ଭୁବନେଶ୍ୱର, ୨୩।୧ (ସ୍ପୋଟର୍ସ ବ୍ୟୁରୋ)- ଇଣ୍ଡିଆନ ସୁପର୍ ଲିଗ୍ (ଆଇଏସ୍ଏଲ୍) ଫ୍ରାଞ୍ଚାଇଜ ଓଡ଼ିଶା ଏଫ୍ସିର ୧୩ ବର୍ଷରୁ କମ୍ ଦଳ ହିରୋ ସବ୍ଜୁନିୟର ଲିଗ୍ରେ ବୃହତ୍ ବିଜୟ ହାସଲ କରିଛି। ବୁଧବାର ଦିଲ୍ଲୀର ଜବାହରଲାଲ ନେହେରୁ ଷ୍ଟାଡିୟମରେ ଅନୁଷ୍ଠିତ ଏକ ମ୍ୟାଚ୍ରେ ସବ୍ଜୁନିୟର ଓଡ଼ିଶା ଏଫ୍ସି ଦଳ ୧୨-୦ ଗୋଲରେ ଏକପାଖିଆ ଭାବେ ପଞ୍ଜାବ ଫୁଟ୍ବଲ କ୍ଲବକୁ ପରାସ୍ତ କରିଛି। ଓଡ଼ିଶା ପକ୍ଷରୁ ପ୍ରଣୟ ଟୋପଓ୍ବାଲ ହ୍ୟାଟ୍ରିକ ଗୋଲ କରିଥିଲେ। ପୁରା ମ୍ୟାଚ୍ରେ ଓଡ଼ିଶା ଖେଳାଳିମାନେ ଆଧିପତ୍ୟ ବିସ୍ତାର କରି ଖେଳିଥିଲେ। ମ୍ୟାଚ୍ର ୨୩, ୨୪ ଓ ୨୫ତମ ମିନିଟ୍ରେ ଯଥାକ୍ରମେ ସିଦ୍ଧାର୍ଥ ଅଟ୍ରି, ଆଦିତ୍ୟ ଅଧିକାରୀ ଓ ଅକ୍ଷତ ମେହେରଙ୍କ ଗୋଲ ବଳରେ ଓଡ଼ିଶା ୩-୦ରେ ଅଗ୍ରଣୀ ହାସଲ କରିଥିଲା। ଏହାପରେ ୩୪, ୩୮, ୪୨ ଓ ୪୪ତମ ମିନିଟ୍ରେ ଗୋଲସ୍କୋର କରି ଓଡ଼ିଶା ପ୍ରଥମାର୍ଦ୍ଧ ସୁଦ୍ଧା ୮-୦ ଗୋଲରେ ଅଗ୍ରଣୀ ଲାଭ କରିଥିଲା। ଏହାପରେ ୫୨ ଓ ୫୬ତମ ମିନିଟ୍ରେ ଯଥାକ୍ରମେ ସୌରଭ ଯାଦବ ଓ ସମୀର ନକୁଲଙ୍କ ଗୋଲ ବଳରେ ଓଡ଼ିଶାର ଅଗ୍ରଣୀ ୧୦-୦କୁ ବୃଦ୍ଧି ପାଇଥିଲା। ପୂର୍ବରୁ ପ୍ରଥମାର୍ଦ୍ଧରେ ୨ଟି ଗୋଲ କରିଥିବା ପ୍ରଣୟ ୫୫ତମ ମିନିଟ୍ରେ ପ୍ରତିପକ୍ଷ ନେଟ୍ ମଧ୍ୟକୁ ସଫଳତାର ସହ ବଲ ପଠାଇ ନିଜର ହ୍ୟାଟ୍ରିକ ପୂରଣ କରିଥିଲେ। ଓଡ଼ିଶା ପାଇଁ ଅନ୍ତିମ ଗୋଲ ଆଦି ଜୋଶୀ ଦେଇଥିଲେ। ଜାନୁୟାରୀ ୨୫ରେ ଓଡ଼ିଶା ଏଫ୍ସି ଏହାର ପରବର୍ତ୍ତୀ ମ୍ୟାଚରେ କନ୍ସାଇଣ୍ଟ ଫୁଟ୍ବଲ ଦଳକୁ ଭେଟିବ।
