ହାଟଡ଼ିହୀ,୧୬।୪(ଡି.ଏନ୍.ଏ.): କରୋନା ରୋଗର ମୁକାବିଲା ପାଇଁ କେନ୍ଦୁଝର ଜିଲା ହାଟଡ଼ିହୀ ବ୍ଲକ ଢେଙ୍କା ପଞ୍ଚାୟତରେ ସତର୍କତାମୂଳକ ପଦକ୍ଷେପ ନିଆଯାଇଛି। ଯୋଗାଣ ଅଧିକାରୀ ଶ୍ୟାମ ମାଝୀ ଓ ସରପଞ୍ଚ ନିମାଇଁ ସାମଲଙ୍କ ଉପସ୍ଥିତିରେ ଢେଙ୍କା ପଞ୍ଚାୟତର ହିତାଧିକାରୀଙ୍କୁ ଏପ୍ରିଲ, ମେ’ ଓ ଜୁନ ୩ମାସର ରାସନ ସାମଗ୍ରୀ ଏକାଥରକେ ବଣ୍ଟନ କରାଯାଇଛି। ଏଥିସହ ରାସନ କାର୍ଡ ପିଛା ହିତାଧିକାରୀଙ୍କୁ ଏକ ହଜାର ଟଙ୍କା ମଧ୍ୟ ପ୍ରଦାନ କରାଯାଇଛି। କିନ୍ତୁ କେତେକ ବ୍ୟକ୍ତିଙ୍କର ରାସନ କାର୍ଡ ନ ଥିବାରୁ ସେମାନଙ୍କୁ ଯୋଗାଣ ସାମଗ୍ରୀ ମଳିପାରୁ ନ ଥିବା ଅଭିଯୋଗ ହୋଇଛି। ପଞ୍ଚାୟତ ପକ୍ଷରୁ ଶହେ ଜଣଙ୍କୁ ଦୁଇ ଓଳି ରନ୍ଧା ଖାଦ୍ୟର ବ୍ୟବସ୍ଥା ମଧ୍ୟ କରାଯାଇଥିବା ଜଣାପଡ଼ିଛି। ସେହିପରି ଜିଆରଏସ୍ ପ୍ରଫୁଲ୍ଲ ମାଝୀ ଓ ପିଇଓ ନରହରି ନାୟକ ଘର ଘର ବୁଲି ହିତାଧିକାରୀଙ୍କୁ ଭତ୍ତା, ସାବୁନ, ମାସ୍କ ପ୍ରଦାନ କରିଛନ୍ତି। ଏଥିସହ ନିର୍ମାଣ ଶ୍ରମିକଙ୍କୁ ଦେଢ଼ ହଜାର ଟଙ୍କା ବଣ୍ଟନ କରାଯାଇଛି। ଅପରପକ୍ଷେ ଜିଲାରେ ଆଇସୋଲେଶନ୍ କେନ୍ଦ୍ର ଖୋଲା ସରିଥିବା ବେଳେ ବିଡ଼ିଓ ଓ ଯୋଗାଣ ଅଧିକାରୀ ଉକ୍ତ ପଞ୍ଚାୟତର ସମସ୍ତ କାର୍ଯ୍ୟକୁ ତଦାରଖ କରୁଛନ୍ତି। ଏହି ପଞ୍ଚାୟତ ଅଧିନରେ ୧୯ଟି ୱାର୍ଡ ରହିଥିବା ବେଳେ ଏହା ଏକ ଆଦିବାସୀ ପଞ୍ଚାୟତ। କରୋନା ଭାଇରସ୍ର ମୁକାବିଲା ଲାଗି ପଞ୍ଚାୟତ ପକ୍ଷରୁ ନିଆଯାଉଥିବା ବିଭିନ୍ନ ପଦକ୍ଷେପକୁ ସ୍ବାଗତ କରାଯିବା ସହ ଜିଆରଏସ ଓ ପିଇଓଙ୍କ କାର୍ଯ୍ୟକୁ ମଧ୍ୟ ପ୍ରଶଂସା କରାଯାଇଛ।
