଟିତ ହୋଇଥିବା ବାତ୍ୟାକୁ ଏ ମଧ୍ୟରେ ଦେଢମାସ ବିତିଯାଇଥିଲେ ମଧ୍ୟ ଏପର୍ଯ୍ୟନ୍ତ ବାତ୍ୟା ପ୍ରଭାବରୁ ସାଧାରଣ ଲୋକେ ସୁଧୁରି ପାରିନାହାନ୍ତି। ବାତ୍ୟାରେ ରଣପୁର ବ୍ଲକ ସହିତ ବିଜ୍ଞାପିତ ଅଞ୍ଚଳର ବିଭିନ୍ନ ସ୍କୁଲ ଗୃହଗୁଡିକ ଭାଙ୍ଗିରୁଜି ଯାଇଛି । ଦେଢମାସ ଭିତରେ ପ୍ରଶାସନ ତରଫରୁ କୌଣସି ମରାମତି କରାଯାଇନଥିଲା ବେଳେ ଶୁକ୍ରବାର ରାଜ୍ୟର ସମସ୍ତ ବିଦ୍ୟାଳୟ ଖୋଲାଯାଇଛ। ରଣପୁର ଅଞ୍ଚଳରେ ଶୁକ୍ରବାର ଲଘୁଚାପ ଯୋଗୁଁ ଦିନ ତମାମ ବର୍ଷା ଲାଗି ରହିଛି ା ଏହି ବର୍ଷାରେ ଛାତ୍ରୀଛାତ୍ର ଓ ଶିକ୍ଷକ ମାନେ ବିଦ୍ୟାଳୟକୁ ଯାଇଥିଲେ। ହେଲେ ଫନୀରେ ଭାଙ୍ଗି ଯାଇଥିବା ବିଦ୍ୟାଳୟ ଗୁଡିକରେ ପାଠପଢା ଅନୁପଯୋଗୀ ହେବାରୁ କେତେକ ବିଦ୍ୟାଳୟରେ ବର୍ଷାରେ ଭିଜି ପିଲାମାନେ ବାରଣ୍ଡାରେ ବସି ପାଠ ପଢୁଥିବା ଦେଖିବାକୁ ମିଳିଥିଲା। ଏ ନେଇ ଅଭିଭାବକ ମାନେ ସ୍ଥାନୀୟ ପ୍ରଶାସନକୁ ଦାୟୀ କରିବା ସହିତ ଅସନ୍ତୋଷ ପ୍ରକାଶ କରିଛନ୍ତି।
ଯେ, ରଣପୁର ବ୍ଲକ ଓ ବିଜ୍ଞାପିତ ଅଞ୍ଚଳ ଅଧୀନରେ ୨୩୭ଟି ପ୍ରାଥମିକ ଓ ଉଚ୍ଚ ପ୍ରାଥମିକ ବିଦ୍ୟାଳୟ ସହିତ ୪୪ ହାଇସ୍କୁଲ ରହିଛି ା ଫନୀ ବାତ୍ୟାରେ ୭୨ ପ୍ରାଥମିକ ଓ ଉଚ୍ଚପ୍ରାଥମିକ ବିଦ୍ୟାଳୟ ସହିତ ୧୫ରୁ ଊର୍ଦ୍ଧ୍ୱ ସରକାରୀ ବେସରକାରୀ ହାଇସ୍କୁଲ ଶ୍ରେଣୀ ଗୃହର ଆଜବେଷ୍ଟସ ଉଡାଇ ନେଇଥିଲା ବେଳେ ଆଉ କେତେକ ଗୃହର କାନ୍ଥ ଭାଙ୍ଗି ଯାଇଛି। ସେହି ଗୃହ ଗୁଡିକ ବିପଦ ସଙ୍କୁଳ ରହିଥିଲା ବେଳେ ସେଠାରେ ଛାତ୍ରୀଛାତ୍ର ମାନଙ୍କୁ ପାଠ ପଢାଇବା ଅନୁପଯୋଗୀ ହୋଇଛି ା ପ୍ରଶାସନ ତରଫରୁ ବାତ୍ୟା ପରେ ଏହାର ତଦନ୍ତ କରାଯାଇ ଏହି ଗୃହ ଗୁଡିକ ବାତ୍ୟାରେ ଭାଙ୍ଗି ଯାଇଥିବା ରିପୋର୍ଟ ଜିଲା ପ୍ରଶାସନକୁ ପ୍ରଦାନ କରାଯାଇଛି। ହେଲେ ପ୍ରଶାସନ ତରଫରୁ ଭାଙ୍ଗିଯାଇଥିବା ବିଦ୍ୟାଳୟ ଗୁଡିକର କୌଣସି ମରାମତି କରାଯାଇ ନଥିଲାବେଳେ ଶୁକ୍ରବାର ବିଦ୍ୟାଳୟ ଖୋଲିବାରୁ ବାଧ୍ୟ ହୋଇ ଶିକ୍ଷକମାନେ ଛପର ଥିବା ବାରଣ୍ଡାରେ ବସି ପାଠ ପଢାଇଥିଲେ। ଏ ବିଷୟରେ ରଣପୁର ବ୍ଲକ ଶିକ୍ଷା ଅଧିକାରୀ ଉପେନ୍ଦ୍ର ନାଥ ସାହୁଙ୍କୁ ପଚାରିବାରୁ ସେ କୁହନ୍ତି ଫନୀ ବାତ୍ୟାରେ ରଣପୁର ଅଞ୍ଚଳର ବହୁତ ବିଦ୍ୟାଳୟ ଅଜବେଷ୍ଟସ ଛପର ଭାଙ୍ଗି ଉଡି ଯିବା ସହିତ ବଡ ବଡ ଗଛ ପଡି କାନ୍ଥ ଭାଙ୍ଗିିଯାଇଛି। ଏନେଇ ଆମେ ଜିଲା ପ୍ରଶାସନକୁ ଅବଗତ କରାଇଛୁ, ହେଲେ ଏପର୍ଯ୍ୟନ୍ତ କୌଣସି ଗୋଟିଏ ବିଦ୍ୟାଳୟର ମରାମତି କାର୍ଯ୍ୟ ହୋଇପାରିନାହିଁ ା ଫଳରେ ଶୁକ୍ରବାର ବିଦ୍ୟାଳୟ ଖୋଲିବାରୁ ବାରଣ୍ଡାରେ ଛାତ୍ରୀଛାତ୍ର ମାନଙ୍କୁ ଝିିପି ଝିପି ବର୍ଷାରେ ପାଠ ପଢିବାକୁ ପଡିଲା। ଏ ବିଷୟରେ ନୟାଗଡ ଜିଲା ପ୍ରାଥମିକ ଶିକ୍ଷକ ସଂଘର ସଭାପତି ଜ୍ୟୋତିରଞ୍ଜନ ଦାସ କୁହନ୍ତି ବାତ୍ୟାର ଦେଢମାସ ପରେ ସରକାରଙ୍କ ଅପାରଗତା ଯୋଗୁଁ ସ୍କୁଲ ଖୋଲିଲେ ମଧ୍ୟ କୌଣସି ବିଦ୍ୟାଳୟ ମରାମତି ହୋଇ ନ ପାରିବାରୁ ଛାତ୍ରୀ ଛାତ୍ରମାନେ ବାରଣ୍ଡାରେ ପାଠ ପଢୁଛନ୍ତି।
