ନୂଆଦିଲ୍ଲୀ,୧।୫: ଭାରତୀୟ ଅଧିନାୟକ ବିରାଟ କୋହଲି ଓ ଅଷ୍ଟ୍ରେଲୀୟ ଅଭିଜ୍ଞ ବ୍ୟାଟ୍ସମ୍ୟାନ ଷ୍ଟିଭ୍ ସ୍ମିଥ୍ଙ୍କ ମଧ୍ୟରେ କିଏ ଶ୍ରେଷ୍ଠ ଏ ନେଇ ଚର୍ଚ୍ଚା ଓ ବିତର୍କ ଏବେ ମଧ୍ୟ ଚାଲୁ ରହିଛି। ଏବେ ଏଥିରେ ସାମିଲ ହୋଇଛନ୍ତି ପୂର୍ବତନ କିମ୍ବଦନ୍ତୀ ବ୍ୟାଟ୍ସମ୍ୟାନ ତଥା ପୂର୍ବତନ ଅଷ୍ଟ୍ରେଲିଆ ଅଧିନାୟକ ଇଆନ ଚାପେଲ। ସେ ନିଜ ଦେଶର ସ୍ମିଥ୍ଙ୍କୁ ପଛରେ ପକାଇ କୋହଲିଙ୍କୁ ନିଜର ଫେଭରାଇଟ୍ କ୍ରିକେଟର ହିସାବରେ ବାଛିଛନ୍ତି। ସ୍ମିଥ୍ଙ୍କଠାରୁ କୋହଲି ଅପେକ୍ଷାକୃତ ଭଲ କ୍ରିକେଟର ବୋଲି ସେ କହିଛନ୍ତି।
କରୋନା ଭାଇରସ ସଂକ୍ରମଣ କାରଣରୁ ସାରା ବିଶ୍ୱରେ ଲକ୍ଡାଉନ୍ ଜାରି ରହିଥିବାରୁ ପୂର୍ବତନ ଓ ଏବେକାର କ୍ରିକେଟରମାନେ ସୋସିଆଲ ମିଡିଆ ମାଧ୍ୟମରେ ଲୋକଙ୍କୁ ଗୋଟିଏ ସୂତ୍ରରେ ବାନ୍ଧିବା ପାଇଁ ପ୍ରୟାସ କରୁଛନ୍ତି। ଚାପେଲ ମଧ୍ୟ ଅନୁରୂପ ଭାବେ ଟୁଇଟ୍ କରି ନିଜର ମନ୍ତବ୍ୟ ରଖି ଏଭଳି ପ୍ରୟାସରେ ସାମିଲ ହୋଇଛନ୍ତି। ଟୁଇଟ୍ରରେ କୋହଲି ଓ ସ୍ମିଥ୍ଙ୍କ ମଧ୍ୟରୁ ଆପଣ କାହାକୁ ଚୟନ କରିବେ ବୋଲି ଜଣେ ପ୍ରଶ୍ନ କରିଥିଲେ। ଏହାର ଉତ୍ତର ରଖି ଚାପେଲ ଏହି କଥା କହିଛନ୍ତି। ଉଭୟ ଅଧିନାୟକ ଓ ବ୍ୟାଟ୍ସମ୍ୟାନ ହିସାବରେ କୋହଲି ମୋର ପ୍ରଥମ ପସନ୍ଦ ବୋଲି ଚାପେଲ କହିଥିଲେ। ତେବେ ସ୍ମିଥ୍ ଜଣେ ମହାନ ବ୍ୟାଟ୍ସମ୍ୟାନ ବୋଲି ଚାପେଲ କହିଛନ୍ତି। ଚାପେଲଙ୍କୁ ବିଶ୍ୱର ଅନ୍ୟତମ ଶ୍ରେଷ୍ଠ ବ୍ୟାଟ୍ସମ୍ୟାନ ରୂପେ ବିବେଚନା କରାଯାଏ। ସେ ଅଷ୍ଟ୍ରେଲିଆ ପାଇଁ ୭୫ ଟେଷ୍ଟ ଓ ୧୬ ଅନ୍ତର୍ଜାତୀୟ ଦିନିକିଆ ମ୍ୟାଚ୍ ଖେଳିଛନ୍ତି।
